Aizawl | May 5, 2025: Mizo Hnam Run chhung inkhawm hun hnihnaah vawiin khan Health Minister hlui leh MNF Senior Vice President Dr R Lalthangliana chuan Mizorama political party hrang hrangin Health Care an kalpui dan chungchang a sawifiah a, "Mizoram Universal Health Care Scheme (MUHCS) hi mi hausa leh rethei inthliarna dik tak a ni," a ti.
Dr R Lalthangliana chuan Healthcare Scheme enkawl tur hian heng committee peng hrang hrangte hi MNF sorkar chuan a siam dan sawiin, Governing Body kha Chief Minister hovin kan siam a ti. MHCS hman a nih theih na atan hian Asian Development Bank atangin loan lak a nih thu a sawi bawk.
"MNF sorkar khan kum 2008 Budget-ah khan MHCS tan Rs 50 crores a dah bawk a. Congress sorkar a lo pian thleng khan theih tawpin Healthcare Scheme hi MNF sorkar khan a kal pui a ni. Congress kum 10 chhung 2008-2018 a sorkar pawh khan he MHCS MNF sorkarin a lo kalpui tawh chu harsatna tin reng hmachawn chungin a rawn kalpui chhunzawm ve hram hram a, hetianga sorkar hmasa thil tih a rawn chhunzawm duh hi Congress sorkar chungah pawh khan lawmthu ka sawi duh a ni," a ti.
'Healthcare Scheme hi tha tak leh tangkai taka Mizoram mipui nawlpuiten kum khat vel emaw chauh kan hmang hman tih in Covid-19 hripui in min rawn tlak buak ta a. Vanduai thlak takin khawvelin Covid-19 hripui kan hmachhawn takah chuan, khawvel in ram ropui bera kan ngaih USA sorkar meuh pawh buai namen lovin Economic leh Financial-ah buaina a tawk a. Keini Mizoram ngat phei chu Central sorkar puihna tello phei chuan chawrchhuah leh dam khawchhuah pawh harsa tak dinhmunah kan ding a nih kha,".
"Healthcare bill pekna tur Rs 60.00 Crores kum 2023-2024 khan Finance Department atangin allocation kan hmu a, tu pawh lo sorkar se, he pawisa hi Healthcare bill pekna tur liau liau a hman tur a ni a, mahse Election Commission of India chuan tum dang ang lo takin hma takah Mizoram MLA General election a rawn puang thut mai a, hei vang hian kan SEDP sum hman mai tura kan peih diam Rs 150.00 Crores pawh kan hmang hman loh phahin, Healthcare fund allocation kan neihsa ngei Rs 60.00 crores pawh Healthcare bill pek nan kan hmang hman ta lo ani, a ti.
Asian Development Bank atanga LOAN puk phalna MNF Sorkarin a tih fel tawh hi tun thlengin kan ZPM sorkar hian a tak ram min la thlen pui lova, harsa taka MNF sorkar in approval a lo tih fel tawh, Loan Agreement ziah theih mai tawh tur a peih tawh hi ZPM sorkar hian bawhzui a, ti hlawhtlin ngei tur in ka ngen duh a ni a ti bawk.
Kum 2023 kum tawp lam ah vanduaithlak takin MLA election-ah MNF-in hnehna kan chang zo ta lova, ZPM Party ten sorkarna an rawn chang ve ta a. An rawn sorkar phat atangin MNF sorkar kal ta beihna leh sawiselna chitin rengin zoram dung leh vangah an party workers-te an hmanhlel a. Heathcare Bill ba te pawh mi beih nan nasa takin an hmanga a nih kha, a ti bawk.
MNF Sorkar kal tain SEDP atan kan sum dah Rs 150.00 crores atanga Rs 40.00 crores chu Healthcare ba rulh nan an hmang a, tin hemi baka MNF sorkarin Healthcare Bill pekna tur liau liau Finance Deprtment-in fund allocation a lo pek sa diam Rs 60.00 crores atangin engemaw zat Healthcare bill ba chu an rulh theih phah ta zawk a ni a ti. ZPM Sorkarin Healthcare bill ba a pek zawng zawng te hi MNF Sorkar in a lo ruahman sa leh dahsa sum atanga pek vek a ni, a ti bawk.
MNF Sorkar lo ruahman sa leh dah sa atanga Healthcare Bill ba ZPM sorkar in a pe hi ZPM Worker ten in sawi theih nan leh in tih theih nan ha hip in an sawi thin a. Hetia MNF sorkar thawhrah sa seng a lo parchhuah ve ngawt te hi ZPM worker te hian zahna chang hre ve rawh se a ti.
ZPM MUHCS System thar kalpui tura hma an rawn lak hian rawn awm ngawih ngawih a ngaih heng Private Hospital te leh Sorkar hnathawk in zawmkhawm pawl (FMGE &W) te pawh rawn lo leh system fel hlel leh buarchuar tak in MIZORAM UNIVERSAL HEALTHCARE SCHEME chu Dt. 01.04.2025 khan Mizoram pum a hman turin CM Pu Lalduhawman Vanapa Hall ah a tlangzarh a ti.
ZPM sorkarin Mizoram Universal Healthcare System a rua hman leh leh AB-PMJAY te hi scheme thuhmun leh a kal phung leh Healthcare Bill dan pawh in ang, a hming chiah hrang a ni a. He MUHCS Scheme pawh hi Package system a duan a ni a. Tin he scheme hnuaiah hian Dam lo ten an damlohna a zira package an lak ang chauh Damdawiin atang in an bill sak thei dawn a ni, a bak zawng senso chu Damlo in a pek belh a ngai dawn a ni. (Entir nan mi in MUHCS empanel Damdawi in a rilphir lo zai tir ta se. MHUCS package ah chuan rilphir zai hi Rs 11,000.00 a lo nia, he damlo hian he a rilphir zai nan hian he Damdawiin ah hian Rs 20,000.00 lo seng si se Rs 11,000.00 bak kha bill thei lovin a bak zawng hi dam lo khan a pek a ngi dawn ani. (He MUHCS hi package a nih miau vang ani) Rs 5,00,000.00 thleng damlo in a bill theih tih chu a ni dawn lo a ni.
MUHCS-ah hian thil felfai tawk lo leh duhkhawp tawk lohna tam tak a awm ni in a lang a, hei vang hian heng Pvt. Hospital leh FMGE & W te rawnin siam that thuai a tul tak zet a ni a ti.
MUHCS, ZPM sorkarin a duan lai hian Private Hospital leh FMGE &W te rawn in fel fai tak leh huam zau tak a system hi siam nise, heng kan Private Hospital leh FMGE & W ho te hian zawm pawh an hreh reng lo ang a ti bawk.
MUHCS hi Package system a duan a ni a. Hei vang hian a lawm kan Private Hospital leh Sorkar hnathawk in zawmkhawm pawl (FMGE &W) ho te pawh in an zawm duh loh ni. MUHCS package rate te hi Private Hospital rate te nen a han khaikhin hian a rate a in thlauh em mai a, chuvang chuan Private Hospital tan chuan MUHCS hi zawm a har em em dawn a, sawi hona neih a in rem siamna siam hi a tul tak zet a ni a ti.
Private Hospital ten MUHCS hi an zawm duh loh chuan kan mipui rethei ho hian an tuar ber dawn a. Tin, Mizoramah hian mihring kan lo tam chho ve zel bawk si a, heng kan Government Hospital te hian min dawl zo lo nasa em em tawh a ni, hei hian harsatna lian tak mipui ah a thlen thei dawn a, chu mai bakah thih phahna hial pawh a thlen ang tih a hlauhawm hle a ni.
Mizoram sorkar Hospital hrang hrang (Govt. Hospital) te hian damlo an enkawlte hnen atangin, Damlo inenkawlna an bill dawn tihna a ni a, chuvangin kan Govt. Hospital zawng zawng hi PAYING HOSPITAL ah an siam dawn tihna a lo ni.
Sorkar Hospital a damlo in enkawlna te Healthcare Bill atanga an re-imburse te hi enga hman tur nge, Damdawiin a thawk Doctor leh Staff zawng zawng te hlawh sawrkar in a pe bawk si. ZPM sawrkar hian Mipui damlohna hi sum hmuh nan hman a lo tum reng tihna a lo ni mai lo maw? a ti bawk.
MNF kan sorkar lai khan sorkar hnathawkten an damloha an inenkawlna senso an bill ang ang chu sorkar in a re-imburse sak mai a, an hlawhah emaw an cut sak ve ngai lo a ni. Kan sorkar hnthawkte hi kan sorkar kut leh ke pawimawh tak an ni a, hetianga an dikna chanvo/entitlement sorkarin a pal zut sak leh rawn derna pawh awm lova an thla hlawh atanga Mizoram Universal Healthcare Scheme a tan pawisa cut-na tur thu a ti thlu ngawt hi in zah lohna leh in tham lohna lian takah MNF party chuan a ngai tak zet zet a ni, a ti.
