TBCC KA AWM VE LAI - I

byAdmin — 0
- C Lalhmingliana
Falkland


Tunlai chu Ṭawngṭai Bethel Camping Centre (TBCC) chungchang sawi leh i a rawn tam chho leh ta riau mai a, zu ka in nasat țhin avanga ka zuk awm ve laia kan nunphung, inenkawl dan leh awm dan tlangpui ka'n sawi ve anga. A tawi thei ang bera sawi ka'n tum ang a, tih hmingchhiat tumna emaw leh sawisel tumna lama nilo tih erawh min lo hriatsak ula.



Kum 2011 July thla vel khan zankhat chu ka room-a ka awm hi kan inluah pa chuan min rawn sawmchhuak a. Zu ka ruih em avangin ngaihsam tak chuan ka kal ve mai bawk a. Zu in ho tur ang ni ta in ka hria, min sawm avang khan motor ah chuan chuanglut ve mai in kan tlanchhuak ta a. A tawi zawng in, kan kalna vel pawh kha ka hre mumal meuh lo a. A tuk zing ka harh chu room ah khan an lo zi nuai nuai mai a. Ka mang hriat deuh avang khan Delhi a Mizoram House ah kan awm emaw ka ti pek a. (Delhi ațanga chawlh hmanga ka haw lai lo ni bawk nen.) Ka'n hawikual vel a, ka bula mi thil awmzia ka'n zawt a, min hrilh chu ka bangbo bawk si, ka thina rim bawk si. ‘A va ho e’ ti nui nui pah chuan ka insehruh ka insehruh mai a..😂

Ka'n let leh lawk ang a. Vawikhat chu Delhi khawpui a damdawi in pakhat ah kan Mizo pui thisen peka ngaih avangin a Zirlai Pawl angin thisen pe in kan kal ve a. Chumi zan chuan ‘phone call’ dawng in rinloh lutuk mai in Hapetitis C ka vei thu min rawn hrilh nawlh mai a. Chutiang vel avanga inenkawl te ka ngaih avang leh zu ka in chhunzawm reng si avanga ka chhungte mangang in ka haw remchan laia ‘Home’ a min dah dan an lo ngaihtuah hia lo ni a. A khawi Home mah hrechiang ve ta lo chuan  an sawihmuh hmasak ber ah min dah ve tawp hi a lo ni a.

Chuti chuan TBCC an tih a Room 2 ah chuan ka awm ve ta ran mai a. Zu leh damdawi ngawlvei kan in awm pawlh in kan insulpel suau suau mai a. Room in a dawl chin tih awm ta lo chu, kan tawt tawh tih lam pawha theih loh. YMA lam in an khawm hnuhnun apiang an rawn hnawhlut zel a. Kan mutna kan sawirem reng a, a tawp ah phei chuan feet khat pawh tling manglo ah kan mutbu te kha kan phah thei hram khaa nia. Namenlo in khumfa lah an tam. Kan inbeng per thi sawk sawk reng mai a, muttui te kha har taka ni.

Chaw kan han ei dawn a, a tlangpui in tlailam ah hian chawhmeh kan nei țha ve deuh a. Neutrela tui tam tawka chhum leh dal, a dal taka hmuh tur tam lo tak tui tling li puau mai kha kan dawng a. Ajinomoto tam lam deuh in kan telh a, kan al thak a, tui ti viau lo mah ila kan ei leh țeuh zel tho khaa ni a. Zinglam ah alu kawr vel loh a silfai thuak thuak, tui tam tawka chhum kan hmeh zauh zauh a. Chawhmeha van chang deuh chuan nghate ril an tih ang chi te, kuangkuah hnah an tihmai ang chi te leh pangbal hnah chhum te kha kan hmeh țhin khaa nia.

Home hmingpua siam ve tawp, inenkawl dan tur anga inenkawlna pakhat mah awm miah lo a ni a. Hrehawm kan tih thu hi chhungte bulah sawi thianglo a ni tawp mai a. Kan sawi zauh emaw, lehkha te kan pe ru zauha nih a min manchhuak a nih vaih chuan vau tawk paha kan course a let thawka tihpun a ni mai. Hotupa ber lah țawngkama thiam in a dam hmel thlup mai bawk si a, ruihhlo ngaite thu leh hla ai chuan ngaihven a hlawh nasa mai bawk si. Țawng mawilo nilo se, a awm zinga tam tak te chu chhungte belh tur mumal neilo a rawl vel mai mai an ni a. Kan ti ti tamber ah hian țhatchhuahna lam thu chu khawilamah. Chutah chuan a nei țha, chumi chu ka la a. Chutah chuan ka vawrh a tih ang chi deuh hlir, sual dan kan hriat belh tam hlur nimai in a lang si.

(A thui dawn em avangin a chhunga kan nunphung, inenkawl dan leh kalphung tlangpui te a dawt ah ka rawn thailang chho dawna nia. Siamțhat kan nih theihna tur atana pawimawh ber chu keimahni hi kan ni a, kan rilru leh thinlung ngaihtuahna leh tumna ah a innghat chiang hle a ni tih hi kan hriat țheuha va pawimawh si em. Tin, he Home hian kal dan dik zawk, inenkawl dan mumal zawk leh kalphung țha zawk an mamawh in insiamțhat tum se tia țhahnemngaihna awka hrethiam duhlo dera, titau thiltih niawm fahrana lo inchhuah tir dul dul mai pawh khaa chapo thlak viau in ka hria a. A tihtirtu lam leh rawt tu lam te hian mipui an ngainep in an thamlo hle ah ka ngai. Chhuahtir huk policy hi a neitupa ngaihtuah chhuah ni lem lo in, a sir lama tu te emaw inhmulian ve tak leh in ngai ropui ve tak te ‘idea’ a ni ngei ang le. Chuan, ngawlvei hmusit a, chutiang khatiang ti ho te hian a chhunglam nunphung ka rawn ziah hunah in ngaihdan nen in lo khaikhin ve dawna nia. Ka lawm e...)





• • • • • • 


[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]


Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post