Council of Churches in Mizoram (CCM) buatsaih Seminar Kolasib-ah

Aizawl | July 26, 2025: Council of Churches in Mizoram (CCM) buatsaih Seminar vawi 4-na chu vawiin khan Ṭumpui Presbyterian Kohhran Hall, Kolasib-ah neih a ni.

He hunah hian CCM member kohhrante aṭangin palai 155 an kalkhâwm.

Seminar ṭum lî na hi CCM President Rev Dr R Lalbiakliana'n a kaihruai a, CCM General Secretary Rev Dr Lalhmangaiha'n a ziah, "CCM LO PIANCHHUAH DAN LEH HMALAM THLIRNA," tih an zirho.

Chawhmaah Paper present ngaihthlâk a ni a. Chawhnu 1:30-ah Family Guidance & Counselling Centre (FG&CC) Counsellor Rev RC Lalṭhafela kaihruaina in Group - 6 ah an inṭhen a, sawiho tur thupui pahnih - CCM hi kohhran mipuiten kan hriat tlan theih nan eng programme nge siam thin ila ṭha ang? leh CCM-in Commin Project a neih tura ṭha engte nge ni ang? tih te sawiho a ni.

Group tin aṭangin sawihona a rawtna point hrang hrang an siamte ngaihthlâk zui a ni a.

Chairman leh Secretary-ten khaikhâwmna fel tak a an siam hnuin programme hi tihtâwp a ni.

Council of Churches in Mizoram (CCM) hi October 27, 2024 (Pathianni) khân Mission Veng Presbyterian Kohhran Biak in-ah din / hawn a ni a. Council of Churches in Mizoram (CCM)-ah hian member pakua - Mizoram Presbyterian Church, Baptist Church of Mizoram, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran Bualpui, Independent Church of India, Wesleyan Methodist Church of Mizoram leh Zomi Baptist Church te an awm mek a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]