(Sorkar bungrua tichhetute chunga 'action' lâk ngam lohna State; Mizoram)
*~ Zoa Tlau (17.05.2025)*
Buannel Cabin
Hun a inher liam hlek a, kan ngaihthah zui mai zêl a, thil thleng sawi zui loh leh ngaihven zui loha zuzi hi kan hnam ziaa bet tlat hi a ang ṭhin. May ni 7, 2025 zan khan Zuangtui khawtlang mipui chuan PWD Complex Zuangtui chhunga Aizawl khawpui kawng siam mêkna Hot Mix Plant (Kawngpui siamna bitumen leh a dangte pawlhna khawl) chu suasamin an tihchhia a, an hal bawk.
A tuk May ni 8, 2025-ah PWD leh khawl buntu Sky Builders, Nidhi ten Bawngkawn Police Station-ah First Information Report (FIR) an thehlut a. He thil sual titute hi zawng chhuaka man tura 'report' an ni. Police ten PWD te FIR bawhzuiin, Zuangtui khawtlang mi, he thil thlenga rinhlelh mi sawm panga (15) thu zawhfiah turin an man nghal.
*Sorkar bungrua tihchhiat leh hremna dan:*
Mizoramah Sorkar hian Sorkar bungraw tihchhiat hremna dan khauh tak *'Prevention of Damage to Public Property Act, 1984'* kan nei a ni.
He dan chiang taka bawhchhetu Zuangtui khawtlang mipui te hi dan anga hrem tur an ni a. Sorkar hian a hrem ngei ngei tur a ni, a hrem leh hrem loh chu sorkarin 'Law & Order' a kenkawh ngam leh ngam lovah a innghat a. Sorkar Department leh hnathawktute thlavang a hauh tur a ni bawk.
He dan hnuaiah hian sorkar bungraw tichhetute chu kum nga (up to 5 years imprisonment) thleng jail tang tura hrem theih an nih mai bakah; an bungraw tihchhiat man hu an chawi tur tih a ni bawk.
*Hrem ngei ngei tur ngaihdam:*
He PWD Hot Mix Plant-in khu a siam leh a chheh vela cheng te (PWD ram neih hnu fêa cheng an ni a) harsatna chu kan hre awm e. Chu zawng ai chuan Zuangtui khawtlang chet dan hi dan bawhchhiatna nasa tak a ni a, heti chunga Sorkarin hrem ngam loa a ngaidam ngawt hi a him lo hle a, sorkar kalphung hi a dik lo a ni.
May ni 14, 2025 khan PWD Engineer-in-Chief Mini Conference Room-ah PWD official-te, Zuangtui Local Council leh Zuangtui All NGO te an inkawma Joint Press Statement an siam a nih kha (I&PR Press Release 596/2025-2026).
Mipui tana hnathawk mêk, Aizawl khawpui kawng siam mêktu, kan nghahhlelh êm êm hna kal lai titawp vek thei tura PWD Complex chhunga luta hnathawhna siamtu ber; Hot Mix Plant an tichhia hi hrema chawitir ngei ngei tur an ni.
Tum rêng vanga sorkar 'PWD Complex' meuh luhkhunga mipui rawngbawlna hna thawk mêktu zah pawh zah lova tichhetute pawh Sorkarin an chunga 'action' a la ngam lo hi a zahthlak a, a him lo bawk. Sorkar hnathawk leh mipui thlavang hauh ngam lo sorkar kan hrawn mêk hi a lungchhiatthlak a ni.
Zuangtui Local Council leh All NGO ten FIR hnuhkir a nih theih nana an dilna te, ngaihdam an dil te hi chu a Mizo a, an tih tur tak pawh a ni awm e. Mahse, ti teh ang 'Law will take its own course' an tih angin dan anga kal mai tur a ni. Chumi kengkawh tur chuan sorkar kan nei a, mahse sawrkar kan neih hian he 'Kalphung thar' an tihah hian misual/thil tisualtu hrem a ngam ta lo a nih hi. A ngam chinah erawh a che na viau mahna!
*Hot Mix Plant tihchhiat te chu:*
Hot Mix Plant thir chhah tak chu han tihchhiat ngaihna vak a awm lo a, a behbawm a control-na te leh hna thawhtirtute an tichhe nual a.
_PWD leh Sky Builders, Nidhi-te'n FIR an thehluha an tarlan danin Zuangtui khawtlangin an tihchhiat te chu:_ Hot mix plant control cabin unit, air conditioner (1 ton), hote mix plant mixing drum, hot mix plant wiring zawng zawng, mixing rum motor, cilinger motor, vibrating motor, feeder motor, filler motor, hot mix plant jection box, grease gun & tool box, solar light, decanter control panel leh decanter diesel pump-te a ni.
*Tlangkawmna:*
Zuangtuia thil thleng hi darthlalang pawimawh tak a ni awm e. Political party ṭhenkhatin FIR hnukkir tur ten thuchhuah te an lo siam thul.
Dan bawhchhiaa sorkar 'property' tichhetu, mipui harsatna siamtute thlavang hauh kher hi a ṭul lem lo e. PWD hian hnathawh theih hun laia Aizawl kawngpui te hi mam taka siam an duh em em, an bungrua suasamtute laka FIR an thehluh hi an tih tur dik tak a ni.
Hetianga 'Law & Order' lekkawh mumal lo sorkar kan hrawn mêk hi a vanduaithlak a, ṬBCC lam ni se khawtlang buaipui luih luih a ni mêk bawk. Hmasawnna lam hawiin dan leh hrai lalna hnuaiah i in relbawl leh tawh teh ang u.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: