C Ngunlianchunga'n thiam a chang nge chang lo?

(Rinthui sawi vak vak lovin a nihna i sawi ang u)

~ Zoa Tlau

(18.6.2025 tlai dar 4:50)

Buannel Cabin

Nimin lamah Lawngtlai West bialtu MLA Pu C. Ngunlianchunga chu District Court, Aizawla Special Judge (Prevention of Corruption) Pu F. Rohlupuia hmaah a inlan a. Court chuan MLA hi a case ngaihtuah chhunga tlanbo tur nia a ngaih loh avangin 'bail' a dilna a phalsak a. Kumin July ni 22 hian Court-ah hian a 'case' hi ngaihtuah leh a ni ang.

Lawngtlai West Congress MLA hi hun rei deuh tawh aṭang khan cancer natna avanga inenkawl a ni tawh a, Court hian man kher a ngaihna a hmu lo bawka 'bail bond' lak phalsak a ni.

Thiamthu (Court-ah a chak leh chak loh an ngaihtuah ṭan dawn chauh):

Congress MLA-in nimina a sawi ang chiahin tunah hian he thubuaiah hian thiam a chang tihna a ni lo a, thiam loh chang leh 'convict' a ni tihna a ni hek lo. Thubuai inkhinna hi a la kal dawn chauh a. I buaiin hriat pawlh lo ang u.

Court kalphungah Pu C. Ngunlianchunga hi an puhnaah a fihlim nge thiam loh a chang, tih hi 'trial' la neih chhoh chauh tur a ni a. He thubuaiah hian a chak leh chak loh chu hunin a la hril dawn a, Sorkar lam Lokayukta nen an inkhing chho dawn ta tihna a ni.

'Bail' chungchang:

Helai hi mi tam takin kan hriat fuh loh lai a ni a. A hma khan "thubuai ka nei lo," tiin Pu Nguna hian a sawi lo a, "thubuai ka neih ka hre lo," a ti a ni. Hei vang hian a intiam angin 'Anticipatory Bail' a dil lo a, a dil lo tluan ta zak a. Court-ah a inlan a ni.

Heti hian sawi ang thilsual tia puh an awmin, Police-in an man mai loh nan 'Anticipatory Bail' hi Court-ah an la lâwk ṭhin a ni. Lawngtlai West MLA hi chuan 'Anticipatory Bail' hi a la lo tluan zak a, Court-ah inlanin 'Bail pangngai' a dil nghal angin pek a ni zawk. Sawi buai viau tur a awm lo a, dan tharah phei chuan 'bail' lak ngai lo te pawh a nih theih tih thudawn a ni bawk.

     

Thubuai:

AIR tarlan danin Pu C. Ngunlianchunga hi Anti Corruption Bureau (ACB)-in LADC CEM anih laia Lawngtlai By-Pass Road chungchanga NLCPR aṭanga sum an hmuh chungchangah pawisa tih chingpen avangin thubuai a neih thu an sawi a.

Pu C. Ngunlianchunga chuan kumin March thlaa Assembly ṭhutkhawmah CM Pu Lalduhoma’n a sawichhuah hnuah thubuai hi a hre chiah tih sawiin, Lawngtlai By-pass Road siamna atan a CEM laiin kum 2013-ah cheng vbch 4 sing 7 a rawn chhuak tih sawiin kum 2014 January thlaah Minister anih tak avangin CEM aṭangin a bang a, a hre zui tawhlo tih sawiin sum thianghlimlo cheng khat mah a lak loh thu alo sawi tawh a ni.