"Hlawhtlinna hi hlawhchhamna atangin pen khata hlaah chiah a awm”- Minister Prof Lalnilawma

Mamit | June 19, 2025: MZP Headquarters Mamit buatsaihin vawiin khan Chhimveng YMA Hall, Mamit-ah zirlai titha te chawimawina hun hman a ni a Minister of State Prof Lalnilawma'n a hmanpui.

Vawiin hunah hian Mamit atanga Class 10 leh 12 distinction a pass mi 14, Institution topper mi 2, MES tling mi 3 leh MBBS graduate mi 1 te hnenah chawimawina hlan a ni a, Best School Award hlanna hun hman a ni bawk.

Khual lian chuan vawiin hun a lo kal te hnenah lawmthu sawiin MZP Headquarters Mamit in zirlai titha te chawimawi nachang a hria chu lawmawm a tih thu a sawi a. Minister chuan mi hlawhtling ni tur a pawimawh chu kan duhthlanna(choice) uluk hi a ni a, hei hian nghawng( consequence) thui tak neiin kan hun kal zel tur leh awm dan zel tur a hril a ni a ti a. Hlawhtlinna hi awlsam taka neih theih a ni lo a, theihtawp leh taima taka thawh a hlawhchhuah tur a ni a ti bawk.

Prof Lalnilawma chuan mahni inrintawkna leh kan rilru put dan hian kan nun nasa takin a hruai theih avangin zirlaite chu kan thil thlir dan(attitude) chu a eng zawng thlir turin a fuih a, lehkha chhiar tam turin a ngen nghal bawk. Harsatna tam tak kan nunah kan hmachhawn chho zel dawn a, hlawhtlinna hi hlawhchhamna atangin pen khatah chiah a awm a, hemi avang hian hlawhchham lo a taimakna nen bei chho zel turin a fuih bawk a ni.

Vawiin hunah hian Mamit Addl DC Carolyn LB Khiangte chu Khual zahawm niin zirlaite te tan fuihna thu a sawi a, DEO/DPC Mamit K Lalnunfela chu Khual tha niin MZP General Headquarters President H Lalthianghlima chu Uaptu a ni bawk.

Vawiin zirlai titha chawimawina hun hi MZP Mamit Vice President Lalkroshlua'n kaihruai a, zirlai kalkhawmte zingah ruihhlo do tul dan inzirtirna neih a ni bawk.