MZU B.A Gold Medalist 2020 Samuel Malsawmzuala

Mizoram University (MZU) Bachelor of Arts (B.A) Gold Medalist 2020  Samuel Malsawmzuala kan belchiang.

Ela, Samuel, Sam tia koh thin Samuel Malsawmzuala hian, ‘Vanlal’ ti a min koh tlat pawh an awm! 😅 a ti a. A ni hi JH Laldingliana leh Zonundangi te fa pali zinga mipa awm chhun a ni.

MZU B.A Gold medalist Samuel Malsawmzuala hi a subject lak chu Economics niin, CGPA 9.29 score in B.A (Economics) topper a ni a, B.A subject hrang hrang topper zingah a sang ber a ni.

Samuel Malsawmzuala hi February 21, 1998 khan a lo piang a, an unau hi pali niin, Mipa awm chhun niin farnu pathum  a nei a, a naupang ber a ni bawk. Unau a Mipa awm chhun chu an duat viau a nih loh vek chuan a rim hle dawn tih a chiang reng!

Serchhip, Tuikhuah Veng a awm niin, Serchhip Bazar Presbyterian Kohhran-ah an lawi.

Zirna lam:
# Pawl 1 atanga pawl 10 khawiah nge i kal? Eng zatna nge i nih ṭhin, pawl 10 pass kum?
- KG-A aṭanga class-3 hi Chawngbuangi Memorial Elementary School, Serchhip, Dinthar Vengah ka kal a. Awmna kan insawn avangin Little Flower Convent School, Serchhip, P&E Vengah pawl 4 aṭangin ka chhunzawm a. Hetah hian middle school ka chhuak a ni. 
High School hi Marian High School, Serchhip, P&E Vengah tho ka kal a. Ka tet te aṭangin a thiam thei ber chu ni ngai chiah lo mah ila, pathumna chinah hi chuan ka lang chho ve deuh zat zat ṭhin. Pakhatna erawh ka ni ngai meuh lo. Class-9 first term-ah ka fail thung😎. Mahse, hei hian nasa takin rilru thar min put tir a, Pathian zarah HSLC 2015 khan Mizoram pumah 4-na lai ka ni ve a ni.

 
# Pawl 12 hi khawi atangin nge i pass? Chuan, engah nge, a kum nen?
- Higher hi St. Paul's Higher Secondary School, Tlangnuam, Aizawlah ka kal a. Heta ṭang hian pawl 12 pawh ka pass a ni. Higher-ah hian Arts Subject ka la la lo a, Science la-in ‘Biology-Maths’ ka la ṭhin. Term exam-ah chuan a ti ṭha lamah chuan ka lang ve zat zat a, a ti ṭha ber erawh ka ni ngai lem lo. Tichuan, 2017 HSSLC exam-ah khan Pathian malsawmna-in Science Stream-ah Mizoram pumah 2-na dinhmun ka hauh ve leh hlauh a ni.

# Zirna sang zawk i zir leh i zirna hmun leh kum?
- College hi Pachhunga University College, Aizawl, College Vengah ka chhunzawm a. College-ah hian Science lak chhunzawm lovin Arts stream-ah ka inlet a. A tirah chuan Geography ka core a, tichuan 5th Semester aṭangin Economics subject lamah ka inlet kual leh a nih chu (zawhte no nei ang deuh ka nih ber chu😅). Tichuan, 2020 hian Under-Graduate degree chu MZU hnuaia Pachhunga University College aṭangin ka nei ve ta tihna a ni.

I lehkha zir dan?
- Ka naupan tet aṭang tawh hian zirlai hi ka la lungrun ve hrim hrim a😁. Chutih rualin, class-9 first term ka fail hma kha chuan lehkha zir kha ka lak thu tak viau rual khan rilru zawng zawng leh tumruh taka zir ka nei ngai lem lova, zir pawh ka zir tam hran ṭhin lo khawp mai. Mahse, class-9 aṭang kha chuan ka hun tam zawk hi lehkha zirna atan ka hmang a ni deuh ber. Higher ka kal lai phei chuan rual ka pawl lo em em a, mahni-in hun ka hmang nasa hle. Mahse, college-ah chuan thil tih kawp ka zir ve deuh a. Ṭhian pawh mahni tawkah ka kawm ve nasa a, chutih rualin zirna tichhe khawpin thil dangah erawh ka inhnamhnawih tam lem lo. Tin, mahnia awm hi ka thil nuam tih ber pawh a ni ve pakhat bawk a. ‘Ni khatah darkat chuti zat ka zir’ ti anga sawi tur em em ka nei hran lova. Zing lamah hian exam lai a nih loh chuan lehkha zir tura thawh hma hi ka ti ngai lem lova. Zan lamah ka peih chen chen ka zir mai ṭhin. Zing dar 2/3 hi chu ka meng thleng tlangpuia, zing lam boruak thiang nen erawh kan inchhung hnai lem lo khawp mai.😅

Harsatna i hmachhawn dan?
- College ka kal chhung hian mahni intodelh ka duh avangin private hostel-ah warden hna ka chelh ve pah a. Mahni zirlai piah lamah mimal leh hostel thil tam tak chin fel tur ka ngah ve ṭhin hle. Keimah bikah chuan harsatna a lo thlen hian, chi hnihin ka thliar mai ṭhin a. Ka thlak danglam theih chi leh thlak danglam theih loh chi-in. Ka thlak danglam theih loh harsatna chu engtin mah ka ti ngai lo😅. Philosophy of Flow/Taoism zirtirna hi ka duh em em a, kan thlak danglam theih loh thil chu an awm ang hian awm tir mai ila, harsatna pawm thiam zir ila, amah leh amah a insiamrem ve mai ṭhin tih hi ka ngaihdan a ni. Harsatna chi dang zawk, ka thlak danglam theih thil a awm a nih chuan ka theihtawpin thlak danglam turin hma ka la ve mai ṭhin. A bak zawng chu Pathian kutah ka dah mai ṭhin. Harsatna chinfel theih loh leh pawm thiam theih meuh loh erawh  ka ngah ve hle tho bawk.

 

BA Gold medalist ni tura i beih dan?
- Gold Medalist tur hian a hranpain ka bei lem lova. Hma hun thui tak thlir hi ka thiam vak loh avangin a tlachawp te te in theihtawp ka chhuah mai ṭhin. College kal chhung zawngin Gold Medalist nih tum lam hi ka ngaituah ngai hran lova, chutih rualin ka hmaa tla chu mahni theih ang tawka hmachhawn ka tum mai ṭhin. Class test kan neih dawn chuan class test-a ṭha taka tih ka tum mai a, chutiangin external exam a hun chuan theihtawpin external exam atan ka inbuatsaih leh mai ṭhin. Hei hi ka nun hman dan tlangpui pawh a ni, ni khat atan ni khat te te-in.

BA Gold medalist ni tura i beihnaah faculty lamin an ṭawiawm/pui ṭha chein i hria em?
- Kan faculty-te hian keimah mai ni lo, kan zirlai pui zawng zawngte hi an theihtawp tak meuh meuhin min hruai a. Zirna lamah chuan zirtirtu an nih angin an hna rinawm taka thawkin min zirtir mai a. Chumi piah lamah, ṭhian ang maiin mimal harsatna kan hrilh ngam a, ṭanpui dilna ban kan pharin min tlanchhiatsan ngai lo. Nu leh pa ang maiin kawng engkimah thu ṭha min fuih a, ka(n) tan chuan an hlu tih bak chu sawi dan pawh thiam a har hle. Sawi belh hram ka duh chu, kan department teacher te hian note min handout ngai lova, class-ah uluk taka an sawifiah hnuah interaction/discussion class te min neihpui leh fo ṭhin a, college level-a extra class min kalpui fo peihtu zirtirtu kan nei hi kan lawm hle. Tin, college mai ni lo, an in a kan kal chilh ngam, phone hmanga harsatna kan thlen ngamna te an ni a, a bak a awm thei chuangin ka ring lo!

I zirna atana i chhungte pawimawhna:
- Chhungkua hi ka tan chuan ka zung (roots) a ni a. An kiangah awmin an hnen aṭangin lehkha zir thei ta lo mah ila, ṭawngṭaina lamah min thlahthlam ngai lova. Ka nu leh ka pa phei hi chuan phone-a kan inbiak apiang hian, "In unau hming lamin kan ṭawngṭaipui reng che u ania" an rawn ti kher ṭhin, chu chuan hriat loh lamah chakna nasa tak min pe ṭhin tih chiang takin ka hria. Nu leh pate tisa kut ban phakah an fate hi awm lo ṭhin mah ila, thlarau-in nasa takin kan ding leh vei, kan hma leh hnung lo min vensak ṭhin a ni tih hi ka chhungte hnen aṭang hian ka lakah a chiang hle a ni. Ka nu leh pa te hi zirna lama rualawt em em an ni a, fuihna thu pawh kan dawng hnem malh malh ṭhin hle. Engkim bul leh tawp chu Pathian a ni a, chumi tana a hmarua chu ka chhungkua hi an ni.