Kan sorkar lai khan AB-PMJAY leh Mizoram Healthcare kha mipui ten an hmang kawp thei thin a, tunah erawh chuan khang zawng kha tih bo vek a ni a ti.
ZPM sorkarin Mizoram Universal Health Care Scheme (MUHCS) mipui Health Care a tih chu ni 1 April 2025 atangin a kalpui a. Chutih rual chuan, he Health Care Scheme hi kawng hrang a thlirin mipui tawrhna tur tam tak a awm avangin Mipui thlavang hauh a tul ta a ni. MUHCS Guidelines-a awm Mipuiin kan hriat tur mahse; sorkarin an thup a awm a, chu chu Aizawl Civil Hospital leh Zoram Medical College and Hospital-ah Emergency Case/Life Threatening bakah Service (khum awm lo tihna) a awm loh hun atan Emergency Certificate(refer to Ebenezer/ LRM/ Trinity/BN Hospital) hmang a damloten MR an Bill theihna tur dan (provision) MUHCS Guidelines-ah a awm a. Amaherawhchu, hei hi mipuiah an puang/ tlangzarh duh ta tlat lo. He thil hi a serious tak zet a ni. Sorkar hian damlo tanpui nge a tum a tlem thei ang ber Bill tir (save) tih hi ka zawhna a ni, a ti.
Kan sorkar hian MUHCS chungchangah hian Non-Government Hospital Association of Mizoram (NGHAM)-te hi he Universal Healthcare Scheme Cashless a kalpui anih avanga an zawm duh loh chungchangah hian NGHAM an bei emaw, an inti mai thei. Amaherawhchu, kan sorkar hian an beih zawk chu mipui damlo enkawl mekte hi an ni zawk a nih zawk dan a sawi.
Mizoram Universal Health Care Scheme (MUHCS) hi mirethei tan ni lovin, mihausa tan chauh a duan a ni. A chhan chu RSBY hnuah AB-PMJAY kan han hmang chho a, he AB-PMJAY hian cashless 5 Lakhs package a keng tel nghal a. Chu package System chu MUHCS hian an entawn ta a. Entirnan rilphir zai hi MUHCS Package-ah chuan Rs.11000/- a ni a. He 11000 hian Consumable items damdawi, OT charge, bed, nursing care zawng zawng khan a daih vek tur ani tih a ni. Mahse a daih teuh si lo. Package anih chuan damlo khan Rs. 20000 seng ta se, Rs 11000 a pelhna zawng zawng kha a bill theilo. Chuvangin, MUHCS hi AB-PMJAY duplicate (rawng var hi rawng engah an thlak) mai a ni. MUHCS phenah AB-PMJAY hi an phumru a, tuna CASHLESS an tih hi kum 2019 atangin Central-in Health Care Scheme Cashless in a kalpui daih tawh a ni, a ti.
He Universal Health Care Scheme hian AB-PMJAY hi a chhungah phum ru chungin Cashless a kalpui an tum a. Thil pawi tak chu Sawrkar Hospital heng- ZMC & H, ACH, CHC, PHC, District Hospital ex zawng hi MUHCS hnuaiah chuan sorkar hian PAYING HOSPITAL-ah a siam ta a ni. Kan hriat reng tur chu eng tik lai mahin Govt. Hospital ho hi PAYING HOSPITAL an ni ngai lo. A chhan chu Aizawl Civil Hospital chu sorkarin engkim a tum, thawktute hlawh a pek, building awm sa, tui leh electric bill a pek vek a ni a. Tichuan Aizawl Civil Hospital-a damlo bill kha Universal Health Care khan Private Hospital ang mai khan Bill an pe ta vel (mahni leh mahni) a nih ber mai chu. Chu an Bill chu Universal Health Care sum atan lakletsak lehin, chu chu hmingthatpui an tum, a pawi hle. [Chutihrual chuan Extra awm ve chu damdawi man tlem a awm, chutiang anih rau rau chuan hetia cashless tikual lo hian ACH-ah hian sorkar hian a thlawnin damdawi pe mai se a in ang reng a ni, a ti.
Sorkarin engkim a thlawn pekna Aizawl Civil Hospital a damlo zaina rate ang Private Hospital ho a rate ang bituk sak hman luihtir a tum hi thil tih theih loh inbarluih tumna a ni, a ti bawk.
Dr.Thangtea chuan sorkar hian ama enkawl Hospital-te man chawina- Paying Hospital ah a chhuah mek ta a ni. Mirethei AB-PMJAY a in registered chuan Universal Health Care Scheme hman anih hma daih hian Cashless in engkim an tithei vek tawh a. Kan rilru a zawhna lian tak awm ta chu- mi AB-PMJAY-ah khan lo in register lo se, Aizawl Civil Hospital-ah awmin Aizawl Civil Hospital hian a man a pek sak dawn em ni? A chhan chu Rs 2500/- a registration an tih khan ACH ah AB-PMJAY neilo khan treatment la dawn se, Rs 2500/- kha a dahkham nghal tihna. Chuvangin,mipui tan Sawrkar Hospital fee service kha paying Hospital ah an siam a ni tih chu a logic dik tak a ni.
Tunah hian Mizoram Sawrkarin a tum ber chu Central Health Care Scheme AB-PMJAY atanga pawisa lokal te bakah Sawrkar Hospital a MUHCS Rate ang a sum an peipun te kha Health Care sum atan an hui lut vek dawn tihna a ni a. Chutah tak chuan heng Aizawl Civil Hospital ang chi ho, damlo hnen a Bill chi si loh a leina sum rawn kalna Scheme RKS kha a bo ta vek. Engvangin maw? Aizawl Civil Hospital-ah hian Cabin man te, Laboratory, OPD Card atang a sum tlem te te tling khawm kha Hospital Maintenance atan hman thin a ni. Heng sum zawng zawng pawh hi Universal Health Care sum-ah a kal vek ta a ni. A awmzia chu ACH leh Sawrkar Hospital a Local Financial System(Central Scheme RKS) atang a pawisa tling khawm hi Healthcare SUM atan kan Sawrkar hian it ta hial.
MNF sawrkar Health Care ah chuan Sub-Centre BPL in 100/-, APL in Rs 1000/- in an in register a, Healthcare ah cheng 200,000/- a bill thei a. Cashless chu a ni lo mahse, damlo kha a rilphir zai a ngai a Rs 50,000/- a hmang a, Rs 200,000/- atang khan 50,000/- re-imbursement a hmu thei tlat. Tun a Cahless aiin a tha zawk. Private Hospital-ah pawh Health Care a neih chuan a Bill lak hun atan khan an enkawl thei tlat. Tuna Healthcare Package System-ah chuan a theih ta tlat loh.
Mizoram Universal Health Care Scheme(MUHCS), a koh nan pawh a “Mipuite Healthcare” an tih hial hi Mipui Healthcare anih lohzia chu - AB-PMJAY a inziak lut chu Mizoram Universal Healthcare-ah an inziak lut thei lo. Hei ringawt pawh hi Mirethei harsa ve tak tak ABPMJAY a in register ve tawk tawk te rahbehna a ni.
A hma chuan ABPMJAY nei khan Healthcare ah khan Share ava nei tho a, tunah chuan a theih ta lo. A in register na lah a tlawm ber 2500/- ani a,chu pawh General Ward ah chiah a awm thei,5000/- Semi Private,10000/- Private .Mirethei tan chuan Private ah a awm theih dawn lo. Chuvangin, mipui rethei zawk hmuhsitna ani.
Sawrkar hian Private Hospital ho Covid-19 lai pawh a nunna chhantu, Mipuiin kan hman tangkai em em Healthcare anih avang a rate fixed sak a tum a, chu pawh a tlawm em em a, zawm ngaihna awm lo. Tlawm bawk, ba bawk a ni ber. Tin, kan Mizo Private Hospital te an phalsak miah loh laiin phai Damdawiin empanelled nilo ah re-imbursement phalsak an ni leh zel te hi a demawm tak zet zet [MUHCS Guidelines 5.3.4]. Hei hi Mizoram Private Hospital zawng zawng tih chhiat vek tumna a ni hial awm mang nge tih mai tur a ni.
Kan Sawrkar hnathawk Pensioners ho hian Rs 500,000/- thleng an Bill thei a, chutihrual chuan, nikhatah Rs 1200/- chiah a Bill theih thung si. A nih leh 500,000/- Bill thei tur chuan damloh rei ava ngai dawn em! Ni 416 damloh a ngai tihna a nih chu. Thil theih loh a ni e ti ila a dik mai awm e.
A khaikhawm nan chuan Mizoram Universal Healthcare Scheme hi mihausa leh mirethei inthliarna dik tak a ni, a ti.
He hun hi MNF General Headquarters Adviser Zarzoliana'n kaihruaiin, B Vanlalvuana, Armed Veng chuan hunserh a hmang.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: