Fisheries Deptt pawisa nuai sang khat

Aizawl | July 28, 2025: Tun hnaia Fisheries Deptt pawisa ₹1,000 lakhs chungchanga thu darh mek chungchangah Fisheries Deptt in an sawifiah dan social media-a darh chu:

1. He pawisa, mother sanction a ₹1,000 lakhs central atanga kan hmuh hi central scheme PMMSY hnuaia sangha dil siam leh sangha khawi kaihhnawih hrang² atana hman tur a ni.

2. He pawisa hmang thei tur hian Fisheries Deptt in Finance Deptt ah expenditure sanction kan dil mek a, kan bawhzui mek a ni.

3. He pawisa hi hman theih tura sanction approval hmuh a nih veleh pawisa hmanna tura ruahman sa, component hrang² atan bill siam a ni ang a, DBT in pawisa te hi SNA SPARSH kaltlangin RBI in pawisa dawngtu tur te account ṭheuhah an khung ang.

4. He pawisa hmanna tur hi fel taka ruahmansa vek niin, a hman dan tur pawh Mizoram sawrkarin a approve sa vek a ni.

Hemi chungchanga Zalen-in a lo tarlan tawh dan:

MNF-in Fisheries Department pawisa dawn Nuai 1000 awmna sawrkar an zawt

Aizawl | July 25, 2025: DONER Consultative Meeting chu nimin (July 24, 2025) khan Parliament Annexe Committee Roomah an thukhawm a. North East MP engemawzat leh Official thahnem tak he meeting ah hian an tel.

DoNER Consultative Meeting a tel ve Fisheries & Animal Husbandary Director chuan Mizoram MP K. Vanlalvena hnenah ngenna lo thlenin, Central sawrkar Fisheries Deptt. chuan April 2025 khan Mizoram Fisheries Dept. hnenah SNA SPARSH Scheme kal tlangin cheng Nuaih sangkhat a sanction tawh thu leh Mizoram sawrkarin tun thlenga he pawisa hi a la hman loh avangin sanction dang lo kal leh tur cheng nuaih zasarih pawh an dawn loh phah theih thu a lo hrilh a. A tul anga hma la tura Mizoram Chief Secretary hnena ngenna an thawn copy pawh Director chuan K. Vanlalvena hnenah a hlan nghal bawk a ni.

MNF chuan April 2025-a sanction tawh cheng nuai sangkhat hi Mizoram Sawrkar hian eng atan nge a hman, a chheprelh nge, a hman dan tur an la zirchiang mek zawk, tih a rang thei ang bera puangzar turin a phut a. Central sawrkarin a hmanna tura min pek ang ngeia hmang a, sum la hmuh tur tibothlau zawng khawsak lo turin a chah bawk a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]