Electric Veng Branch YMA in Faina Hnatlangpui an nei

Aizawl | July 26, 2025: UD&PA, AMC, Aizawl Smart City leh CYMA ṭangkawpin an buatsaih Faina Intihsiak chu kalpui mek a ni a, tukin July ni 26, 2025 khan Electric Veng Branch YMA chuan FAINA HNATLANGPUI an nei a, YMA member leh YMA chhang mi 800 vel zet an thawk chhuak. Hnatlanna hmun hrang hrang hi AMC hotuten tlawhin, Mayor Lalrinenga Sailo chuan Rs 20,000 a pe a, Mayor hi Executive Corporator Laltlanzova Khiangte leh AMC official ten an ṭawiawm a ni.

Electric Veng Branch YMA chuan Faina intihsiakah hian pakhatna nih ngei tumin ṭan an la a, Faina Sub Committee din tawhin, Faina Intihsiak pual hian a hawnna hun pawh an lo nei tawh a ni. Veng chhung faina kawngah chak taka hmalak zui niin, veng chhunga kawr kam hnim te, lung rema hnim ṭo te, sarang leh bawlhhlawh reng reng a theih ang angin an tifai a. Kawrah bawlhhlawh leh leivung paih lo tur te, mahni inah bawlhhlawh ṭawih thei leh ṭawih thei lo thliar uluk zual tur tein mipui an zirtir mek a. Social Media hmang leh tlangau hmangtein zirtirna hi an kalpui tawh a, in tinah faina kawnga hmalakna tur lehkhate pawh sem zel an la an tum a, YMA chanchinbu TUITU ah a tam thei ang ber faina lam ziah nise an tih angin, faina kawnga inzirtirna thu an tichhuak reng tawh a ni.

Electric Veng Branch YMA hnuaiah hian section panga awmin, tukin hnatlangah hian mahni section huam chhung ṭheuh tifaiin an hnatlang a. Intihsiaknaah lawmman pakhatna lak an tum mai piah lamah, faina kawngah Electric Veng chuan faina lamah hma a sawn thei a ni tih an inzirtir mek a, kawr bawlhhlawh paih a nih tawh loh nan, banner eng emaw zat an tar thar bawk.