Saitualah Border Coordination Committee thu khawm; Indo-Myanmar Border-a luh leh chhuahna, hungna leh border area-a hnathawh hrang hrang te endik a, a tul anga hma la tura din a ni - Saitual bawrhsap

byAdmin — 0
Saitual | July 7, 2025: Vawiin khan DC Conference Room, Saitualah Border Coordination Committee chu an chairman, Saitual Bawrhsap ni bawk, Dr Lalngura Tlau kaihhruainain an thu khawm.


He hunah hian Dr. Lalngura Tlau chuan kalkhawmte hnenah lawmthu a sawi a, Indo-Myanmar Border-a luh leh chhuahna (entry/exit), hungna (fencing) leh border area-a hnathawh hrang hrang te endik a, a tul anga hma la turin Border Coordination Committee chu din a ni tih sawiin, fund an dawn ve leh khaw hrang hrangah awareness campaign neih a nih tur thu a sawi bawk. 

Bawrhsap chuan Border Roads Organisation (BRO) te leh Assam Rifles te chu hnathawh kawnga inhriattir tur pawimawh a awm chuan committee hnena thlen vat thin turin chah a, kalkhawmte chu an mawhphurhna theuhah te theih tawp chhuah zel turin a fuih nghal a ni.


Indo-Myanmar border-a Entry/Exit point siamna tur atan hian hmun sawm pathum (13) thlan chhuah a ni a, chumi zingah chuan Hrianghmun-Tuisa lui, Saitual District chu thlan a ni. Border Coordination Sub- Committee Chairman, SDO (C), AR aiawh leh BRO aiawhte chuan Hrianghmun-Tuisa lui chu endikna (Joint survey) an nei a, a hungna tur hmun te, entry/ exit point siamna tur te, check post siamna tur ram te an endik tawh a ni. Check post siamna tur ram neitute pawhin an ram hmansak an remti a, endiktu ‘Joint Inspection team’ te pawhin a ram chu check post siam nan a that thu report an theh lut a ni.

Checkpost piah lamah hian border area-a mipuite lei tur hrang hrang zawrhna leh pho chhuahna tur “Border Haat” siam tura rua hman a ni a, a hmun tur hi BRO lamin endik hmasain, Committee in an ngaihtuahho leh hnuah, Land Revenue & Settlement Department hnenah lehkha thawnin an bawhzui dawn a ni.

Vawiin thutkhawmah hian Border Coordination Committee Chairman & DC Dr. Lalngura Tlau, Border Coordination Committee Sub-committee chairman & SDO (C) Dorothy Muansangi, Addl DC Lallawmawma, Addl SP J Rokima, SDO (S) Lalthakima Chhangte, DIPRO F Zodingpuii, SDC J Lalawmpuia, 34 Assam Rifle Asst, Comdt Anil Chhetri leh 74 RCC/Pushpak OC Vikash Kumar Singh te an tel a ni.



Written by -
F. Zodingpuii, MIS
DIPRO, Saitual
DIPR





Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post