Ruahsur nasa vangin Lawngtlaiah in chim

Lawngtlai | May 31, 2025: Ruah sur nasa avangin nizan dar 10:45 vel khan Lawngtlai Bazar Veng leh Chandmary ah Building pathum ve ve a chim a. Chhiat tawh thu hriat anih veleh Lawngtlai Bawrhsap Pu Cheemala Siva Gopal Reddy chuan In chimna hmun hi a pan nghal a. CYLA- te kaihhruaina hnuaiah chhanchhuah hna hi 3rd IR Battalion, Assam Riffles, District Disaster Management & Rehabilitation leh CYLA Quick Respone Team ten an thawk nghal a. NHIDCL leh ABCi ten an hmanrua neih ang angte an lo thawhchhuahpui bawk a ni.

Nizan zankhua khan chhanchhuah hna thawh niin, vawiin lamah thawh chhunzawm a ni a. Buliding chimah hian a tam zawk chu tlanchhuak hmanin, mi 4 vel a chim hnan nia hriat a ni a. Vawiin chawhma khan mi pahnih chu dam taka lakchhuah an ni a, tunah hian midang lakchhuah tuma beih leh mek a ni.

Vawiin hian CYLA chuan hnatlang koin, Bazar Area ah hian Vengpui, Council Veng ,Bethel Veng, L-III leh Bazar YLA Branch - te an hnatlang a. Chandmary Area ah hian Chawnhu, College Veng, Electric Veng, Chandmary leh Thingkah Branch YLA te an hnatlang a ni.

Bazar vengchhunga In chim hi Vanlalhlupuii Fanai, B Vanhnuailiana leh C Lalchungnunga te In niin, Chandmary Vengchhunga in chim hi C Nihluani, F Rothuama (In sak mek) leh F Lalnithanga (In sak mek) te an ni.