Aizawl | July 10, 2025: Mizoram Governor, General (Dr) Vijay Kumar Singh, PVSM, AVSM, YSM (Retd), President, Indian Red Cross Society (IRCS), Mizoram State Branch ni bawk chuan vawiin khan Govt. Aizawl College, Mualpuiah IRCS Mizoram State Branch tharthawhna hun hmanpuiin hmalakna tur duante a tlangzarh a. Mizorama Youth Red Cross Unit din hmasa ber Govt. Aizawl College leh a pahnihna Govt. T. Romana College-te hnenah Institutional Membership Certificate a hlan bakah, IRCS Mizoram State Branch hruaitu 7 te hnenah Life Membership Certificate a hlan nghal bawk.
Governor General (Dr) Vijay Kumar Singh (Retd) chuan IRCS Mizoram State Branch tharthawh a ni leh hmalakna turte tlangzarh a ni ta chu lawmawm a tih thu sawiin, he hun hi Mizoram tana hun pawimawh tak, mahni mihring puite tana rawngbawl kawnga hmalakna awmze nei leh intuaitharna a ni, a ti a. Mizoram chu tlawmngai pawl chak leh viak tha tak tak awmna a nih thu leh, engmah phut let nei hauh lova midangte puih duhna thinlung chu Mizo nuna bet tlat a nih thu sawiin, puih ngai an awm apianga khawtlang huapa chet chhuah a ni thin chu thil thar a nih loh thu leh chhuanawm a tih thu a sawi a. Midang lainat leh pui thin khawtlang ni mah ila, midangte rawngbawl sak kawnga khawvel puma pawl hriat hlawh leh awmze nei taka kalpui, IRCS Mizoram State Branch kan neih belh hmang hian rawngbawlna kan tichak lehzual thei dawn a ni, a ti bawk.
IRCS Mizoram State Branch President ni bawk General (Dr) Vijay Kumar Singh (Retd) chuan Youth Red Cross Unit hmasa ber Govt. Aizawl College leh a pahnihna Govt. T. Romana College-ahte din a ni chu lawmawm a tih thu sawiin, College leh zirna in hrang hrangte chu Youth Red Cross Unit din chho zel turin a sawm a. Mizo thalaite chu Red Cross zawma an hun hlu tak, thiamna leh chaknate Red Cross hnuaia hmalakna hrang hrangah hmang tangkai turin a fuih a. Red Cross chu pawl mai ni lo, beiseina eng chhinchhiahna a nih thu sawiin, Mizoram chu India ram puma Red Cross Model State ni tura tanlak a duh thu a sawi bawk.
IRCS Mizoram State Branch Chairman H Lalengmawia chuan IRCS Mizoram State Branch thar thawh leh nana hmalak dante tarlangin, hemi kawnga Governor hmalakna fakawm a tih thu a sawi a. Mizoramah Red Cross Society changtlung leh nung tha tak nei tura hmalak chhoh mek zel a nih thu sawiin, College hotute chu Youth Red Cross Unit din tura tan la theuh turin a chah a ni.
He hunah hian IRCS Mizoram State Branch Joint Secretary Dr Benjamin Lalrinpuía, chuan inhmelhriattirna hun hmangin report ngaihthlak a ni a. Govt. Aizawl College Principal Lalbiakzuala'n thu a sawi hnuah IRCS Mizoram State Branch Secretary Dr Chawnglungmuana'n lawmthu sawiin hun hman a khar a ni.
Programme hman zawh hian Mizorama Youth Red Cross Unit ding hmasa ber, Govt. Aizawl College Youth Red Cross Unit member-te tana buatsaih, Basic Life Support (BLS) leh First Aid Training session neih zui nghal a ni a. Govt. Aizawl College Youth Red Cross Unit-te hian IRCS Mizoram State Branch atangin blanket 30 leh Oxygen Concentrator an dawng a ni.
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: