Aizawl | June 21, 2025: Kum 1950 hmalama Aizawla inbengbel tawh, an tu leh fate'n V. Thanga In, Dawrpuia an din Aizawl Mihlun Thlahte chuan Inkhawmpui Lian 'HIGH COUNCIL' chu I&PR Conference Hall-ah an hmang a, mi za tel an pungkhawm. Aizawl lal lo ni tawh Lalsavunga Sailo tuchhuan leh Aizawl Mayor Lalrinenga Sailo chuan Khuallian niin a hmanpui.
Aizawl Mayor chuan, "Aizawl Municipal Corporation-in Aizawl mipuite tana hmasawnna kawng hrang hranga, an thawhna leh mipuite thlawpna avangin Aizawl khawpui hmel thar kan hmu chho mek a ni," a ti a. Aizawl neitu Aizawl Mihlun Thlahte'n an rawtna anga AMC huaihawta Aizawl mipui huapa 'Aizawl Day' hman pawhin hlut a hlawh chho zel tih sawiin; Aizawl hmasawn zelna atan an ngaihtuahna seng chhunzawma, finchhuah zel turin Aizawl Mihlun Thlahte a sawm.
High Council hi an pawl Vice Chairman John Rotluangliana Ex-Minister chuan a kaihruai a. He pawl Chairman K Liantlinga Ex-MLA chuan Presidential Address sawiin; Dr Vanlalruata Treasurer chuan pawl sum dinhmun report a pe a, an pawl General Secretary V Lalnunthara (Mathara) report danin; Aizawl Mihlun Thlahte-ah hian member 1,500 an awm mek a, kumin chhunga an member, Ropuina a Kaisang mi 17 te Hriatrengna hun an hmang bawk a, High Council Rorel neih zui a ni.
HIGH COUNCIL RORELTE
1. Aizawl Mihlun Thlahte pawl hming chu a hming ngai anga kalpui zel nise tih a ni.
2. Aizawl Mihlun Thlahte-a tel thei chin, kum bithliah chu a ngaiin; kum 1950 hmalama Aizawla inbengbel chin te a huam ang.
3. Kum 2024 - 2026 Term chhunga pawl anga kan Project atan Krismas Charity neih chu lungrual taka pawm a ni.
4. Membership chungchang kan sawihova, kan kal dan pangngai a kal tha kan ti a. Annual Membership Fee hi kum tin ₹200/- a khawn zawm a ni ang a. Life Member leh Patron Member tan khawntesep a awm lo thung ang.
5. Assam Rifles chhuahsan ram enkawl zui zelna leh tihhmasawn tura Mizoram Sorkarin a din, Advisory Committe-ah Aizawl neitu kan nih angin awka neih ve tha in kan hria a. Aizawl Mihlun Thlahte aiawh 1 telh ve tura Mizoram Sorkar ngen nise kan ti.
6. Aizawl Mihlun Thlahte Thalai Pawl (Youth Wing) din tha kan ti a, Executive Council bawhzui turah kan dah.
7. High Council Agenda a lut, pawm anih loh chuan; Agenda a lut leh turin kum 3 tal nghah nise tih a ni.
• • • • • •
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: