Engkim Researched Based a kalpui vek tum anga insawi ZPM sawrkar hian engvangin nge MUHCS hman a nih tawh hnuah zirchiang tura an kal leh hnuhnawh si hi mipui hmaah insawifiah turin kan phut tlat

Aizawl | May 1, 2025: Vawiin khan Mizoram AAP hruaituten Governor Gen. (Dr.) Vijay Kumar Singh an hmu a, Mizoram Universal Health Care Scheme (MUHCS) chungchang sawipuiin, hma lakpui tura ngenna lehkha kan thehlut nghal.

Mizoram AAP chuan thuchhuah siamin, "April 1 atanga hawn tan tawh Mizoram universal healthcare scheme vawiin thlenga mipui tam zawkin kan la hman tangkai thei lo hi a lungchhiatthlak kan ti a, mipui te tawrhna hi a pawi kan ti tak zet a ni," an ti a.

"Non- Govt.Hospital Association of Mizoram(NGHAM) hnuaia private leh kohhran damdawiin tam zawkah he scheme hi a hman theih loh avangin damlo tam tak ten harsatna kan tawk mek a ni." an ti.

Non-Government Hospital Association of Mizoram (NGHAM) in a he scheme an zawm theih loh avanga mipui harsatna sut kian a hmalak pui theih dan tur an sawipui nghal bawk.

An sawihonaah Governor chuan mipui harsatna tawh mek hi a ngaih pawimawh thu a leh a rang thei ang bera hmalakpui a tiam niin Mizoram AAP chuan an tarlang bawk.

Mizoram AAP chuan, "Tunah hian kan Health Minister leh Health Department official-te Thailand-ah Health Care zir turin an thang mek a. Engkim Researched Based a kalpui vek tum anga insawi ZPM sawrkar hian engvangin nge Mizoram Universal Healthcare Scheme hman a nih tawh hnuah zirchiang tura an kal leh hnuhnawh si hi mipui hmaah insawifiah turin kan phut tlat a, Keini chuan he scheme hi mipui bumnaah kan ngai a, a rang thei ang bera mi zawng zawng hman theih turin he scheme hi chhawp chhuah nise kan ti." an ti bawk.