"Kan State-a Sorkar mek te'n issue based-in Central Sawrkar kan support ang an lo ti a, Central lam pawhin Issue based thoin min lo support nge ni? kan State Sawrkar hi a rethei ta hle," - K Hrahmo

byAdmin — 0
Aizawl | July 14, 2025: BJP Mizoram chuan vawiin khan karthar inhlanna leh Political Session hun an hmang a, Lalthangmawii'n inkhawm a kaihruai a, K Changliana'n hunserh hmangin, MLA K Hrahmo leh PC Lawmkunga, IAS (Retd) ten thusawina hun an nei  bawk.


MLA K Hrahmo chuan, "India rama BJP leh a thawhpui te'n Sorkarna an siam dawn khan keini State pawh Sorkara tel ve tura sawm kan ni a, nimahsela kan Sorkar hrawn mek khan kan hotute sawmna chu Issue based-a an Support tur thu an puang ta a, khang hunlai khan kan Sorkar hrawn mek ZPM hian issue based ni lovin lo zawm mai sela chuan Mizoramin tun huna suma harsatna kan tawh mek te, Mizoram tana policy an duan pawh tuna mipui dem luai luai tawk lo leh fakna ṭawngkam tam tak an dawn theihna kha an tichhe ta a ni. Chu mai bakah Mizoram khan Union Minister neih theihna hun ṭha tak leh Kristiante tan mai bakah State pawn Missionary-te tan pawha rawngbawlna atana min puitu tur a nih a beiseiawm vei nen a pawi takzet a ni. Chuvangin, Kan State-a Sorkar mek te'n Issue Based-in Central Sawrkar kan support ang an lo ti si a, Central lam pawhin Issue based tho bawkin min lo support nge ni? kan State Sawrkar hi a rethei ta hle mai hi a pawi hle a ni," a ti.


K Hrahmo chuan, "Mizoram mipui te'n BJP min hmuh dan a ṭhat loh hle laia, Aizawl khawpui chhung ataynga mi 228 lai maiin BJP ah an rawn zawm ta mai hian, BJP ṭhat zia leh BJP-ah mipuiin rinna an nghah nasat tawh zia a tilang chiang hle a ni tih a hriat a, BJP hi hlauh chi a nilo a nih lozia leh Development Party kan nihzia an tilang chiang hle a ni," a ti.


K Hrahmo chuan sawichhunzawmin, "MLA fund chungchanga sawiselna tunlai hian a hluar hle a, MLA-te hamṭhatna chu za zel ah 420% an ti a. Nimahsela, MLA-te hian Sorkar hmasa ang lo takin Vehicle lei nana MLA pakhat zela Nuai 10 an pek tawp kha tibovin, tunah chuan MLA t'en Nuai 15 a thlawn nilovin, Vehicle atan Loan-in kan la thung a, tuna MLA-te Motor Loan ang hi chu Personal pawhina kan lak theih ang tho a ni a, MLA tan chuan hamṭhatna a awmlo tihna a ni. Tin, MLA Fund pawh cheng nuai 50 a belh niin, nuai 200 a lo ni a, theih ni phei sela, Nuai 500 te a aia tam te hi MLA fund ni se a ṭha tur zawk a ni. A chhan chu, MLA Fund hi mimal tan leh chhungkhat laina tan ni lovin, kan Bial mipuite tan a ni a, mipui lam erawh chuan MLA Fund kan hman dan an monitor uluk a ngai thung dawn a ni. Chuvangin thil reng reng a lan anga ngaihtuah mai lova, fel taka ngaihtuah zawk turin Mizoram mipuite ka sawm che u a ni," a ti bawk.


PC Lawmkunga, IAS (Retd) chuan thusawiin, "India rama Rorel mek Pu Modi-a kaihhhruai Sorkar hian India ram chu khawvel ram changkang ber ni tura hma a lakna ah keini Mizoram pawh kan bang chuang lova, India ram hi Kum 2047 ah chuan khawvel ram changkang ber anih loh paw'n changkang ber dawt emaw, changkang ber pahnih zingah a awm anga, chuta pakhat zawk chu India ram kan ni dawn a ni. Chu changkanna in a ken telah pawh Mizoram pawh nasa takin min rawn nghawng mek a, kawngpui ṭha tak tak Central-in min laihsak a, Rel a rawn lut leh tawh bawk a, heng hmasawnna Mizorama rawn lut te avanga tu te'n emaw min lo sawi ṭhaih ṭhin te kha a zialo hle a, Mizo te hi heng hmasawnna rawn thleng tur dawngsawnga kan rilru pawh kan lo insiam rem a ṭul hle a ni," a ti.


Lawmkunga chuan, "Sorkar tawh te'n Mizoram sum chungchang an sawi ṭhin a, Central aṭanga sum hi a luang lut zur zur tih kan hria a ni. Nimahsela heng sum te hi a luanchhuah lehna lam a fel leh loh avangin hmasawnna a kal tluang tak tak thei chuang lova, hmasawnna hi a taka kan hmuh theih nan chuan ruahmanna ṭha a ngaia, Central aṭanga kan sum hmuh ah UC fel taka kan pek theih loh ṭhin avanga sum kan hmuh tur ang kan hmuh theih lohna hi a tam a ni, hei hi a zahthlakin a pawihle a, UC kan thehluh theih loh chuan kan sum hman a diklo tihna a ni. Chuvangin Kristian ram kan nih angin kan rinawm tur a ni a, hnamdangte entawn tlaka kan awm a pawimawh a ni," a ti bawk.


Inkhawm ah hian BJP Member-te aṭangin thusawina hun neih a ni bawk.




Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post