Hriat theih chinah kumin ang em em-a Mizoram chak lakna kawngpui pawimawh a chhiat nasat țum leh heti taka mipuiten kan tawrh nasat țum hi Mizoramin a la tawng ngai lo!

Aizawl | July 26, 2025: MNF Publicity Board Vice Chairman J Sawma Vanchhawng chuan, vawiin khan thuthar thehdarhtute kawmin, ‘Mipui ngaihpawimawhna nei lo ZPM sorkar hi mipuite tan rin an harsa tawh dawn’ a ti.

"Hriat theih chinah kumin ang em em-a Mizoram chak lakna kawngpui pawimawh a chhiat nasat țum leh heti taka mipuiten kan tawrh nasat țum hi Mizoramin a la tawng ngai lo," a ti bawk.

MNF Publicity Board Vice Chairman J Sawma Vanchhawng press statement kimchang:

July 26, 2025

‘Mipui ngaihpawimawhna nei lo ZPM sorkar hi mipuite tan rin an harsa tawh dawn’.

Hriat theih chinah kumin ang em em-a Mizoram chak lakna kawngpui pawimawh a chhiat nasat țum leh heti taka mipuiten kan tawrh nasat țum hi Mizoramin a la tawng ngai lo.

Mizoramah fur a nat avangin kan motor kawngpuite hi țhal laiin a theih ang anga chei țhat a țul țhin. Nikum lamah harsatna nasa tak kan lo paltlang tawh avangin hna thawh theih hun lai, țhal laia awmze neia hmalak anih loh chuan kuminah hian Mizoram chak lakna kawngpui, a bikin Kawnpui - Khamrang leh Khamrang to Buichali inkarte hi a chhe nasa hle dawn tih mipui nawlpui pawhin kan hrethiam lawk a, sorkar phei chuan a hmu lawk chiang sa em em a ni.

Kawng siamna tur sum a awm thu leh ruahtui a hul veleh kawng siam țan tum anih thu pawh nikum lam kawng chhiat vanglai 2024 September thla khan PWD Minister Pu Vanlalhlana’n a lo puang tawh a, kawng siamna tura a bik taka tuialhthei ațanga ZPM sorkarin chhiah a lak Road Maintenance Cess tling khawm pawh tun dinhmunah Rs.25,54,57,771.00 zet a ni tawh bawk. Sum nei reng chung si leh kawng a chhe nasa hle dawn tih hre lawk reng chung sia ZPM sorkarin țhal chhung zawng hmalakna mumal a nei lo hi mipuite ngaihpawimawh lohna nasa tak a ni a. ZPM sorkar hi chhiah petu mipuite tan rin zui a harsa tawh dawn a, an laka beiseina neih chhunzawm pawh a harsa hle tawh dawn a ni.

Tuna kawng chhe zual em em, motor tam tak a tan vanga mipuiin harsatna namen lo kan tawhna chhan lian ber Kawnpui-New Khamrang hi nikum lamah pawh mipuiten nasa taka kan tawrh chhan a lo ni tawh a, 2024 September thlaah sorkarin Contractor bantirin, a security pawh cheng nuai 35.37 lai a chhuhsak a, amaherawhchu khati khawpa kawng chhe nasa tawh si kha, contractor kut ațanga laksak a nih hnuah pawh țhal chhung zawngin engmah ti mumal lovin Sorkar-in a thlir a, a mutthluk san chhunzawm leh avangin kuminah harsatna namen lo kan tawk nawn leh ta mek a ni.

Kumin July ni 7 -a NHIDCL-in an lak fel tak hma zawng kha chuan State sorkar mawhphurhna a ni tih hi thudik a ni a, mawphurtu dang kawh tur dap phei chu mawhphurhna lak ngam lohna leh a tuartu Zoram mipui zah lohna nasa tak a ni. Contractor security chhuhsak kha kawng siamna tur liau liaua mipui chhiah pek khawm leh state sum pawha belh chhahin, țhal chhung khan lo siam chu ni se heti em em hian mipui kan buaiin kan tuar lo ang.

Kum 2023 December thla, țhal lai, hnathawh theih hun lai takin ZPM sorkar hi a lo ding țan a, țhal chhung zawng holiday an hmang phawt a, 2024 fur a lo thleng a, September thla a lo thlen meuh chuan tuna kan buai zualna lai, Kawnpui leh Khamrang inkar hi a chhiat lutuk avangin lirthei a tlan hlei thei ta lo a. Mizoramah bungrua a lut mumal thei lo a, tuialhthei indaih lohna nasa tak a thleng a, 17th Sept.2024 ah phei kha chuan kawng chhe lutuk avangin Mizoram Oil Tanker Driver Association (MOTDA) leh Petroleum Entrepreneurs and Transporters Union of Mizoram (PETUM) chuan tiam chin awm lova din an tintuah hial a. Mizoram Commercial Vehicle Union pawhin 16th Sept. 2024 khan Chief Minister hmuin Kawnpui leh Khamrang inkar kawng chei țha turin an ngen bawk a. 2024 September leh October thlaah te khan lungawi lohna thawm ring tak kil hrang hrang ațanga hriattur a awm a. Central YMA meuh pawh che chhhuakin, ‘A huna siam țha tura kan ngenna an ngaih pawimawh loh avangin tun dinhmun hi kan thleng ta a ni’ tiin an au chhuak hial anih kha. Mizoram Commercial Vehicle Union phei chuan kawng chhe lutuk kara chhiah tihsan vanga tuialhthei man sang lutuk dodalin 23rd Oct.2024 khan nawrh an huaihawt a, 22nd Oct. 2024-a Press Conference an neih țum khan Mizoram chak lakna kawngpui chu tlan hleih theih lova a chhiat thu leh Aizawl khawpui chhung kawngpuite pawh a chhiat ber țum a nih thu an puang a nih kha.

Hetianga kawng chhia avanga harsatna nasa tak kan tawh lai mek lai hian 2024 September thla ațang khan ZPM sorkar hian motor kawngpui siamna tur chhiah (Cess), Diesel leh Petrol atangin litre khatah Rs.2 ve ve leh Social Infrastructure Cess Rs.2.00 ve ve, a vaiin litre khatah Rs. 4.00 zel lirthei neitute a chawitir țan a, chu mai duh tawk lovin Diesel atanga VAT lak mek pawh a let deuh thaw, 5.23% ațangin 10% ah leh Petrol ațanga VAT lak chu 16.36% ațangin 18% ah a ti pung tel bawk a, Diesel litre khat chu a hma aiin Rs.7.76 zetin a to chho dawrh a, Petrol pawh a hma aiin litre khatah Rs.5.56 zetin a sang dawrh bawk a nih kha.

Mizoram chhunga motor kawngpuite a lo chhiatin, a tuartu chu Zoram mipuite kan nih avangin sorkar pangngai chuan mawhphurhna a la țhin. Khamrang – Sairang inkar pawh NHIDCL kuta awm mai tur ni mahse, MNF sorkar liamtaah kha chuan a tuartu Mizo mipui kan nih avangin state sorkarin mawhphurhna a la mai a. Chief Minister hlui Pu Zoramthanga khan PWD officer te hruaiin, sorkar tirhah hna hmasa berah a neih nghal a. 2019 tir lam țhal lai khan sum harsatna karah state sorkar sum Rs.620 lakhs lai sengin Buichali leh Khamrang inkar kawng chu Contractor ruaiin siam țhat a ni a, tunah chuan kum 6 lai a lo liam leh tawh avang leh țhal laia chei țhat mumal a hlawh loh avangin a lo chhe ve leh nual tawh a ni.

Kan ramah fur ruahtui a tam țhin avangin țhal lai ngeia kawng siam a țul țhin a. Kawng siam hun țhal laiin kawng siamtu department-ah pawisa pe si lovin ZPM sorkar hian a thlir liam a, furah nasa fea a chhiat hnuah siam an tum a, fur laia kawng siam țhat a theih loh thu chhuanlama an hmang leh hlauh si te hi a tuartu mipui ngaihpawimawh lohna leh zah lohna a ni.

Tun hma pawhin kan kawngpuite hi chhe lai a awm fova, furah pawh harsatna han tawh țum a awm țhin. Mahse kawng hmang țhintu Driver te leh bungraw chah țhin sumdawng reng reng ten ‘Hriat theih chinah tun ang reng renga kan kawngpui pawimawh (life line) chhiat nasat țum hi a la awm ngai reng reng lo’ an ti a ni.

ZPM sorkarin motor kawngpui chungchanga record a siam dan hi a chhuanawm lo hle a. Kum 15 daih kawng siam tura intiamna te, ‘ZPM a Sawrkar chuan a sorkar tuk ațangin kawng a țha nghal ang’ tia intiamna thawm te mipui benga a thangkhawk pawh a reh hmain ‘hriat theih china kawng chhiat ber țum’ kan tawng mek ta zawk a ni.

An hna thawh duh ngawih ngawih lirthei enkawltute an hna thawk thei lo leh thawk ngam lova an ding țhuap mai te, tuialhthei indaih lohna nasa tak thleng mek te, khualzin tam takin harsatna namen lo an tawk mek te, bungrua a thlen mumal loh avanga sumdawng tam takin an tlak chhiat phah mek te, kan state sum leh pai dinhmun (economy)-in hniam lam a pan rawk rawk maite hi thil lungchhiat thlak tak a ni. Mipuiten harsatna namen lo kan thawh tur hmu lawk reng chung leh kawng siamna tur bik liau liau chhiah sang tak la chung sia a tun ang harsatna nasa taka ZPM sorkarin min hnuklut ta mai hi sorkar awm chhan nena thil inkalh hlauh a ni a, midang mawhpuh tur dap phei chu chhiah petute zah lohna nasa tak a ni.

Heti ang taka mawhphurhna hlen zo lo leh mawhphurhna la ngam lo ZPM sorkar hi kawng dangah pawh mipuite tan rinngam a harsa hle tawh dawn a. Tuna hna an tan pawh hi mipui nawr kalna avang liau liaua thawk an ni a, lo siamtha ta pawh nise mipui sum tlingkhawma siam an nih avangin Mizoram Sawrkar hian in chhuanna tur pakhat mah an nei lo.

Lirthei neitu zawng zawng leh lirthei hman man chawi thin zawng zawng ten kawng siam nan CHHIAH nasa tak kan chawi miau a, ZPM sawrkar hnuaia kawng chhe em em kan zawh avangin mipui hi thikthu chhe tur, lungawilo em em tur kan ni tih hi kan sawrkar hrawn mek hian hre thar leh se, insawithiam reng tum lo hian, zah nachang hre chunga Mizoram hmun hrang hrangah zawh harsa taka kawng chhia te hi, Mipui hnena an chhiah khawn khawm atang hian a siam hna thawk mawlh mawlh turin MNF chuan a phut tlat a ni.

Issued by

MNF Publicity Board

Mizo National Front, Gen. Hqrs. Aizawl.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]