I zirna atana i ṭhiante pawimawhna:
- Ka ṭhiante, a bik takin ka department pui te hi kawng engkimah kan intibuai tawn a, chu chuan thiamna tam tak min pe tawnin hlawkna kan dawng ṭheuh ṭhin niin ka hria. Ka zirlai puite hian chona thar min pe fova, an nunah thil tam tak ka zirchhuak fo bawk.

A duhzawng leh ngainat zawngte:
Rawng – Blue, Grey and Yellow.
Chawhmeh  - Ka chawei a tui chuan ka ei thei vek a, a tui loh chuan ka ei thei lo deuh vek.😅
Incheina - Incheina atan chuan simple tak hi ka ngaina a. Thuamhnaw hrim hrim ṭial nasa leh thil inziak râng ang chi hi ka ngaina lem lo. 
Rimawi – Mike David Rosenberg vangin Indie Folk genre hi ka ngaina em em a. Band lamah chuan Zac Brown Band leh Kodaline te hi ka duh tawp thei lo bawk. Chuan, Christian music-ah chuan CityAlight, Casting Crowns, Chris August, Matt Maher leh ‘for King and Country’ ka ngaithla nasa.
Mizo Ziaktu zingah – Mafaa Hauhnar thuziah ka chhiar hi ka ngaina hle a ni ang, ka rilru-ah a cham rei thei emai. Tin ram kalphung vei pha ziaktu a nihna hi ka ngaihsanna tizualtu a ni, a thuziah kawngah a huaisen ka ti hle bawk. Tin, Darrokima thuziak hi ka hlimpui ṭhin hle bawk.
Hla - Duh ber sawi tur ka nei lem lova, a tlangpuiin thawnthu keng tel hla te hi ka ngaina.
Hla phuahtu - Mizo hla phuahtu-ah chuan Zirsangzela Hnamte hi ka dahsang hle. Tunlai hla phuah mi-ah chuan K. Hminga. Hnam dang lamah chuan Mike David Rosenberg tho kha a ni e. 
Teacher - Zirtirtu atana ka duh ang chu ṭhian anga tlangnel taka ka khawm theih te nise. Thiamna piah lama inkungkaihna nghet kan neihpui theih bawk te hi an hlu zual ka ti. 
Leader - Hruaitu ṭha atan chuan mi huaisen ni phawt mai sela. Thinlung paukhauh tak pu mi, kawng lehlama zawldawhna nasa tak nei tho si. Mahni dinhmuna ding nghet ngam mi, a hruaia te thu leh hla pawisa thiam mi hi ka duh zawng an ni. Nelson Mandela hi ka ngaisang hle a. Tin, Adolf Hitler chanchin tam tak hian min hneh letling tlat bawk, a thiltihte erawh ka pawmpui lo viau nachungin.

Hitler hi a naupan laia family background chhe tak aṭanga chhuak a ni a, khawlaiah vawi tam ei tur leh riahna tur mumal nei lovin a hun a hmang chho a. Chuti chung chuan a tumah a chiang a, a rilru paukhauh lutuk leh a thusawi thiamna te avang hian ka ngaisang hle. A thiltih kan hriat vek ho te erawh entawn chi a ni hauh lo na chu, hruaitu a nihna ro ro a chuan mi ropui tak niin ka hria.

Mize ngainat zawng:
- Mi hlim thei tak bula awm hi nuam ka ti a. Zep nei lem lova mahni ngaihdan leh rilru put hmang min hrilh bawrh bawrh ngam ṭhin te hi ka ngaina tlangpui bawk.

Mize ngai nat loh zawng:

- Ngainat loh zawng sawi dawt tur hi ka nei hran lo. Chutih rualin an mizia kan sawi hma chiaha, 'inti' tih ṭawngkam kan hman tel ṭhinna mi bulah chuan awm a nuam ka ti ṭhin lo. Entirnan, a thilphal ti mai lova a intithilphal tih telh ngaihna ang chi kha chu a buaithlak! 😅

Hobby- Thu ziah hi ka ngaina em em a, article leh poem te hi thiam vak lo chung pawh hian ka ziak ve nasa hle. Tin, lemziah leh artwork dang hrim hrim hi nuam ka ti em em a, ka tet te aṭangin tun thlengin ka hman chang chuan ka la khawih ve reng ṭhin. A bak hun awlah chuan tlai thim dawn thet theta pawn lama hawi thawven hi ka thil nuam tih ber pawl a ni bawk.

