CM Lalduhoma hovin Central Anti Drugs Squad te ruihhlo man tiral

Aizawl | June 30, 2025: Tukin khan Central Anti Drugs Squad ten kumin March ni 15 atanga June thla thlenga ruihhlo an man tihralna hun Central YMA Hall-ah an buatsaih a, Chief Minister Pu Lalduhoma'n a hmanpui.

Chief Minister chuan, ruihhlo dona kawngah hian chhungkua leh khawtlang tana mi hnawksak te han dah khawm lailawkna tur kan mamawh a. Chung mite enkawlna tur Home tha, skill training kan kalpui theihna a ngai bawk a. Chuta training chhuak te chu eizawnna bul tan thei tura tanpui a tul bawk. Chutianga ngawlveite enkawlna hi chhawng thum anga kan kalpui chuan mumal leh nghet zawkin kan enkawl dam theiin a rinawm. Chutianga kal dan chu kan dap mek a, Home tha a awm theih beiseiin kohhran hrang hrang te sawrkarin a dawr mek a ni, a ti.

Khawtlang nun siamthatna kawngah YMA te hi kan inghahna in ni a, kan ramin YMA kan nei hi kan vannei em em a ni. Vawiina kan tihral zozai hi man lohvin awm ta se la, min va tichhe nasa dawn tak em. Mamawh tam tak in nei tih kan hria a, ka theih ang angin ka lo tang ve ang. Ruihhlo do leh ngawlveite enkawl dam hi hna harsa tak a nih avangin Pathian rawn chunga kal a pawimawh hlein ka hria, a ti.

Inkhawm tawi kaihruaitu Pu Lalhmachhuana, President Central YMA chuan ruihhlo tihralte chu YMA Anti Drugs Squad ten Police leh Excise lama an hlan bang a nih chu a sawi a, thenkhat hi chu a neituten an tlanchhiatsan te an ni, a ti.

Prof. Malsawmliana, Secretary, CYMA chuan report a pe a. Ruihhlo tihral hi No 4 Heroin hawng 861 leh tictac 1498, Meth kg 10, damdawi tablet 25383, Ganja kg 56, Codein bottle 2805 bakah zu tam tham tak an ni a, Rs. 429.27 lakh man hu a ni. Kumin March ni 15 atangin CADS te hian ruihhlo kaihhnawihah mi 809 an man a, mi 440 councelling an pe a, 37 Home ah an dah a, mi 48 Excise kutah an hlan a, Police kutah 4 an hlan a ni.

Inkhawm tawi neih zawh hian CYMA Office tualah ruihhlo thenkhat hi Chief Minister hian tuiah a chiah ral a. Tihral tur hi a tam tham avang leh khaw chhunga tihral a him loh theih avangin a bang zawng hi CADS member ten hmun dangah an tiral zui a ni.