Ramthar Veng Aptitude Challenge Examination 2025 (RACE 2025) lawmman sem

"Hlawhchham chang a awm pawha tumruhna nen theihtawp chhuah ngam thinte hi mi hlawhtling an ni," ~ Dr Vanlalthlana

Aizawl | June 28, 2025: Nizan khan Ramthar Veng Branch YMA-in an buatsaih Ramthar Veng Aptitude Challenge Examination 2025 (RACE 2025) lawmman semna hun Ramthar Veng Presbyterian Kohhran Hall-a hman a ni a, Education Minister Dr Vanlalthlana leh Education Minister lo ni tawh H Rohluna ten an telpui.

School Education Minister Dr. Vanlalthlana chuan, mi tumruh ten hlawhtlinna an chang thin a, khawvel huapa mi lar leh hmingthangte pawh hi hlawhchhamna tam tak lo nei tawh thin an lo nih tawh thu sawiin zirlaite chu nasa taka lehkha zir tura fuihin, kawng tinrengah hlawhtling thei vek lo mahse, mahni nih tumah chiang turin a fuih a. "Hlawhchham chang a awm pawha tumruhna nen theihtawp chhuah ngam thinte hi mi hlawhtling an ni," a ti.

Dr Vanlalthlana chuan, Ramthar Veng Branch YMA in zirna lama veng chhung hmasawnna tur thil an ti chu a chhuan thu sawiin, hetianga hun tha YMA in a buatsaih thin hi pumpelh lo turin zirlaite chu a fuih a. Branch YMA thiltih chu veng bil mai ni lo, ram tan pawh chhen fakawm a la nih ngei a beisei thu sawiin, rah tha tak a chhuah ngei a beisei thu a sawi.

Ramthar Veng Branch YMA hian an vengchhung zirlai naupangte tan Aptitude Examination hi buatsaihin zirlai 300 chuangin exam hi an bei a. Vengchhung nu leh pa ten sum an thawh tling khawm (Rs.2,09,900/-) atangin lawmman tha tak buatsaih a ni. Zirlai exam beitute chu School lama an pawl san dan milin Category 4 (pali) ah then an ni a. Question pawh OMR hmanga chhan tura buatsaihin category hrang hrang tan a hranga siam a ni.

Lawmman pakhatna chu:

Category I ah Rs.5,000/-

Category II ah Rs.5,000/-

Category III ah Rs.8,000/-

Category IV ah Rs.10,000/-

te a ni.

Category tina Top 10 in Trophy mawi tak an dawng vek a, 1-na atanga 5-na ten Trophy bakah sum fai an dawng vek bawk a ni.