(Anmahni remtihna tel loa dahtu & 'bond' sign-tirtute pawh kum 5 tang thei an ni: Hriata Chhangte)
~ Zoa Tlau, 19.05.2025
Buannel Cabin
Nimin 18.05.2025 khan Er. Hriata Chhangte, Ukil cum activist, chu YouTube channel pakhatin a kawmna a tichhuak a. Ngun takin vawi 3, 'note' nena inchhawpa ka ngaihthlak hnuin, thu ṭha leh pawimawh tak tak a tam êm avangin 'review/reaction' hi ziah ka duha ka ziak ta a ni e.
ṬBCC, Sakawrtuichhuna awm tawh te chu intelkhawm mêkin, WhatsApp Group te an siam a, Pu Hriata Chhangte hian a pui bawk a. Kum liam ve deuh tawh hnu ami te pawhin Court hi an kal ve theih dawn tho avangin Pu Zohminga, TBCC founder, hi khin an tum niin thu dawn a ni. Hemi aṭanga Pu Hriata Chhangte sawi zauna hi chhiar ang aw.
*Home inkaihhruaina Mizoramin dan ṭha tak kan nei:*
The Mizoram Drugs Control Substances Act 2016 leh The Mizoram Drugs Treatment Cum Rehabilitation Centre Accreditation Rules 2019, kan neih thu Pu Hriata hian a sawi a. Hemi hnuaiah hian Home siamtute in register tur a ni a, hemi hma hian Society-ah an in register hmasa tur a ni tih a awm bawk. ṬBCC hian a engahmah a in register lo a, sorkar pawhin nawr ṭhin mahse founder hian a duh lo.
A in register miau loh avangin ṬBCC hotupa Pu Zohminga sum dawn te endik theih a ni lo a, a hmanna a hriat loh bawk. Danin a phût inkaihhruaina dan tam tak a zawm lo a; Mi 5 tan ek in pakhat tih te leh mi 10 tan bual in pakhat tih te hi a zawm loh chianzia lantirtu a ni. 'Audit' a theih loh a, ama duh dan danin a kalpui mai mai a ni.
*CYMA inrawlhnaah sorkar a tîm:*
Pu Hriata sawi dan chuan, tun hnaiah Zoram pum hriatin ṬBCC buaina a ri luih luih a. Mi sang awmna enkawltu, mitthi te pawh awm chho zût-ah ngatinge sorkar a ngawih tih zawhna a awm a. CYMA a inrawlh a, tu sorkar emaw, tu CM mahin CYMA khin kha an duh lo, a ti a. Politician chuan vote leh pawisa an melh thu a sawi.
*Home-a dah luitute kum 5 thleng an tang thei:*
Home-ah hian an daha te an duh ang leh lungawi anga dah an nih loh chuan 'wrongful confinement' an ni ta a. An dah tura khan rem a ti tur a ni. Ṭhenkhat an dah luh chhan kha chhan ṭha tawk a niha midang tihnat ching, mi hlauhawm an nih finfiah an nih chauhin dah luih theih an ni, niin Pu Hriata hian a sawi.
"Ni 10 aia tam, mi duhna ni lova ṬBCC-a an dah ve ngawta kha a dik ta lo a, a dahtu kha kum 5 thleng lung in tan theihna a ni," a ti.
*'Bond' sign-tirtute pawh hrem theih:*
ṬBCC-a khawm case emaw, NGO etc. ten an dah te hi bond sign-tir an ni a, a nawlpui hian a thu inziak an hre loa an zawt ngam loa an 'sign' pawp pawpa 'forcefully signing bond' thil sual a lo ni leh ta a ni, Pu Hriata chuan a ti bawk.
Bond kha inlakchhuahnaah hman a ngaia Court kal te a ngai ta a. Bond lo sign-tirtute leh a zuk dahtute kha 'wrongful confinement' ah khan 'accused' an ni thei ta vek niin a sawi bawk. Heti a nih chuan kum 5 thleng lung in tan theihna thil dik lo kha ṬBCC te leh a dahtute khan hremna an tawk thei ta reng mai.
*Ramthim atana kan sen 50% tal hi kan tu leh fate tan hmang ila:*
Pu Hriata chuan, "Famkimi advocate thil vei tak a awma, ani chuan 'Kohhranin ram thim kan vei a, Synod hnuaiah kan budget tam ber chu ramthim ringthar tan a ni a.
'Kan budget chanve hi kan tu leh fa te; thle ngawih ngawih, riahna mumal nei lo te enkawlna mumal zawk atan ni se, Kohhran lian pangngai chi chuan 'Rehab Centre' hi nei vek rawh se,' a ti a ni. Pastor Quarters in luah ringawt pawh phaiah sing 5-7 te a ni a," a tih hian ngaihtuahna a ti thui hle.
"Keini Mizo Kristian te hian keimahni chhungkuaah, kan ram leh hnamah ṭawih nasa lutuk a awm hi hmuh kanin ram pawn kan va vei a.
"Orissa te pawh ka awm tawh, Mizoram aṭangin missionary an rawn kal nasa a, Orissa-ah eng chanchinṭha nge kan sawi ve ang. Keini aiin an 'polite' zawk a, an 'corrupt' lo zawk a, mi ṭanpui an peih em em a, kan sum senna hi a ṭul lo mang e ka ti," a ti thung.
"Ramthim kan tih aiin kan thim muk zawk!"
*Keimahni ram leh chhungkua a pawimawh hmasa:*
He Mizo Kristian ram leh hnam veitu hian chhungkua aṭanga bulṭan ṭul a tihzia a au pui a. Chhungkua aṭanga 'value system' ah tu leh fa ten Pathian hmel an hmu lo a, chhungkuaah 'home mission' kan tih hi kan thupui lehzual a ngaihzia ṭhahnemngai takin a sawi. A dik hmel khawp mai.
Kan thil tihsualna kawngah Pathian hming kan lam hi a pawi ta ber chu a ni, tiin ṬBCC chungchangah tàwp a khar a. Mizoram bika hi inrelbawlna fel leh ṭha, 'infrastructure' ṭha pawh nei si lo; hlim em em, inngeih em em, changkang kan nih chuan chu chu chanchinṭha a nih tur thu a sawi a, khuta gospel hril lovin min entawn mai a ring.
*Tlangkawmna:*
Pu Hriata Chhangte point chhawp chhuah hi a pawimawh hlawm si a, a sei deuh lo thei lo. YouTube channel lama a kawmtu hian a mi kawma thu sawi laklawh laiin a lo inrawlh nasa lutuk deuh a, ngaihthlak a hrehawm ṭep. Channel dangah fel fai takin sawi leh se a duhawm hle.
ṬBCC te leh Pu Zohminga chet sualna chu Zofate tan inzirna ni se, Pathianin Sorkar, Kohhran leh NGO harhnana min pek niin a ngaih theih a ni. Biak In ropui tak tak sak nana loan kan lak laiin ruihhlo ngai te tan loan laa an hmun kan siam hriat a ni meuh lo. Kohhran erawh Tuikual Presbyterian pawhin Recreation Centre an din a, Dawrpui Pastor bial te pawhin Agape Home an nei. A dang pawhin an ti ve zel turah ngai ang.
Prevention of Corruption Act hnuaiah Group A leh B Gazetted-te 'immovable property return' kum tin an Dept. lamah an thehlut ṭhin a, hei hi eirukna chhui kawnga hman ṭangkai theih a ni ang. "Drugs addict' diriam ka phal lo, eiruk 'addict' te kan vai vat a ngai," Pu Hriata chuan a ti a ni.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: