YMA Inkhawmpui lian neihna tur Sakawrdaiah mimal enkawl ATM booth hawng

Mizorama mimal enkawl ATM Booth 6-na a ni.

Aizawl | July 5, 2025: Kumin October thlaa YMA Inkhawmpui Lian neihna tur Sakawrdai khuaah tukin khan Sakawrdai VCP T Lalropuia'n Mizorama mimal enkawl ATM Booth 6-na a hawng.

Hawnna inkhawm tawi hi Thanglianchhunga building ATM Booth kawtah neih a ni a. Sakawrdai VCp T Lalropuia chuan ribbon chep chatin a hawng a, hawnna thusawiin, VCP chuan Sakawrdai khawtlangin an mamawh em em ATM Booth an khua ngeia hawn a ni ta chu a lawmawm tak zet a, kan hma lawka Mizoram pum huap YMA Inkhawmpui Lian pawh changtlung zawkin kan thlen theih phah dawn a. Sakawrdai leh a chhehvel khua ten tangkai takin kan hman ngei ka beisei a ni, a ti.

EFCI Presbytery Superintendent Rev Langminthang chuan Pathian hnenah ATM Booth hi a hlan a, Franchisee Jerry H Pulamte leh Mizoram Rural Bank Sakawrdai Branch Manager Reuben-a te pawhin thu an sawi a ni.

Mimal enkawl ATM Booth hi RBI hnuaia license nei thlap Vakrangee Kendra Company Ltd hnuaia din a ni a, eng Bank ATM card pawha pawisa lakchhuah theih a ni a. Mimalin thahnemngai taka an enkawl dawn avangin pawisa awm loh avanga ATM chhia tih ang kha a awm ve dawn lo a ni. Mizoram hmun hrang hrangah hawn chhoh zel tum a ni a, ti ve duh tan ngaihven theih reng a ni.