Lungleiah thuthar thehdarhtute tan tun lai thiamna ruala hma sawnna tur leh Mizo ṭawng hman dan dik zir hona buatsaih

Lunglei | June 24, 2025: Directorate of Information & Public Relations (I&PR) leh Mizoram Journalists' Association (MJA) General Headquarters te ruahmanna zuiin, Lunglei District I&PR Office leh Lunglei District MJA ṭang kawp chuan vawiin khan Lunglei Press Club-ah Lungleia thu thar theh darhtu (media)-te tana tun lai thiamna ruala hma sawnna tur leh Mizo ṭawng hman dan dik zir hona, 'Media Workshop' an buatsaih.

He zir honaah hian I&PR-a thawkte, MJA pawl mite, Akashvani Lungleia Aaj Subah thu thar puangtute, Zonet JB-a chanchin thar buaipuitu leh puangtute, Doordarshan Kendra (DDK) tana thu thar la khawmtu leh youtube-a thu thar theh darhtute an tel a. Lunglei District MJA President H Lalthansanga chuan inkhawm kaihruaiin, zir hona buatsaih a nih dan leh inlawmna thu a sawi a. Prominent Journalist CS Chawngchhuma'n hunserh a hmang a. Zir hona leh sawi hona buatsaih chhunzawm niin, Lunglei District MJA Information Secretary F Lalngaihzuala'n chanvo bil neiin, kal khawmte a chawk hlim a. MJA member H Vanlallawma'n ṭawngṭaiin hun a khar a ni.

He media workshop-ah hian Vanneihtluanga ziak, "Traditional media leh new media" tih chu Lunglei District Information & Public Relations Officer C Lalhruaitluanga kaihhruaia zir ho niin, thu thar theh darhna hmanrua leh kalphung danglam zel dan leh tun lai thiamna ruala ṭha, ṭangkai leh hlawk zawka media-te hma sawn theih dan turte zir ho a ni a. Dr H Laldinmawia ziak, "Mizo ṭawng ziah dan dik" tih chu Lunglei District MJA Treasurer K Lalrinpuia kaihhruaia zir ho ni thungin, thu thar theh darhtu leh puangtute'n dik taka Mizo ṭawng ziak leh sawi a pawimawhna leh Mizo ṭawng humhalh a pawimawhna te, ṭawng hman sual leh hman dik loh langsar zual leh a dik zawkte zir ho a ni a. He'ng thupui hmang hian sawi hona hun hlawk tak hman a ni bawk.