𝗨𝗦-𝗜𝗡 𝗜𝗥𝗔𝗡 𝗡𝗨𝗖𝗟𝗘𝗔𝗥 𝗛𝗠𝗨𝗡 3 𝗔 𝗕𝗢𝗠𝗕 𝗩𝗘 𝗧𝗔!

(𝘒𝘩𝘢𝘸𝘷𝘦𝘭𝘪𝘯 𝘣𝘶𝘢𝘪𝘯𝘢 𝘭𝘪𝘢𝘯 𝘻𝘢𝘸𝘬 𝘢 𝘩𝘮𝘢𝘤𝘩𝘩𝘢𝘸𝘯 𝘢𝘯𝘨 𝘦𝘮?)

𝓟𝓱𝓾𝓪𝓱𝓴𝓱𝓪𝔀𝓶𝓽𝓾

~ Zoa Tlau (22.6.2025 zing dar 7)

Buannel Cabin

Donald Trump chuan social media Truth Social-ah U.S chuan Iran 'nuclear site' pathum; lei hnuai thûk tak Fordo bakah Natanz leh Eshahan te a bomb tih a ziak a. "Hlawhtling takin he hna hi hlen a ni," a ti. He US inrawlhna hian eng nge a nghawng ang tih hriat a la ni rih lo.

Trump chuan US-in Iran nuclear site a bomb chu "hlawhtling tak a ni e" a ti a, an leihnuai hmun thûk taka nuclear site an neihna Fordo chu 'full-payload" bomb thlak a nih thu a sawi. Iran media pawhin Fordo beih a nih thu hi an puangzar ve bawk.

Iran hian US a inrawlh vaih chuan thil hlauhawm lutuk a thleng ang tiin a lo vau lawk tawh nghe nghe. US President Donald Trump hian White House aṭangin hriat tur ṭul 'live' in a puang thuai dawn bawk.

Israel leh Iran inbeih ṭan hun kha June ni 13 kha a ni a, kar khat a liam khan Donald Trump chuan Iran nuclear hmun te chhuchhe law law turin US chet chhuah a ngai tih chu a thutlukna a ni tawh a ni. Israel sorkar chuan Tehran-in nuclear ralthuam a siam loh nana bomb a nih thu a puang nghal.

'𝗥𝗮𝗱𝗶𝗮𝘁𝗶𝗼𝗻' 𝗮 𝗽𝘂̂𝘁 𝗹𝗼 𝗮𝗻𝗴:

Iran state broadcasting service deputy director chuan bomb-in a nuaina hmunah hian 'radiation' pût a thlen lo ang a ti. Iran media lam tarlan danin US-in Iran nuclear site pathum a bomb-na hmuna thawk/awm te chu a hmain sawn chhuah an ni tawh a ni.

𝗧𝗵𝗹𝗮𝘄𝗽𝘁𝘂 𝗹𝗲𝗵 𝘀𝗮𝘄𝗶𝘀𝗲𝗹𝘁𝘂:

Republican senator thawm na tak tak ten Trump-a hmalakna hi an thlawp viau a, tih tur dik tak a nih thu X-ah te an ziak a. Iran-in nuclear ralthuam a nei a nih vaih chuan America leh a thurualpui te tân a hlauhawm dawn lutuk an ti a. Ngaihdan a inang vek thei lo a, Senator Thomas Massie, hi Republican zinga Trump-a tharum thawhna sawiseltu hmasa ber a ni a, a party pui sawiseltu hian Trump-a chêt dan chu, 'This is not constitutional' tiin X-ah a ziak.

𝗔 𝗿𝘂̂𝗸𝗮 𝗨𝗦 𝗶𝗻𝗽𝘂𝗮𝗵𝗰𝗵𝗮𝗵𝗻𝗮 𝗮𝗻 𝗹𝗼 𝗵𝗿𝗶𝗮:

Lei hnuai thûk tak verh thei US bomb siam phur thei tura duan US B-2 bomber te chuan Whiteman Air Force Base, Missouri an chhuahsan tih media nghal tak tak ten a rûkin an hria a, an report hman a. US B-2 bomber te hian niminah khan Pacific tuifinriat chungah thlawkin Guam an pan. He chanchin ziah lai hian US hian Iran hi a la bomb lo a, mahse Trump hian tum nghet tak a lo nei tawh thung.

US Air Force KC-135 Stratotanker pariat lâiin Altus, Oklahoma an chhuahsan ve a. Kansas van boruakah B-2 bomber te 'fuel' an thunsak. US defense official te chuan US B-2 bomber te an chet chhuah avang hian Iran an bei dawn tihna a ni kher lo tih nimin chhun lam khan an la sawi ve ṭang ṭang a nih kha. Mahse an inpuahchahna a ni si.

US B-2 bomber te hi Massive Ordinance Penetrator phur thei awmchhun an ni a, Iran lei hnuai 'Fordo Nuclear Facility' tichhe thei tura ngaih niin, pakhat rih zawng hi pound 30,000 a ni a, B-2 hian 2 an phur thei.

𝗜𝗿𝗮𝗻 𝗻𝘂𝗰𝗹𝗲𝗮𝗿 𝗯𝗼𝗺𝗯 𝘀𝗶𝗮𝗺 𝗸𝘂𝗺 2/3-𝗶𝗻 𝗮 𝗸𝗵𝗮𝘄𝘁𝗹𝗮𝗶:

Tun ṭuma Israel-in Iran a beihna hian Iran-in nuclear bomb a neihna tur kum 2-3-in a khawtlai phah tawh tih country, Israeli Foreign Minister Gideon Sa’ar chuan interview-ah a sawi.

June ni 13 aṭanga Iran an beihnaa 'Iranian millitary official' thihna chu Israel-in a hlawkpui hle tih Sa'ar hian a sawi a. Iran nen hian inbiaknain awmzia a nei lo, a ti a. Inbiakna chuan tun hun hi a hruai thleng a ti. Kum 1960 chho aṭangin Iran-in a rûka leihnuaia nuclear ralthuam siam an tumna hmun 3 chu Israel hian a bomb a ni.

𝗜𝗿𝗮𝗻-𝗶𝗻 𝗶𝗻𝗯𝗶𝗮𝗸 𝗿𝗲𝗺 𝗮 𝗱𝘂𝗵, 𝗺𝗮𝗵𝘀𝗲...:

France President leh Iran President an inbia a, Iran lam hian remna zawnga inbiak an duh thu an sawi. Hetih lai hian inbe mahse 'nuclear activities' an neih mêk erawh tihtawp an remti lo. Iran foreign minister Abbas erawh European ram te nen an inbiak hnu lawkah Islam ram 57 intawhkhawmna Turkey-a neihah a tel zui ve leh tho a ni.

𝗜𝗿𝗮𝗻 𝗦𝗲𝗺𝗻𝗮𝗻 𝗵𝗺𝘂𝗻𝗮 𝗹𝗶𝗿𝗻𝗴𝗵𝗶𝗻𝗴𝗶𝗻 𝗿𝗶𝗻𝗵𝗹𝗲𝗹𝗵 𝗮 𝗵𝗹𝗮𝘄𝗵:

Nimin lamah Iran Semnan hmar lam km 27 vela hla, km 10 vela thûkah 5.1 magnitude vela nain lir a nghing niin Tasnim News Agency chuan a tarlang a. Lei hnuaiah Iran hian nuclear a test ta mai em ni ang tih zawhna a siam phah a, chhiatna nasa tak erawh a thleng lo. Lirnghingna hmunah hian Iran Semnan Space Center leh Semnan Missile Complex a awm nghe nghe.

Iran hi Alpine - Himalayan seismic belt-a awm niin lirnghing a tam hle a, kum khatah vawi 2,100 te lirnghingin a sawi ṭhin a ni. US Geological Survey (USGS) leh Comprehensive Nuclear-Test-Ban Treaty Organisation (CTBTO) chuan lirnghing chu Iran ralthuam enchhinna a nih loh thu a puang thung.

(𝙺𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝚑𝚛𝚊𝚗𝚐 𝚑𝚛𝚊𝚗𝚐 𝚛𝚎𝚙𝚘𝚛𝚝 𝚛𝚒𝚗𝚝𝚕𝚊𝚔 𝚝𝚊𝚔 𝚝𝚊𝚔 𝚊ṭ𝚊𝚗𝚐𝚊 𝚕𝚊𝚔 𝚔𝚑𝚊𝚠𝚖 𝚊 𝚗𝚒 𝚎)