Mizoram-in MGNREGS atan nuai sing thum sang sarih chuang dawng tawh; Mizoramah Job Card 2,12,517 awm mek

Aizawl | July 28, 2025: Vawiin chawhnu khan Rural Development & Administration Minister Prof Lalnilawma chuan a Pisa, MINECO-ah Chanchinbumite a kawm a. He hunah hian MGNREGA kalpui danah Central in dan zawm tur an rawn zam thar chungchang te Job Card neitute, VC, VEC leh Zorama mipui ten an lo hriat chian theih nan a sawifiah.

Minister chuan, Kum kalta Financial Year 2024-2025 chhung khan Ministry of Rural Development in Labour Budget min approve sak zat chu 213 lakh person days a ni a. Tichuan, nikum chhung khan ni 100 inhlawhna kan siam thei a. Wage Component atan Rs.59158.0797 lakh hmuh a niin, Material Component atan Rs.913.61 lakh hmuh a ni bawk.

Kumin Financial Year kal mekah hian Ministry of Rural Development in 210 lakh person days min approve leh a, kumin Financial Year chhung pawhin ni 100 inhlawhna kan inpek theih ka beisei a. Tun dinhmunah hian kumin Financial Year kal mekah Ministry of Rural Development chuan Wage Component atan Rs.35326.15863 lakhs sanction min pe tawh a. Material Component atangin Rs.2207.00 lakhs kan hmu tawh bawk., a ti.

Vawiina MGNREGA Press Conference ah hian RD&A Hotute - Commissioner & Secretary R Zarzosanga, Addl.Secretary V Lalengmawia leh senior official te an tel a ni.

PRESS STATEMENT

Mahatma Gandhi National Rural Employment Guarantee Scheme (MGNREGS) hi Rural Development & Administration Department hnuaia Scheme lian ber ti ila, kan sawi sual awm lo e. Kan hriat theuh angin, kum 2005 khan National Rural Employment Guarantee Act chu India Sawrkar in siamin, thingtlang a chhungtin tinte hnena ni 100 tal inhlawhna pek chu mipui te chanvo (entitlement) ah a rawn siam a nih kha. Mipui lam leh Sawrkar lam pawhin, tih tur (duty & responsibility) kan nei tih hre thar leh theuh ila, a tha awm e.

1) MIPUI CHANVO (ENTITLEMENT)

Mipui ten MGNREGA hnuaia chanvo kan neih, a pawimawh zual te han sawi ta ila:

a) Ni 100 inhlawh: Thingtlang mi tupawh Job Card nei, India khua leh tui, kum 18 tling chin chuan ni 100 inhlawh na ah hian a thawk thei a ni.

b) Ni 15 chhunga Direct Benefit Transfer hmanga hlawh pek: Mipui ten inhlawhna pawisa hi Muster Roll siam fel anih hnu (closure of Muster Roll) atanga chhiara ni 15 chhungin an bank account ah Direct Benefit Transfer hmang-in an dawng ngei ngei tur a ni.

c) Job Card: Thingtlang mi, tupawh, India khua leh tui, kum 18 tling chin te chuan an VC te hnenah Job Card hi an dil thei a. Lehkha pawimawh zawng zawng a neih kim chuan Job Card hi an dawng ngei tur a ni. Tichuan ni 100 inhlawhna an thawk ve thei ang.

d) Worksite Facilities: MGNREGA hnuaia ni 100 inhlawhna a thawk te hian, an hnathawhna hmunah tui in tur thianghlimte, First Aid kit te leh an chhun chawlhna tur daihlim (shades) te an nei tur a ni a. Hmeichhe nau pawm te pawhin hna an thawh ve theih nan, nau awmtu ‘Mates’ te hman thin tur a ni.

2) MIPUI TE TIH VE TUR

Mipui ten chanvo (entitlement) kan neih rualin, tih tur leh mawhphurhna (duty and responsibility) kan nei ve thung tih hre nawn ila. Mipui ten kan tih tur langsar zualte:

a) Nikhata darkar 8 hna thawh: Mipui ten chanvo (entitlement) kan neih rual hian, ni 100 inhlawhna scheme ah hian mipui ten mawhphurhna leh tih tur (responsibility) kan nei thung tih hi kan hriat let a pawimawh hle. Ni 100 inhlawhna Scheme ah hian, mipui inhlawh duh te chuan nikhatah darkar 8 (riat) tal hna an thawh a ngai a. Darkar 8 (riat) thawh tlin loh chuan nikhatah tun-a Wage rate hman mek, Rs.281/- hi an hlawh kim thei lo a ni

b) Gram Sabha rorel naa taima taka tel: Village Employment Council ten Annual Action Plan leh Labour Budget sawihona leh Social Audit atan a Gram Sabha an koh chu thahnem ngai takin Gram Sabha rorel naah an tel ve thin tur a ni.

c) Social Audit taima taka neih: Social Audit te mahni veng chhung/khaw chhunga neih anihin, taima takin mipuite Social Audit ah an tel ve a ngai.

d) Dik taka ni 100 inhlawhna thawh: Ni 100 inhlawhna Scheme hi India Sawrkar in uluk takin State hrang hrang te min vil uluk hle a. Hnathawh dawn tan tirh a, National Mobile Monitoring System (NMMS) hmang-a hnathawk Attendance lak leh an thawh zawh-a Attendance lakah te dik tak-a kan kalpui chhoh a tul ta hle mai. Zing lama Attendance a mi 20 thlalak kha, tlai ban dawn a mi 20 an tlin leh loh emaw, midang hmel daih te a lo lan khan kha mi ni a inhlawhna kha Reject theih a ni a. Reject anih chuan thawk lo ang in kan lang dawn a, hlawh kan nei thei dawn lo a ni.

3) VC/VEC TE MAWHPHURHNA

VC/VEC te hi MGNREGA hnuaia thawktu pawimawh ber te zing a mi an ni a. An fel leh fel loh thleng in Mizoram State pawh kan mawi in kan mawi lo thei a ni.

a) Job Card pek chhuah: VC/VEC ten mahni khua a Job Card dil thar te chu, Aaadhar Card leh Bank Account an neih chuan rang tak-a BDO/Programme Officer hnenah dil pui vat tur a ni a. Aadhar emaw, Bank Account emaw, a pahnih a an neih loh chuan neih tir dan an ngaihtuah pui vat vat a ngai a ni.

b) Job Card update chungchang: VC/VEC te hian MGNREGA hnuaiah hian mawhphurhna an nei tam hle a. Mahni khua/veng theuh-a Job Card te regular takin an update thin tur a ni. Mipuiin an hlawh lak dan, a ni leh thla leh hna hming bakah an hlawh lak zat chiang takin hnathawh anih apiangin lo update ve thin tur a ni.

c) Seven Register chungchang: VC/VEC ten Seven Register te felfai taka an vawn hi an mawhphurhna a ni a. Job Card Register te, Work Register te, Asset Register te leh Register pawimawh dang te pawh uluk takin an vawng thin tur a ni. Hriatthiam loh an neih chuan mahni bialtu BDO emaw, BDO Office a thawkte zawh i ching ang u.

4) NI 100 INHLAWHNA NEIH DAN LEH ACHIEVEMENT HRANG HRANG TE:

a) Labour Budget: Kum kalta Financial Year 2024-2025 chhung khan Ministry of Rural Development in Labour Budget min approve sak zat chu 213 lakh person days a ni a. Tichuan, nikum chhung khan ni 100 inhlawhna kan siam thei a. Wage Component atan Rs.59158.0797 lakh hmuh a niin, Material Component atan Rs.913.61 lakh hmuh a ni bawk.

b) Kumin Financial Year kal mek-a MGNREGA hnuaia achievement kan neih hrang hrang te:

Sl.No Parameters Achievements

1 Aadhaar Seeding 99.99%

2 ABPS 99.56%

3 FTO generation T+8 98.97%

4 Work Completion Rate 97%

5 Area Officer Visits 100%

6 Registration of Workers’ Mobile No 93.75%

7 Verification of Job Cards 99.59%

8 Janmanrega Registration Nos 168957 (Highest in the country)

c) Convergence: Kum kalta Financial Year 2024 – 2025 chhung khan mumal takin MGNREGA hnuaiah ‘convergence’ kalpui leh a ni a. Department leh Scheme hrang hrang 13 (thirteen) te nen convergence neih niin, MGNREGA atangin Rs.482.58 lakhs leh Department/Scheme hrang hrang atangin Rs.260.04 lakhs hman niin, a vaiin Rs.742.62 lakhs lai ‘convergence’ hnuaiah thingtlang mipuite tan ‘assets’ tangkai tak tak siam a ni. Kumin Financial Year 2025 – 2026 kal mek ah Department leh Scheme hrang hrang 17 (seventeen) te nen ‘convergence’ hmang a thawh ho tum mek a ni bawk.

d) Project Rotling: MGNREGA – Project Rotling - Hmasawnna Rahbi Thar hnuai atangin thingtlang mipuite hmasawnna tur Project 15 (fifteen) lai kalpui mek a ni bawk.

5) MINISTRY ATANGA KALPHUNG TIH DANGLAM

a) Ni za inhlawhna, a tak taka thawh ngai: Ministry chuan MGNREGA hnuaia inhlawhna hi a tak taka kalpui a, hna kan thawk tak tak a ni tih lan tir theihna tur Mobile Apps NMMS atangin hnathawh tan tirh leh ban dawn ah Attendance a capture vek turin State tin te thurawn a pe a. Hnathawh tan tirh a mihring 20 kan lan chuan, hnathawh tan tirh a mihring 20 te vek kha ban dawnah NMMS hian a capture leh a ngai a. Mihring ngai vek an lan loh chuan reject tur niin, hnathawk lo ang ah kan awm dawn a, hlawh pawh kan nei thei dawn lo a ni. BDO leh MGNREGA hnuaia VLAA, Technical Assistant, Barefoot Technician te leh Mates te bakah VC/VEC leh mipui ten hei hi pal zam mai lo in, thahnem ngai taka dik tak leh fel fai taka ni 100 inhlawhna kan kalpui a ngai tak zet zet tawh a ni.

