Aizawl | May 5, 2025: Vawiin khan ZPM General Headquarter chuan Party Office ah chhung inkhawm an hmanga, he hun hi ZPM GS R Sanghnuna'n a kaihruaia, ZPM Adviser Upa Lalhmingthanga'n hunserh hmangin Vice President C Lalnunnema’n mi thar lawmluhna hun a hmang a, thusawitu TBC Lalvenchhunga PAC member chuan, Kalphung thar mipui Sorkarin hun reilote chhungin thil tha tam tak a tih tawh thu a sawi.
TBC Lalvenchhunga PAC member, ZPM General Headquarters chuan, “ZPM hian Sorkarna kan chan hnuah ram tan thil tha tam tak kan ti tawh a, chutih rualin kan thiltha tihte mipui hriata puanzar kawngah mahni infak kan hreh hle niin a lang a, eptu Party te sawichhiatna kan sepui ruah tawrh leh ngawt ngawt mai thin hi thil fuh ber niin ka hre lo a, mipuite hian kan thil tih thatte leh Sorkar thar kan neih hnua kan hmasawnna leh hmalaknate hi an hriat a tul hle a ni,” a ti.
Adviser to Chief Minister (Finance) chuan, “Kalphung thar mipui Sorkarin ama puala Budget a pharh ve hnuah khairual thei ang berin hmasawnna a kalpui a, opposition bial hrekna thinlung pu hauh lovin Budget a hmang a ni tih hi mipuiten lo hria se ka duh hle a. Kan ramah rorelna tha leh langtlang Sorkar a awm theih nan Chief Minister Lalduhoma kaihhruai Sorkar chuan thahnemngai taka hma lain, nikumah inrenchem kum kan puanga department hrang hrang atangin nuai 100 tel tak meuh kan hum thei a, hengte hi tul dangah daihzai takin kan hmang mek a ni. Tar pension, rualbanlote leh Hmeithaite pension te pawhin malsawmna thar an dawng mek a, Wildlife Workerte, School Chaw chum bakah Health Care hnuaia Nurse te hlawh kan tihpun leh hnathawktute hlawh duhsak taka kan han pek thinte pawh hi Sorkar thar danglamana kan hmuh mekte an ni,” a ti.
Aizawl West-I bialtu MLA chuan, “Kalphung thar mipui Sorkar hi khawsak harsa zawkte tana ding a ni a, Ration man tihsan chungchangah pawh khawsak harsa zawkte tan buhfai man hi cheng khat pawhin kan ti sang lo, Sorkarin buhfai lei nan sum tam tak a sen thin hi a lo ziaawm theih nan khawsak awlsam zawkten heti zat hian i khul ve tawh ang u, tiin Retailer ten dik taka an buk theih nan an lawman kan tihsan sak hial bawk a ni. Tuialhthei man Sorkarin a tihsan pawh mipuiin an pawm thiam em em a, a chhan chu a hmanna tur ruahmanna fel tak Sorkarin a siam vek a ni. Tin kan lo sawi tawh ang ngeiin Electric leh tui Bill hi vawiin thlengin kan la ti sang lo a, Sorkar hmasain Kawng leh Lei thawm thatna atan sum a lo dah pawh 30 Vbc zet in Sorkar thar hian a tipung a, chumai bakah nikum chhung khan 400 Vbc zet kawng hlui thawm that nan leh kawng thar siam nan sum a theh chhuak a ni, vawi lehkhatah hmasawnna hi lang duak duak lo mahse, thahnem ngai taka kan thlai chi thlakte hi a rah kan la seng dawn chauh a ni.” a ti.
Adviser to Chief Minister chuan, "kuthnathawktute thar chhuah Sawhthing theih tawpin kan lei a, India ram puma Sawhthing Market rate tlahniam leh harsatna hrang hrang Sorkarin a hmachhawn chung pawhin theih tawp a chhuah a, a beidawn san ve lo. Intiam zet a ti leh si lo te ai chuan harsatna karah pawh theih tawp chhuaha thutiam bawhzuitute hi mipuiten an hria a ni. ALT Road chungchangah pawh Sorkar chuan Central Road Research Institute (CRRI) te ruaiin tha zawk leh tlo zawka siam dan tur a ngaihtuah mek a, vawiin mai ni lo nakin hun thleng Sorkar chuan a thlir a, ZPM Sorkar hian chhim lam mipuite hi a ngaihthah hauh lo a, Sorkar hmasa hun lai anga tum khata sum hman zawh phak bak in sunction khum vak vak ang leh a hnua K-Deposit a dah ngai leh si ang khan Sorkar thar hi kal a tum lo a ni. Mizoram Univershal Health Care Scheme chungchang ah pawh, Sorkar hamasa hun lai anga 20 Vbc. vel daha Health Care kalpui ve tawp leh a hnua leiba tlingkhawm ang kha pumpelh kan duh a ni. Sorkar hmasa khan kan Private Hospital te hian Pakage rate hmang ve tawh se, tiin a nawra, an innawr tlu tep tihah a tlawm san leh ta si a, chuvang chuan private hospital rate hmangin MR bill a kal angai thin a, re-imburse theite rate chu a dang deuh bik nite pawhin a lang thin. Chuvangin Sorkar chuan Standard Pakage rate duan tha a ti a, Mizoram ah kan Private Hospital ten theitawp an chhuaha, investment an hmang tih Sorkarin a hriatpuii avangin duhsak takin Delhi leh Mumbai a hospital thate nen rate in angin a siam sak vek a, chumai bakah Sorkar chuan nuai 50 thleng dahkham a inhuam a ni, private hospital te hnenah pawh an harsatnate Sorkar nen sawiho tura sawm nimahsela vawiin thleng hian a chhanna kan dawng lo hi mak kan ti hle a ni. Sorkar chuan kan private hospital-te nen tangruala mipui tan theih tawpa thawhho kan duh a, ruahmanna famkimlo awmte pawh sawiho kan inhuam reng a, Sorkar chuan Mizoram Univershal Health Care Scheme thar hi mipui tan hlawhtling taka kalpui ngei hi a duh takzet a ni,” a ti bawk.
Vawiin chhung inkhawm hi PHE Minister Prof. Lalnilawma, Power minister F Rodingliana, Tourism Minister Lalnghinglova Hmar, MLA Climent Lalhmingthanga leh MLA Jeje lalpekhlua ten an telpui a ni.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: