ISUAN I RITPHURH CHU PHURHPUI CHE A DUH

_Tihdanglam tawh_

By Rick Warren 

— June 10, 2025

“Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni," a ti a.” Matthaia 11:28-30

I ritphurh chu engnge ni ka hre lo. Engin nge ti chau che tih pawh ka hre lo. Nimahsela ka hriat chu i mamawh chhanna hi a ni

Isuan, “Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni," a ti a. (Matthaia 11:28-30).

Kum tam tak chu helaia Bible thu hi a awmzia ka man lo. A chhan chu nghawngkawl awmzia ka hriat loh vang a ni. Isuan, “Ka nghawngkawl bat ula,” a tih pawh thil dang emaw tak min pe tur angah ka ngai ṭhin a ni. Ka rilru in, "Ka ritphurh hi a rit tawk a ni, Lalpa. Harsatna dang chu phurh belh ka peih tawh lo" ka lo ti ṭhin a ni!

Ka han zirchiang a nghawngkawl chu bawng pahnihin a ruala bat duna, tawlailir an hnuh theih ang chi hi a lo ni zawk a ni tih ka hre ve ta.

Nghawngkawl chuan phur a ti zang sawt a lo ni a nih chu. Nghawngkawl tello chuan bawng pakhatin rit takin phur chu a phurh vek angai dawn a. Nimahsela nghawngkawl chu bawng dang nena an phurh dun chuan a zahve in phur chu a zang dawn a ni.

Isuan ka nghawngkawl bat ula a tih hian kan phur hi a ti rit belh dawn lo va. Eng harsatna mah Isuan phurhtir tur che a nei lo. I ritphurh kha a phurhpui zawk dawn che a ni. I manganna leh harsatna te pawh tawrhpui chein amahah a inbel ve zawk dawn anih chu.

A va mak em!

Isuan thil pathum pawimawh deuh deuh a sawi a:  Lo kal la, Zir la, La rawh tihte hi anni. Lo kal la a tih hian i thawk dun ang a tihna a ni a. Tichuan ka tihdan zir la, tichuan i phur pawh a zang ve sawt ang a tihna a ni. Hei hian i phur a ti zang dawn a. I nun kalzelnaah thil ṭangkai tak a lo ni dawn ta a ni.

Isua nena nghawngkawl in bah dun chuan, amah nen in che rual zel ang. I kalna leh in kal chak zawng pawh a inang tawh ang.

Ngaihtuah zui atan

* Engvangin nge Isuan i harsatnate phurpui che a, chhawk zangkhai che a tum laiin nangin harsa ila tih fo?

* Eng harsatna nge nangmahina i phurh mek hi? Isuan i ritphurh chu phurh pui che sela engnge a danglamna ni ang?

* Isuan i harsatna zawng zawng a hria. A nghawngkawl bat tur chuan i inpeih em? I la inpeih loh fo chuan, engin nge ti khawmuang che?

*[Lettu: Sangpuia]*