SORKAR LAKA INKHARKHÎP LUI TLAT 'ṬBCC'

byAdmin — 0
(Home tan sorkar a ṭang, in 'register' ngei ngei a ngai tawh dawn!)

~ Zoa Tlau (20.05.2025)
Buannel Cabin







*Nimin khan Social Welfare Dept. changtu Minister Pi Lalrinpuii'n a pisa-ah Press Conference a ko a.* A thu leh hla a pawimawhin a bengvarthlak hle. ṬBCC te sorkar hnuaia inziaklut leh khuahkhirh phak ni lo mah se, an ngaihvenzia a lang.

Khatia ṬBCC ten damlo a sang rual dawn an chhuahtira paruk lâiin nunna an chán tih an hriat khan; Minister chuan Kohhran hrang hrang hruaitute  leh NGO te nen inhmukhawm huaihawt nghalin 'consultative meeting' an nei a. Tun maia a damdawi 'immediate relief' an ngaihtuah chûk chûk a ni. Mit tivartu 'eye opener' atan Pi Rinpuii hian a pawimawh thu a sawi.

*ṬBCC-in sorkar an 'lâwm' (welcome) lêm lo:*

Minister hian media mite hmaa a thusawi aṭangin ṬBCC founder Pu Zohmingthanga (Zohminga) hian sorkar hi a hnaih duh lovin, a tak takah chuan an hmun tlawh tur pawhin a lâwm lêm lo a ni. Firms & Society-ah in 'register' a duh lo a, a Pathian thu hmuh dan nen inmil lovin a hria niin an sawi.

Hei vang hian Social Welfare Dept. hnuaia 'The Mizoram Drugs Treatment Cum Rehabilitation Centre Accreditation Rules 2019' lamah phei chuan 'accreditation' ti lovin a in 'register' ta lo hrim hrim bawk.

ṬBCC Sakawrtuichhuna in te sakna atan Congress hunah khan ₹ vaibelchhe 2 lâi Social Welfare Dept. kaltlanga pêk an nih tawh avangin inti neitu takin Social Welfare Dept. lam hian kumin Valentine's Day (14.02.2025) khan tlawh an tum a. Dept. lam pawh hian ei tur ṭhahnem tak kengin, damdawi te, nurse, doctor leh Psychiatrist te an hruai a. Mahse, TBCC hian gate-ah luhtir an phal lo a, tlawhpawh an duh lo a ni.

*Tun boruak avanga harhna duhawm:*

ṬBCC hi sorkar hian an ngaihven reng a, Central Scheme hnuaia 'institution' tana buhfai man tlawm zawka thla 6 dana khul tur te ruahman sak an ni a. Home/Centre thawktute pawh zirtirna pek ṭhin an ni. Mahse an hnuai ni lo, Pathian rinna behchhan (faith based) a nih avangin an inrawlh thûk ngam lo ve bawk.

"Vanduaithlak takin ṬBCC hian sorkar thawhpui hi an duh ṭha tlat lo a, ṬBCC hian min sawma kan ṭanpuina te an mamawh a nih chuan kan kal hreh reng reng lo," Minister chuan a ti.

Tunah chuan Pu Zohminga pawhin Social Welfare Dept. official te be pawpin 'registration' tih a duh thu te a thlen ta hial! Tun hnai boruak hian rah ṭha a thlen mêk a tih theih e.

Department lam pawhin ṬBCC bawk hi 'After Care Skill Development Centre' atana ruahman an duh ta a. _Human rights_ bawhchhe lo a, mi tam lutuk ni lo te mumal taka enkawlna atana ruahman turin ṬBCC founder Pu Zohminga te nen pawh an inbe dawn a. TNT pawh hi 'discipline' ṭhatna a nih avangin 'Skill Development Centre' atan ruahman an tum.

Drugs ngawlvei te Home/Centre hrang hrangah an awm a, an chhuaka a ngai bawk an luh leh ṭhin avangin ngaiawh reng lovin eizawnna tling ruahman sak an duh ta a. Jordan Centre, Seṭhawn pawh 'After Care Skill Development Centre' atan sorkar enkawl turin tihnun an tum mêk.

*Sorkar hriatpui Home/Centre 46 a awm:*

Mizoram mipui 1,091,014 (2011 census) awmnaah hian _addict_ enkawlna sorkar hriatpui 46 lâi a awm a. Hei lo hi rinnaa kalpui inziaklut lo ṬBCC te ang, ngawlvei sang chuang awmna ang te hi a la awm bawk. Ngaihtuah chian chuan kan hnam hi a dam lo a, a lungchhiat thlak hlê a ni.

Home/Centre 46 zinga IRCA Centre 11 te chuan sorkar laipui; Ministry of Social Justice & Empowerment (MOSJE) aṭangin fund an dawng a, chung zingah chuan Director Social Welfare kaltlanga din Thingsulthliah leh Champhai ami pahnih an tel.

Ministry duan inkaihhruaina mumal tak Minimum Standard of Care and Support hmangin enkawlna an kalpui a, Ministry lamin an endik bakah 'social audit' neih ṭhin a ni a. IRCA 10 hi khum 15 awmna, pakhat khum 30 awmna a ni a, a vaiin khum 180 a awm. Khum 50 awm theihna turin hma an la mêk.

Private enkawl awm nualin, Kohhran enkawl Home/Centre 5 a awm bawk. Jordan Centre Seṭhawn hi De-addiction Centre-a kalpui reng a ni a. Mahse enkawltu an awm loh avangin After Care Skill Development Centre atan sorkarin kalpui tumin a ruahman mêk.

District 5-a Drugs De-Addiction Centre la awm lohnaah sorkarin Centre siam an tum a, Ministry of Tribal Affairs lamah pawh project an thehlut tawh a. Kohhran pali; PCI, BCM, ECM leh LIKBK ten De-Addiction Centre an neihah te After Care Skill Development Course nei turin an ngên a, sorkar pawmpui  Certificate pekna tur a nih tur thu an hriattir bawk.

*Accreditation a pawimawh dawn ta:*

'The Mizoram Drugs Treatment Cum Rehabilitation Centre Accreditation Rules 2019' chu siamṭhat mêk a ni a, 'ammendment' an zawh hunah hman a ni ang a. Home/Centre te chu in 'register' ngei ngei a ngai dawn ta. 

A hma khan Home/Centre din te Accreditation ti lo hremna Rules-ah hian an lo dah tel lo a. Hei hi Rules an siamṭhat (ammend) leh chhan a ni a, a ti lo chu thla ruk an nghak anga an la tih loh zel chuan an Home/Centre kha an khar sak (closed down) tawh dawn a. Accreditation ti te puihna pawh a awm chho tura ngaih a ni.

*Tlangkawmna:*

Kan dinhmun enin kan ṭanrual a ngai ta hle mai a. Ramthar lam kan vei tura chu kan Mizoram chhûng ngei mai hi a ni tih Lalpa'n min hriattir a ni thei a. Tun boruak hian min benharhtir ni te pawhin a ngaih theih ta e.

A tua-mah hi indem thei kan ni ta lovin a lang e. Sorkar pawmpui loh Home/Centre te pawhin harsatna an tawhin an Nodal Department Social Welfare Dept. puihna an pûr ve fo tho a. Department lam erawh an va inrawlh thûk ngam lo thung. Tunah chuan kalphungtharin an kal tawh dawn a, ṭha turah i ngai ang u. Pathian ringa a chunga innghat chungin he kan hmelma (social evils) hi ṭangrualin do ila, hnehna chu kan chang ngêi ang.









• • • • • • 


[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]




Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post