SORKAR BUNGRUA 'HOT MIX PLANT' SUASAMA TICHHETUTE HREM AN NI DAWN EM?

~ Zoa Tlau,

(18.05.2025) _Chawlhni_

Buannel Cabin

May ni 7, 2025 zan khan Zuangtui khawtlang mipui ṭhenkhat chuan Zuangtuia PWD Complex luhchilhin, Aizawl khawpui kawngpui thawmṭhat mêknaa a siamna; bitumen, balu adt. chawhpawlhna khawl 'Hot Mix Plant' suasamin an tichhe nual. Hei vang hian khawpui kawng thawmṭhat (repair) hna tam zawk a chawl ta ṭhup mai!

DAN KHAUH TAK A AWM!

(Kum 5 tan leh bungraw tihchhiat man hu chawi):

Mizoramah Sorkar hian Sorkar bungraw tihchhiat hremna dan khauh tak 'Prevention of Damage to Public Property Act, 1984' kan nei a ni.

Chiang taka a chunga dan tarlan bawhchhetu chu Zuangtui khawtlang mipui ṭhenkhat te hi an ni a. Sorkar hian a hrem ngei ngei tur a ni. A hrem leh hrem loh chu sorkarin 'Law & Order' a kenkawh ngam leh ngam lovah a innghat a. Sorkar Department leh hnathawktute thlavang a hauh tur a ni bawk.

He dan hnuaiah hian sorkar bungraw tichhetute chu kum nga (up to 5 years imprisonment) thleng jail tang tura hrem theih an nih mai bakah; an bungraw tihchhiat man hu an chawi tur tih a ni bawk.

NGAIHDAM NGAWT THEIH A NI CHIAH EM:

Sorkar department I&PR ten May ni 14, 2025-a thuchhuah an siamah; FIR thehluttu PWD official, Zuangtui LC leh All NGO te inremin, 'Joint Press Statement' an siam a. PWD hian Zuangtui khawtlang laka Bawngkawn PS-a an FIR thehluh an hnukkir (withdraw) a ni awm e. Zuangtui lam hian ngaihdam an dil bawk.

PWD hi sorkar department pakhat mai a ni a, sorkar bungrua hi department ta mai ni lovin sorkar leh mipui ta ; 'public property' a ni. Hei vang hian thil sualtitute chhuia hrem a nih theih nan 'suo moto' pawha 'case file' awm kher lova chhuia hmalâk theih a ni. Kalphungthar dikna duhna tak tak a awm chuan 'suo moto' (on its own motion) hmanga Zuangtui Hot Mix Plant cheng nuai tam tak man tihchhiatah hian hmalâk ni se a dik ang.

*DIK LOA INPUH & TLANGKAWMNA:*

Zuangtui khawtlangin PWD te dik loa an puh a nih chuan court-ah an thlen thei. PWD laka 'complaint' an neih chuan dan angin kal mai rawh se. 'Social media' leh a tharum thawha dan nasa taka bawhchhiaa sorkar leh mipui bungrua tihchhiat hi hmawrbawkna dik lo, thutlukna dik lo ber pakhat a ni. A huhoa pawi khawih hi 'dan kalha chetna' a ni tho tho tih hi hre nawn leh ang u.

A tawpa zawhna awm ta chu kan sorkar hian thil thleng zen zen ngai lo; khawtlangin sorkar bungraw man tam tak a tihchhiat chîamah hian 'action' a la ngam dawn em? tih hi a ni ta a ni.