Ruihhlo ngaite enkawlna - Hulhliap Short Stay Centre kalpui tan

Aizawl | June 23, 2023: Mizoram Sawrkar, Mizoram Synod leh Tlawmngai pawl te tanghoa buatsaih Ruihhlo ngaite enkawlna - Hulhliap Short Stay Centre Batch 1-na chu vawiin tang khan Synod Revival Camping Centre, Neihbawih Sihphir-ah kalpui tan a ni.

Central YMA kaihhruainain Central YMA Office, Tuikhuahthlang leh Bawngkawn YMA Hall atang Bus-in Hulhliap Short Stay Centre a awm duh te chu phurh chhoh an ni a. Mi 150 Chuang batch 1 na atan lak phawt a ni.

Pathian hnena hlanna programme chu Synod Revival Camping Centre Chapel ah neih ni in Synod Revival Department Director Rev JC Lalramliana chu Chairman niin a kaihruai a, Hulhliap Core Committee Member Secretary Dr Lalhriatzuali Ralte, IAS in Hulhliap Short Stay Centre report a pe a. Hulhliap Core Committee Chairman Malsawmzuala Ralte pawhin thu sawiin zoram mipui te kan tawngtaina a let khata tipung turin a sawm a ni.

Social Welfare leh Health & Family Welfare Minister Lalrinpuii chuan Kohhran leh Tlawmngai pawl te chungah lawmthu sawiin he Hulhliap Short Stay Centre hian kan unau ruihhlo bawih a tang mek te tan nunthar an neih theihna hmun a nih ngei theihna turin tawngtaina lamah kan hriat zui zel a pawimawh a ti.

Pathian hnena a hlanna hun hi PCI Mizoram Synod Executive Secretary Rev Dr K Lallawmzuala'n a nei a, Thim thiltihtheihna aiin Eng thiltihtheihna chu a chak zawk a, he Hulhliap Short Stay Centre hi a hlawhtlin ngei theihna turin tan la tlang zel turin kalkhawm te a sawm bawk a ni.