YMA DAY THUCHAH
A hmasa in tlang hrang hrang a YMA hruaitu leh ka member puite leh ramchhung leh rampawn a mizofa awm zawng zawngte YMA Day vawi 90-na chibai ka buk a che u. YMA Day hlim taka hmang turin duhsakna ka hlan a che u. YMA din tirh Kum 1935 atanga vawiin thleng hian YMA ropuina leh Mizofate tana a hlutna hi a ropui zual zel a. Hun lo inher danglam ang zelin YMA pawhin hma a sawn chho zel a, tunah chuan YMA hi Branch 821 awm mekin Group 50 leh Sub-Hqrs 8 niin member pawh 5,00,000 lai kan lo tling ta a ni.
YMA dinna leh innghahna, ‘Tanpui ngaite tanpui’ kawngah pawh ke kan pen zel a. Kumin YMA Day denchhen hian, Central YMA chuan Home/Centre leh Hospital hrang hrang bakah zoram pawn a Mizo Welfare hrang hrang te ah luahchhuahna a nei leh thei a. Heng bakah hian SubHqrs YMA leh Group YMA te pawhin an mahni huamchhung ah theuh chanhai leh tanpui ngaite tan an luangchhuak leh thei te hi a ropui in, YMA hlutna tizualtu niin ka hria a.
YMA hi NGO pakhat mai a nilova, hnam innghahna lungphum, Mizote min phuarkhawmtu, a tul ang zela Ram leh Hnam tana ke pen thin a ni a. Thlei bik a nei lova, a te ber atanga a lian ber thleng hian angkhat in YMA hian min hrut rual vek a ni. Mizoten YMA kan lo nei hi kawng tinrengah kan vanneihpui hle a, hnam dang pawhin hetiang pawl ang hi neih ve theih an chakin an rawn zir fo thin a, an awt em em a ni. Tunlai thangthar zingah YMA hlutna hrefiah zolo te pawh awm ve palh theih a ni, chuvang chuan a tul ang zel a kan inhrilhfiah te pawh a tul awm e.
YMA hian Mizoram chhung chauh nilo, India ram zau zawk ah te pawh hriat a hlawh ta hle a. Pawl lar tak a nihna hi a zual zel niin ka hria.Ramngaw leh Nungcha humhalh, Ruihhlo Do leh Faina kawnga hmalakna ah te India rama chawimawina sang dawng thei khawpin YMA hmalakna te hian hriat alo hlawh ta a, a lawmawm tak zet a ni. Ram tana thil tha tih hi chhunzawm zel ila. YMA ten lawmman beisei vang nilovin, kan ram leh kan hnam tan hma la zel turin kan inchah a ni.
A tawp berah chuan kan mihring puite tana kan phak tawk theuh a that chhuah leh thil tha tih hi a Pathian thu in a YMA em em a ni. YMA Day denchhen hian sum leh pai a ni emaw, ei leh in tur a ni emaw, thisen pek a ni emaw, a tul ang leh kan rilrua a lan ang zelin YMA member tin ten thil tha engemaw tal tih nan YMA Day hi hmang tangkai ila, ram leh hnam tan intuaitharna NI-ah i hmang ang u.
Ka lawm e
Lalhmachhuana,
President
Central YMA
Dated Aizawl, The 15th June, 2025
• • • • • •
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: