Mizo film ‘Thuruk Thuhruk’ tlangzarh a ni ta!

Aizawl | July 26, 2025: Mizo film thar ‘Thuruk Thuhruk’ tih film chu nizan khan Vanapa Hall-ah mi zawng zawng en theih turin tlangzarh a ni a, Leikapui Studios App-ah leh leikapuistudios.com-ah te en theih nghalin a awm.

‘Thuruk Thuhruk’ hi D-3 Business Enterprise neitu Dr. Lalmalsawma Nghaka chuan a tlangzarh a, “Film pakhat siam tur hian mi tam tak talent hrang hrang nei, a thawnthu ziaktu, a chang chhuaktu te leh videography leh audiography thiam bik te leh support crew tam tak an awm a ngai," a ti.

Mizo film industry-in hma a sawn chhoh zel hi a pawimawh hle a. Mizo tawng humhim nan leh kan hnam zia humhalh nan te thil tangkai tak a ni a, nakina tuchhuak lo awm zel tur ten pi leh pu, nu leh pa te nun dan phung, hnam zia rang leh tawng kauchheh te an zir let theihna hnar pawimawh tak a ni dawn a. Kan thalai rualten film industry an kalpui chho thei zel hi Mizo mipuite pawhin hlutpui nachang kan hriat chhoh zel a tul tak zet zet a ni,” tiin a sawi.

He film hi Hebron Productions kutchhuak a ni a, Director - Remruattluanga Pautu niin, Script Writer hi Sangsangi Khawlhring a ni.

He film hmuhnawm taka a changtute hi tun laia Mizo Film industry-a lemchang thiam lar ber berte niin, Duhawma Hmar (kawrthindenga tia hriatlar), Rody Phutin, Jasmine Chinzah, Aaron, Chhanhima leh midangte eng emaw zatte an inlan a ni.