IPRP&S Minister-in Chanchinbumite tana buatsaih Media Workshop a hawng

Aizawl | June 23, 2025: Information & Public Relations, Printing & Stationary Department changtu Minister Dr. Vanlalthlana chuan I&PR Auditorium, Treasury Square-ah, Mizo Language Development Board bul tuma Information & Public Relations, Printing & Stationary Department-in Chanchinbu mite tana a buatsaih, thuthar lakkhawm dan leh Mizo tawng ziah dan chungchanga zirhona (Media workshop for Journalists) chu vawiin khan khuallian niin a hawng.

Thlalak dang: HETAH

Hawnna inkhawmah hian khuallian IPRP&S Department changtu Minister Dr. Vanlalthlana chuan thusawiin, Chanchinbumite leh sawrkar chu inzawm tlat an nih avangin, Chanchinbumite tana workshop buatsaih a ni chu lawmawm a tih thu a sawi a. Chanchinbumite chu mipuite hnena thuthar an lak khawmnaah, a chin chhuaka chhui thin turte, awn lam nei lo va chik taka thute chhuah thin turtein a chah a. Inchhiarzau zel tur leh inzir thar zel tura fuihin, tum reng vang ni hauh lo pawha mipuite thinlunga thil tam tak tuh thei an ni tih inhre reng turin a chah a. thudik tak mipuite hnena thlen kawngahte, tawnghmang dik leh ziah dan dik mipuite hnena zirtir kawngahte mawhphurhna pawimawh tak an nei tih inhre reng tura fuihin, hlawkthlak taka Zirhona chu hmang turin kalkhawmte chu duhsakna a hlan nghal bawk a ni.

Workshop-ah hian Mithiamte hnen atangin thupui hrang hrang Media chungchang leh Mizo tawng ziah dante presentation hmanga zirtirna ngaihthlak a ni a. Chawhnu lamah I&PR Joint Director Mina Zoliani kaihhruaiin heng thupuite hmang hian sawihona hun hlawkthlak tak neih nghal a ni.

Vawiina Workshop hawnna hi I&PR Department Director C Lalnunkima chuan kaihruaiin kalkhawmte lawmna thu a sawi a. khualzahawm IPRP&S Department Secretary Bethsy Zothanpari Sailo chuan thusawiin, Chanchinbumite chu thu dik leh rintlak chauh chhuah thin turte, mipui leh sawrkar tana hriatna hnar leh inzirna tlak nih tum zel turtein a fuih a. MJA President C Lalrambuatsaiha pawhin thusawiin, sawrkar leh Chanchinbumite thawhona tha tak chu lawmawm a tih thu a sawi a. Workshop chu hlawkthlak taka hmang turin kalkahwmte chu duhsakna a hlan nghal bawk a. I&PR Department Deputy Director Malsawmsanga chuan lawmthu sawiin hun hi a khar a ni.