Aizawl | July 1, 2025: Nimina PWD Minister Vanlalhlana’n helai kawng enkawl hna chu Mizoram PWD mawphurhna a ni lo anga a sawi chu thudik lo a ni tih sawiin mipuite rilru hruai kawi nana sawiah an ngaih thu an sawi a, 'PWD minister hian mawhphurhna a lak ngam loh chuan, bang mai rawh se,' tiin CESJ aiawhtu Vanramchhuangi chuan a sawi.
Vairengte - Sairang kawng, a bikin, Kawnpui - Sairang kawng chu a chhiat dan a namai lo hle nia sawiin, Mizoram kawng pawimawh tak a nih avangin sawrkar chu a rang lama hma la turin an ngen a, sorkar a ngaih chuan, mipuiin hnatlanga siam mai a ngaih tur thu vawiin khan pawl pali aiawh ten Aizawl Press Club-ah thuthar thehdarhtute kawmin an sawi.
Mizoram Transformation Movement (MTM), Centre For Environment And Social Justice (CESJ), Mizoram First (MF) leh Citizen Alliance For Truth And Justice (CATAJ) te aiawhte chuan, Kawnpui - Sairang kawng chu zawh hlehtheihloh khawpa chhia a nih avangin motor tlu leh tang an awm thin thu an sawi a, hemi vang hian lirthei thahnem tak an tangkhang a, Mizoram chak lakna kawngpui pawimmawh a nih a vangin, ni hnih thum lek lirthei a kal theih loh pawhin Aizawl-ah thil a vang nghal zel niin an sawi bawk.
Mizoram sorkar mai bakah Central sorkar pawh NHIDCL kawng siam leh enkawl chungchangah hian an kar tel a, mipuite mamawh kawng tha pe turin an beisei a ni.
Vawiin Press Conference-ah hian an pawl aiawhin, MTM President Dr Lalbiakmawia Ngente, Mizoram First President ZR Thahmingliana, CESJ Working Chairman Vanramchhuangi leh CATAJ Secretary General Lalram Mawia te an tel a ni.
Mizoram kawngpui National Highway 306 & 06 (Kolasib to Sairang) kawng zawh hleih theih loh khawp a chhia te, motor tu leh tang khawpa a awm te, kan chak leh mamawh te lak theih loh khawpa a awm hi keini pawl hrang hrang palite: Mizoram Transformation Movement (MTM), Centre For Environment And Social Justice (CESJ), Mizoram First (MF) LEH Citizen Alliance For Truth And Justice (CATAJ) te chuan pawi kan tiin kan rilru a na em em a, kawng chhia a dah tute hi kan dem takzet, an ti a.
"He kawng hi PWD Minister in June ni 30, 2025 a sawi danin Mizoram PWD mawphurhna a ni lovin a sawi a; mahse, NH 06 package 8 (Kawnpui to Khamrang) hi vawiin thlengin Mizoram PWD enkawl a la ni. Minister hian thudik ziktluak lo mipuite rilru hruai kawi nan a sawiah kan ngai a, a pawi kan ti hle," an ti bawk.
"He kawng pawimawh tak hi tu enkawina hnuaiah pawh awm se, a ram neitu Mizoram Sorkar mawhphurhna niin kan hria a. Mizoram Tripper Association mangang pawhin siam tura hma an lak ngam chuan sorkar meuh chu mawphurhna la a hmahruai turin kan beisei tlat a, kawng siamna tur boulder tlemte chauh thawhchhuah pui mai lovin hmanrua tha ber ber nena thawk chhuak nghal turin kan beiseiin kan thlir reng a ni.
He kawng hi Mizoram mipuite zawng zawng tana pawimawh (Life-Line) a nih avangin Sorkarin hma rang taka a la lo a nih chuan mipuite hnatlanga chhuah a ngai mai dawn a. Hetiang ngai lo tur hian Sorkar in hna thawk nghal turin kan beisei a ni," an ti bawk.
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: