- C Lalhmingliana
Falkland
Chutichuan ‘Home’ chhim chuan ka awm ve ta lawp lawp a. Ka natna avang khan kartin ‘jection’ lak ka ngaih avangin chhungte'n min rawn kan ta ziah a. A hmun ah chuan chhungte an rawn kala kan hmuh hi ‘interview' an ti a. Interview hmu ngun deuh, chhungte'n zial leh kuhva, ei tur an rawn pek zin deuh hi chu tlema duhsak hlawh tepawha lo awl ve deuh a. Chhungte thil kan chah hian purunsen, purunvar, sawhthing tihvel hi kan chah tel țhin a. Achhan chu room khata awm ho te hi ‘mess' hrang hrangin an ințhen ve a. Mess 1,2,3 leh adangte, hetiang hian. Tichuan mess ah chhunglut in chawei dawnah hian rawt te siam ho a ni ve țhina ni. Țawngthu chhelo ah, chhungte nei mumallo leh tlawhtu nei mumal lo pawh tam tak an awm ve țhin a. Damloh nikhua in an khawngaihthlak țhin khawp mai. Tin, damlohna hi thawktu te hian an awih țha duh mang der lo mai a. Tider tih zawnga lak te hi an nei fo țhin. Hetiang avang tak hian a nia mi tam tak te chu inentir mai lo in an awm a, an lo nat viau phah țhinna chu ni. Health Worker pahnih khat tal hi chu awm ve țhin se la a țha ngawt ang.
Kar khatah hian vawihnih vel hi inbual hun an hawng țhin a. Inbual dawn hian mahni in tui duh duha hman thiana nilo a. Tuipu an awm a, chumi te chuan no in an lo leih țhina ni. Tui a harsat deuh chang phei chuan tui no 3 vel leka inbual fai ngaih changa awm a. Tui hnianghniar deuh chang chuan no 6/7 te a hman ve theih țhin. Inbual thiam ngai taka ni.
Zan ah inkhawma awm ve țhin a, a nung lo in a hul thei hle țhin. Țanpuina sum hi a khat tawk in a lut reng țhin a. Alu, dal leh buhfai bag te, tel a case te in pe hi an awm deuh reng țhin bawk. Chutih mek laiin mipui tana hmanna tur sawi dawn hian sawi tur a awm lutuk chuang hleilo a. Mihring erawh induhthawh a na a ni fa hmiang ka ti mai a. An in ek chhe beng hnur reng zel mai bawk si. Khawm luh hi tam tak an awm a, a inkaihhruaina dan hre chiang lemlo a chhungte dah lah an tam. Inlakchhuah an tum leh duh hunah an thei ngai meuh tawh țhin lo a. Mi pahnih phei kha chu Pu Sanglura hian camping a rawn neih chilh dawn avangin camp ah chauh lut turin an rawn inpu lut ve a. Camp a zo a, chhuah an han tum chu zu course in an lo awm tir hmiah mai a, an chhuak thei ta reng reng lo mai a. Hotupa lah hian engtin nge an chhungte a lo hmin țhin ni dawn ni, thlakhat tal tap mai an awm ve ta tawp a. A tawpah chuan engtin tin emaw an in lachhuak ta khaa ni a. A hahthlak thei țhin khawp mai.
Vawikhat chu keipawh ka kuaa țhatloh mai piahlam ah khawsik in min man tel bawk nen. Ka zawi in ka chau ru ang reng bawk si a. Nachhawkna kha chu min pe ve mai a. Amaherawhchu mut hahdam kha an phal reng reng lo mai a, zan ah lah inkhawm turin min nawr lui bawk. Ekchhuak si, ek dil a an lo phallo phei kha chu țah te lam lama chhuak a. Chhungte'n min rawn tlawh changin a hrehawm dan sawi ngama ni si lo. A hrehawm dan sawi ngamloh chu thuhran, a nuam kan tih ang zawng lama sawi an ngai țhin phei kha chu a lungchhiat thlak ngawih ngawih. Chhungte'n min rawn kan lah in a inhmachhawn zawngin țhuta ngai a, kan bulah security in min țhut chilh run mai si a. Țawngkam kan chhehsual vaih chuan room a in vau bakah course belh a ni tawp mai si. Heta țang ringawt pawh hian inrahbehna a nasa tawh hle tih chu a hriatthiam theih mai awm e.
(Țhen 3-na ah chuan ka haw tak dan te kan thailang tel thei tawh ang chu. Hringnun kawng hi a ngil reng thei bik lo a, a mam kumhlun thei bik si lo. Zawhsual leh chepelh kan awm fo a, țhenkhat te phei chu thuk takah an lut thleng țhin. Vawikhat pawh hriatthiam tum lo, ngaihven tum ik lo, mahni ngaiha țha inti ve em em te'n a lo hmuhsit a, lo endawng ve ngawt tu te hi Pathian lakah an danglam bik hian ka ring lo. Mahni tana hlawkna leh hekna pakhatma awm chuang si lo a lo haw ve em em tu te hi rilru tluang tak an awm bik chuang dawn em ni. Kan rawngbawlna tur ngawih ngawih ni zawk awma lang si hi kan thlauhthla fo țhin si.)
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: