Aizawl | June 14, 2025: Tukin khan Mizoram Badminton Centre, Zuangtui-ah 1st Mizoram Grassroot Badminton League 2024 -2025 kharna hun hman a ni a, Sports & Youth Services Minister Lalnghinglova Hmar-in khuallian niin a hmanpui.
He Grassroot League final hi Badminton Association of India Vice President leh National Badminton Chief Coach ni bawk Pullela Gopichand leh TATA Trusts Head of Sports Neelam Babardesai te rawn zin denchhen a neih a ni a. Category hrang hrang 11-ah inelna neih niin, Badminton Grassroot Centre kalpui tha te leh Coach ti tha te hnenah chawimawina lawmman hlan nghal a ni bawk.
Sports Minister Lalnghinglova Hmar chuan kum 2036-a India in Olympic thlen a tumah Mizoram thalai te a tam thei ang ber an tel theih nan hma lak chho mek zel a nih thu sawiin, sports discipline hrang hrang zingah badminton chu Mizo te tan India leh khawvel level-ah kan lan theihna a nih a rin thu leh, Olympic ah ngei pawh kan inlan theihna discipline pakhat a nih a beisei thu a sawi a. Tun dinhmunah pawh India aiawh tura H Lalthazuala leh C Lalramsanga te thlan an nih thu leh, anmahni ang dinhmun a ding thei thalai tam tak chher chhuak thei dinhmun ah MBA a din mek thu a sawi bawk. India ram leh khawvel level-a lang phak tur chuan training mumal taka kalpui a tul thu te, kan player-te training kan pek dan pawh kan thlak a pawimawh thu a sawi bawk.
Gopichand pawhin kum 1994-ah India Badminton in a hun tawn hniam ber a tawn thu sawiin, Commonwealth Games-ah pawh sorkar laipui in player a tirh loh thu a sawi a. Chumi hnuah kalphung mumal tak nena coaching kalpui a nih thu te, kum 30 dawn a ral leh meuh chuan India in World no 1 thleng phak 3 a neih thu te, World championship 15 a lak theih thu te a tarlang a. Mizoram ah ngei pawh kum 2017-2018 inkar atangin kalphung mumal tak neia training kalpui tan a ni a, kum 5 a liam deuh choh a, Mizoram chuan India team a tel thei player 2 a neih thu leh, India state dang atanga hetiang nei thei an awm loh thu a sawi bawk a ni.
He programme hi Mizoram Badminton Association (MBA) Senior Vice President leh MBA Project Monitoring Committee Chairman ni bawk H Lalnunsiama'n a kaihruai a, MBA Secretary General Dr K Vanlaldinpuia hnen atangin report ngaihthlak niin, MBA Project Monitoring Committee Secretary Prof. Lalhriatzuala'n lawmman leh chawimawina hrang hrang hlanna hun a hmang a, MBA Vice President Lalrinzuala Pachuau-in lawmthu sawiin hun a khar a ni.
Report atanga tarlan a nih danin, tun dinhmunah Mizoram chhungah District Badminton Association 13 a awm a, club 220 in affiliation tiin, player 9,729 in heng club ah te hian registration an ti a ni.
Mizoram hmun hrang hrangah Grassroot Centre 25 kalpui mek a ni a, chungah chuan training nei mek naupang 1095 awmin, mipa 694 leh hmeichhia 401 an awm a ni. Champhai leh Kolasib ah Elite Centre a awm mek a, hengah hian player 27 (mipa 14 leh hmeichhia 13) an inzir mek a. Hei bakah hian Regional Competitive Training Centre, Zuangtui ah full time a training nei mi 25 an awm mek bawk a ni.
Grassroot League final-a lawmman dawngtute:
Centre tha tehna:
Pakhatna: Chhinga Veng Grassroot Centre
Pahnihna: Saron Veng Grassroot Centre
Pathumna: Mission Veng Grassroot Centre
Coach tha tehna:
Pakhatna: Malsawmtluanga
Pahnihna: Alex Vanlalruata & K Vanlalhluzuala
Pathumna: Lalliankima
Grassroot League Final result:
U-9 Boy's singles:
Champion: Laldinpuia, Bungtlang GRC
Runners up: Mesak Laltanpuia, Champhai GRC
U-9 Girl's singles:
Champion: Sarah Lalenkawli, Saron GRC
Runners up: Faith Rinmuanpuii, RUBC GRC
U-11 Boy's singles:
Champion: Lalmalsawma Lianhna, Mission Veng GRC
Runners up: Edward C. Lalruatsanga, Zotlang GRC
U-11 Girl's singles:
Champion: Lalruatkimi, New Serchhip GRC
Runners up: Rosalyn Lalmalsawmi, Tuikual GRC
U-13 Boy's singles:
Champion: Abraham Lalnunthara, New Serchhip GRC
Runners up: Samuel Laldinpuia, Mission Veng GRC
U-13 Girl's singles:
Champion: Lalnunhluni, Mission Veng GRC
Runners up: Lalthakimi, New Serchhip GRC
U-15 Boy's singles:
Champion: Zakariah Hussain, Lungdai GRC
Runners up: Timothy Vanlalpekhlua, Saitual GRC
U-15 Girl's singles:
Champion: T. Lalmuanpuii, Chhinga Veng GRC
Runners up: H. Zoremsiami, Kolasib GRC
U-15 Mixed doubles:
Champion: Jonathan Lalruathlua Chawngthu & H. Zoremsiami, Kolasib GRC
Runners up: Dylan Vanlalhriata Sailo & Sarah Zonunsangi, Kulikawn GRC
U-13 Mixed doubles:
Champion: Abraham Lalnunthara & Lalthakimi, New Serchhip GRC
Runners up: Samuel Laldinpuia & Lalnunhluni, Mission Veng GRC
U-11 Mixed doubles:
Champion: Jason Hmingmawizova & Ruby Zomvanghoih, Mission Veng GRC
Runners up: Lalmalsawma Lianhna & Ramdinmawii, Mission Veng GRC
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: