Aizawl | May 1, 2025: Mizoram Public Service Commission chuan Mizoram Civil Services (Combined Competitive) Examinations - 2024 chu tluang takin an zo a, nimin khan result an tichhuak a, Mi 34 tlinga puan an ni.
Mizoram Civil Services (Combined Competitive) Examinations - 2024 topper hi Samuel Malsawmzuala, S/o JH Laldingliana A-52, Tuikhuah Veng, Serchhip niin, Mark 605.3 a hmu a, MCS atan a tling a ni.
Mizoram Civil Services (Combined Competitive) Examinations - 2024 Topper Samuel Malsawmzuala hi MArian High School, Serchhip aatangin pawl 10 a pass a, HSSLC hi St Paul's HSS atangin a pass leh a, pawl 10-ah Mizoramah 4na niin, HSSLC-ah chuan Science Stream-ah pahnihna a ni thung.
Under Graduate erawh Pachhunga University-ah kalin, B.A a la a, Economics-ah topper a ni a, MZU BA Gold Medalist a ni a, MA chu University of Hyderabad-ah zir zawmin, Topper a ni leh a ni.
Tun tum hi MPSC hnuaia Mizoram Civil Services (Combined Competitive) Examinations a hmachhawn hmasak ber a ni bawk.
MZU BA Gold Medalist 2020 a nih tuma Explore Mizoram leh Samuel inkawmna
Ngaihven hlawh zualte:
Topper bakah hian, parukna Lawrence Lalhlanthara S/o Lalramchuana Ralte, A-111, Chawngbawla Section, Venglai, Sesawng, chuan ngaihven a hlawh hle a, MZP-ah lo inhmang tawh niin, College a kal laiin Students Union hruaitu a ni thin a, Sesawng VC-ah Secretary a ni mek bawk. Lawrence hian 585.28 hmuin, MCS ah a tling bawk a ni.
22na - Chaltlang Aizawl-a cheng mek, C Ramdinpuii Zorem D/o C Zorema, Ramzotlang, Serkawn, Lunglei pawh hian 568 hmuin, MF&AS atan a tling a, footballer leh Football lam tuite'n an ngaihvenin hriat a hlawh hle!
Mizoram Civil Services (Combined Competitive) Examinations - 2024 atan a dilna thehluttu zawng zawngte tan PreIiminary Examination chu Ni 27.06.2024 khan Aizawl khawpui chhung Centre hrang hrangah leh District Headquarters zawng zawngah buatsaih a ni. Tun tumah hian Applicant 5854 awmin, Preliminary Examinations paltlang a, Main Examination hmachhawn thei chin hi an vaiin mi 346 an ni a, chung zinga mi 344 te chu unreserved candidate niin, Reserved Candidate (PwBD) mi 2 an awm a ni.
Preliminary Examination paltlang mi 346 atangin mi 319 ten Ni 22-25 October, 2024 chhung khan MPSC Examination Hall-ah leh Govt. Higher Secondary School, Lungleiah Main Examination hi an nei a ni.
A hnuaia mi ang hi Post hrang hrang awm dan a ni:
MCS - 14+1 (PwBD)
MPS - 8
MF&AS - 8
MIS - 3
Total - 33+1= 34
Dt 28th March, 2025 khan Main Examination Written Results tihchhuah a ni a, MPSC Guidelines hman mek angin Personal Interview (Pl) nei thei tur hian mi 68 (66+2) an tling a. Personal Interview hi Ni 22.04.2025--30.04.2025 chhungin buatsaih a niin candidate mi 68 te chu he Interview hmachhawn tura koh an ni a, an vaiin an rawn inlan vek a ni. Nimin April 30 khan Personal Interview zawh a ni a, result chu tihchhuah nghal a ni. Mi 34- te chu tlinga puan an ni ta a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: