YMA Electric Veng Branch-in 'Career Fair' buatsaih

Aizawl | May 17, 2025: YMA Electric Veng Branch Literature & Education Sub-Committee te buatsaih 'Career Fair' chu May ni 17 (Inrinni) chawhma dar 10:30 khân Electric Veng YMA Hall-ah Lt. Col. Clement Lalhmingthanga, Champhai South Bialtu MLA chuan a hawng.

Career Fair hawng tu Lt.Col.Clement Lalhmingthanga chuan zirlaite chu an zir zelna tur kawngah duhthlanna hmang thiam turin leh nakin huna an inchhir lohna turin duhthlanna dik leh ngaihtuahna fîm tak siam turin a fuih. Chawhma lamah hian MZU Associate Professor Dr R Zothanliana leh Lalrinzuali MPS ten zirlaite tana pawimawh leh an mamawh thu tha tak an sawi.

Career Fair hi zirlai naupang ten lehkha an zir chhoh zelna turah kawng dik zawk leh ngaihtuahna fing tak an neih theihna tur leh nakina eizawnna kawng an zawh hun a hlawhtlinna an neih theih nân a buatsaih a ni a. EYMA hnuaia Literature & Education Committee hian kum 2023&2024 ah khân hlawhtling takin a lo buatsaih tawh bawk a ni. Electric Veng Branch YMA chuan YMA kumpuan 'Ram leh hnam humhalh' tih hlawhtlinna kawng khat atan zirna uar leh lehkha zir dan dik zawk inkawhhmuh hi a ngaih pawimawh avangin Career Fair hi a buatsaih a ni.

Career Fair-ah hian Stall hrang hrang a awm a, heng Subject Arts, Science, Commerce, Management/Baking, Hospitality/ Tourism leh Law- te a awm bakah Military/Force (Sipai), Sports, Medical, Engineering lama tui mite tan Stall buatsaih a ni bawk. Stall-ah hian hetiang lama hlawhtlinna lo nei tawh veng chhung mithiamte rawn theihin an ṭhu a ni. Tin, heng bakah hian ITI, ICFAI University, Medhavi Foundation, Women's Polytechnic Aizawl lam te Career Fair-a tel turin sawm an ni bawk.

Career Fair-ah hian veng chhunga zirna in te sawm an ni a, veng chhunga zirlaiten an hlutin tlawhtu an ṭhahnem hle a, a kal ten an hlawk pui hle. School naupang mai bakah naupang thenkhat chu an nu leh pa ten rawn hruaiin hun hlawk tak an rawn hmanpui bawk a ni. Career Fair hi Pawl 10 leh Pawl 12 zir zo chiah te leh Pawl IX aṭanga zir chho tur te tana lehkha zir chhunzawm dan tur inkawhhmuhna leh infuihtharna atan buatsaih a ni. Career Fair hi chawhma dar 10:30 ațanga tanin tlai dar 3:00 ah zawh fel a ni.