Ministry of Rural Development hian NMMS hi ngai pawimawhin, he Mobile Apps atanga Attendance te hi ram pum huap a kalpui tur tiin, khawi State mah hi ngaih hna thiamna (exemption) kan pe dawn lo a, dik lo taka hnathawk leh attendance capture thin te lakah pawh Zero Tolerance Policy kan apply a tiin leh hre reng chung-a ti sualtu chungah na taka action la turin State zawng zawng min rawn ti a ni.

Sawrkar laipuiin, ni 8, July 2025 a State tinte hnena lehkha, No.J-11060/2/2021 RE-VIPart (I) (390039) a thawn hi engatinge ni 100 inhlawh naah a pawimawh em em kan tih chuan, Sawrkar laipui hian, village level a ni 100 inhlawhna a Muster Roll a attendance leh thlalak upload te chu an inhlawh ni tlai ban la la in, za a za in a dik em tih an check vek a ngai a, chutiang bawkin Block level ah BDO leh a staff ten, Muster Roll a thlalak leh attendance te chu inhlawh zawhni tuk ah 20% tal emaw, thlalak leh attendance 200 tal an check a ngai a, District levelah pawh Project Director in thlalak leh attendance 100 tal emaw, 10% emaw tal a check a ngai a, Project Director hnuaia staff ten thlalak leh attendance 200 tal emaw 10% tal an check a ngai bawk a. Chutiang zelin State level ah Commissioner in thlalak leh attendance 20 a check a ngai a, RD hnuaia permanent staff leh Contract Staff ten 200 ve ve tal emaw 5% tal an check chhuah vek a ngai bawk.

Hnathawh tan tirh-a thlalak leh tlai ban dawn a thlalak te a in an loh chuan, lo accept (pawm) mai kha a ngam awm ta lo a. Thlalak dik lo leh attendance dik lo, lo accept (pawm) tu an awm chuan, a accept (pawm) tu khan mawh a phur tawh dawn a. Dan ang-a hrem mai tur tiin Sawrkar laipui chuan min rawn ti a. Chuvangin, eng level ah pawh kan thawh ho tlan a, mar pat a kan tan tlan a ngai a ni.

b) Land Development hna chungchang: Land Development hi mimal huanah kan ti nasa hle a. Asset tha tak tak pawh kan siam nasa hle. Amaherawh chu, Para 7.5.7 of the MGNREGA Annual Master Circular 2024 – 2025 in a phut angin, MGNREGA hnuaia land development hna hi, cultivable land ni lo, ram chhia leh kalsan tawh hmun te chei that nan-a thawh tur a ni a. Mimal

ram tha lai leh thlai chin nan-a hman lai ram te hi thawh phal a ni lo a ni. Tin, mimal ram chhia

leh ram bua te cultivable land a siam tur-a thawh sak bakah, mipui vantlang ten an chhawr

tangkai theih tur community land development lam ah kan in thlur bing a ngai hle. Sawrkar

laipui pawh in, he lehkha No.J.11017/2/2023-RE-VII(386093) hmangin, ni 16 June 2025

khan State tinah Advisory a thawn nghe nghe.

c) Job Card Verification chungchang: Job Card hi chhungkaw khatah pakhat chauh neih phal a ni a. Chhungkaw thuhmun atanga job card pakhat aia tam neih tum ten, Ration Card an split tir thin tih te pawh hriat a ni a. Chhungkua, in danga cheng kan nih loh chuan job card hi chhungkaw khat atangin pakhat zel bak a neih theih loh tih hi mipui ten kan hriat thar leh a tha hle.

d) MGNREGA hnuaia hnathawh theih hrang hrangte: MGNREGA hnuaiah hian hnathawh theih hlawm lian hrang hrang category 4 a awm a. Chung Category 4 atang chuan hnathawh theih 266 a awm thung. Annual Master Circular 2024 – 2025 mil lo a hna thawh hi Department pawhin kan tum lo a. Act in a sawi leh Annual Master Circular 2024 – 2025 in a sawi ang a dik tak leh fel taka hna kan thlan theih nan VC/VEC leh NGO te, mipui te thawhpuiah ka sawm nghal che u a ni.

Tun dinhmun ah hian Mizoram ah Job Card 212517 a awm mek a, chhungkua 212517 kan awm tihna a nih chu. Heng Job Card nei chhungkua 212517 atangin hnathawk thin (Workers) hi 2,33,536 an awm bawkin, hmeichhe hnathawk thin (Workers) 1,20,276 an awm bawk. Theihtawpin mipui tan Department chuan thawh zel a tum a. Chumi kan tum ti hlawhtling tur chuan mipuite thawhpuina ka rawn nghen nghal bawk a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]