AMC Corporator David Zohmangaiha'n YMA Quiz-a champion te chawimawina hlan

Aizawl | July 24, 2025: Central YMA LBS Suzuki 1st Inter Branch YMA Quiz 2025 inelna a pakhatna Republic Veng Branch YMA aiawh a tel Lalbiakfela leh R Zomuanpuia te chu AMC Ward XVII Corporator David Zohmangaiha chuan ni 23, July 2025 zan khan chawimawina thuziak a hlan a, he chawimawina hlan inkhawm hi Republic Veng Branch YMA President L Ramdinliana Renthlei chuan a kaihruai a ni.

Chawimawina hlan huna thusawitu David Zohmangaiha chuan, "Central YMA in YMA member ten YMA history leh YMA chanchin zau zawk a kan hriat theih nan leh thalaite inelna tura Quiz tha tak buatsaih nachang a hria hi lawmawm ka ti hle a, mipui pawhin kan hlut hle a ni. He quiz avang hian YMA member ten hlawkna thahnem tak an chhar ka ring a, a bikin quiz a tel te phei chuan nasa takin an hlawkpui ka ring a ni. He quiz hi Mizo nunzemawi kan zirna kawngah te, YMA hlutna kan hriat belhna tur kawngah te thalaite zingah ngaihtuahna thar siamtu nise ka duh hle a, thalaite zingah nghawng tha zawk rawn chhuah se ka duh hle a ni."a ti.

LBS Suzuki Inter Branch YMA Quiz inelna 2025 hi ni 1, July 2025 khan tan a ni a, ni 11, July 2025 khan final khelh a ni. Final-ah hian Vaivakawn branch, Chhiahtlang Kawnveng Branch leh Republic Veng Branch te an intihsiak a Republic veng pakhatna an ni a, Vaivakawn pahnihna niin Chhiahtlang Kawnveng pathumna an ni. Pakhatna hian lawmman Rs. 1,00,000 leh Trophy an dawng a, pahnihna in Rs. 70,000 leh Trophy leh pathumna in Rs. 50,000 leh trophy an dawng a ni.

Inter branch YMA Quiz 2025-ah hian khawpui chhung leh khawpui pawn atangin branch YMA 58 an tel a ni.