Mizoram Governor hovin International Day of Yoga 2025 lawmna hun hmang

Aizawl | June 21, 2025: Khawvel hmun dangte rualin Mizoramah International Day of Yoga 2025 leh a tum 11-na ni bawk chu, 'Yoga for One Earth, One Health' tih thupui hmanga lawm a ni a. National AYUSH Mission, Directorate of AYUSH bultumin Mizorama a lawmna pui ber chu tukin khna Rajiv Gandhi Stadium, Mualpui, Aizawlah neih niin, Governor, General (Dr) Vijay Kumar Singh, PVSM, AVSM, YSM (Retd) leh Lady Governor Pi Bharti Singh te chuan hmanpuiin, he hunah hian mi 700 vel an tel a ni.

International Day of Yoga puala thu a sawiah Governor, General (Dr) Vijay Kumar Singh (Retd) chuan India ram atanga bultan leh chawilar, yoga-in khawvel pum a dengchhuak leh hleibik nei lova ngainatu an pung zel chu lawmawm a tih thu sawiin, hemi pual liau liaua ni bik 'International Day of Yoga' kum tina hman a ni chu India ram tana chhuanawm leh chhinchhiah tlak tak a ni, a ti a. Yoga chu taksa, rilru leh ngaihtuahnate tha taka thlunzawma hriselna tha thlentu a nih thu sawiin, yoga exercise hrang hrangte chuan taksa leh rilru hrisel nan tinzawn leh hnathawh dan bik an neih hran theuh a ni, a ti bawk.

Governor chuan yoga awmzia leh kalpui dante tarlangin, yoga chuan awmze nei taka taksa sawizawi, boruak tha hip luh leh ngaihtuahna sawrbingte a huam thu a sawi a. Dan dik taka yoga tih chuan hriselna a thlen rualin, tihdan dik tawk lo erawhin nghawng tha lo a thlen theih thu sawiin, yoga ngainatute chu AYUSH hotute leh mithiamte atanga inzir hmasa thin turin a chah a. Mizoram chu boruak thianghlim tamna a nih thu leh hei hian taksa leh rilru hriselna kawngah hlawkna tam tak a thlen thu sawiin, yoga exercise uar zawka kalpui kawngah pawh tangkaina a neih ngei a beisei thu a sawi bawk.

He hunah hian India ram puma International Day of Yoga lawmna pui ber, Vishakapatnam, Andra Pradesh-a Prime Minister thusawi ngaihthlaka thlir ho a ni a. Hemi hnu hian Common Yoga Protocol hmangin kalkhawm zawng zawng te'n a huhovin Yoga Instructor-te kaihhruaina hnuaiah yoga exercise chi hrang hrang lain, taksa leh rilru sawizawina hun an hmang a. Dr. SR Ngurchamliana, Director, Hospital & Medical Education, Health & Family Welfare Department chuan lawmthu sawiin hun hman hi a khar a ni.

Ministry of AYUSH chuan International Day of Yoga 2025 hman dan tur signature event 10 duangin, Mizoramah chuan heng zinga pahnih - Yoga Sangam leh Harit Yoga-te hi kalpui a ni a. Yoga Sangam hian a ruala a tam thei ang ber yoga neih a entir a. Harit Yoga hian he ni denchhena thing leh mau leh luidungte humhalha tihfai a entir a ni. He ni pual hian Mizoram hmun hrang hrangah thing phun niin, Directorate of AYUSH chuan a duh apiangte tan ramhmul damdawi tiak an sem chhuak bawk.

Kumin atana thupui thlan ‘Yoga for One Earth, One Health' tih hian yoga exercise thatna lam ringawt thlurbing lovin, environment humhalh lam ngaihpawimawh tel a kawk a. Mimal hriselna mai piah lamah, kan chhehvela thil nung leh sik leh sate nena inkungkaihna tha leh hrisel vawnnun a tum a ni.

International Day of Yoga pual hian Mizoram Duatrict hrang hrang, District Hospital, Health and Wellness Centre, Zirna in, pawl hrang hrang leh Department-te'n mahni hmunhma remchangahte hun an hmang bawk.

Written by -

Lallawmkima, MIS

IPRO

DIPR