Relationship status - Ka han laih ngawt chu a😂. Single ve leh thei hram😝. 

Kawppui atan duhzawng:

- Kawppui atan chuan kei ai maha ka nu leh pa hmangaihtu tur ni se. Chutiang hmeichhia chu hmeichhe ṭha tak a ni ngei ang tih ka chiang.

Zawhna dang:
1. A tel lova i awm theih loh: Earphone.

2. I nun kaihruaitu: Zirtirna ti tawp teh ang. Sawi tawh ang khan Taoism zirtirna te hi kawng tam takah ka hmang ṭangkai hle ṭhin. Engkim bul leh tawp erawh kan Pathian Thu chauh a ni e. 

3. Hringnuna i hlauh ber: Bangdaidep! 😂

4. I tih ngai miah loh tur: Bangdaidep man! 😂

5. Mizo Tualzal nuna ṭha i tih:

- Mizo kan nihna anga tlawmngaihna kan la nunpui hi. Kawng tam taka pawlhdal pawh a ni maithei e, chutih rualin min cheimawitu ber erawh tlawmngaihna hi a ni ka la ti fan a ni. 

6.  Quote i duh ber: "Everything that glitters is not gold."

7. Mizote tan 'Fa neih tlem' inzirtir hi a ṭulin i hria em? 

– Ka ngaihdanah chuan a ṭulin ka hre lem lo. A chhan chu, fa neih tlem hi khawvel changkanna-in a ken tel a ni a, inzirtir lo pawh ni ila, khawvel ṭhang zelah miin fa neih tlem a duh tial tial dawn, hei hi theory tam tak sawi dan pawh a ni a, ram changkang zawkah chuan a thleng dik mek zel bawk. Pathianin a suihzawm chhungkuaah hi chuan fa an hrin tam poh leh thil lawmawm lamah ngai ila, Pathian hriatpuina piah lama fa piang erawh tlem tial tial thung se, chu chuan Mizo hnam hi a tihmasawn ngeiin ka ring.

8. Mizo hnam ṭhanmawh bawk nia i hriat?
- Mizo hnam ṭhanmawhbawk chu kan ‘moral system’ dik tawk lo hi niin ka hria. Mizote chu mahni tana chakai khawrh inzirtir ṭhin kan ni a, kan infuihna ber pawh he thu tho hi a ni. Chu chuan ram leh hnam hmaah mimal indahna a tilian a, mahni nawmna atan kan zir a, mahni nawmna atan vek hna kan thawk ṭhin. Kan zirna in lamah te hian, ‘mahni tana chakai khawrh in ni a, in thawhrim rah sengtu tur chu nangni bawk, in thatchhiat chuan a rethei tur chu nangni bawk’ ti lovin, ‘hnam tan, ram tan, khawtlang tan chakai khawrh a hun tawh’ tiin inzirtir ila. Hei hian naupang thinlungah hnam hmangaihna rilru a tuh ang a, nasa takin eirukna leh retheite dinhmun chhia hi a kiang ngeiin ka ring. Moral reform kan tih hian kan rilru sukthlek hrim hrim sawina a ni a. Khawlaia kan bawlhhlawh paih dan, public property (waiting shed, public toilet etc.) kan enkawl dan aṭanga sum tam tak chetvelna tura kan hming kan thai thlenga kan rilru sukthlek hi a dik tawk lo em em a, hei hi Zoram mu tan ber pawh niin ka hria.

9. Mizo hnam damna atana kawng awm nia i hriatte?
- A hmaa ka sawi ang khan thil dang zawng zawng aia kan mamawh chu moral reform kha a ni a. Chumi atana kawng pawimawh ka tih pathum lek tarlang ila. A hmasa berah chuan chhungkuaah a inṭan tur a ni. Nu leh pa zawng zawngte hian Pathian ṭihna nen fate enkawl sela chuan tunlai kan zoram ṭhalai nun hi nasa takin a danglam ngei ang. Pahnihnaah chuan kan zir dan phung (education system) hi a ṭha lo e chu ka ti dawt lova, mahse kan hmang dik tawk lo erawh ka ti hle thung. Teacher te note ang thlapa exam-naa ziak chuan mark pawh an hmu sang nge nge ṭhin a la ni a. Hei hian kan thluak themthiamna (creativity) nasa takin min rahbehsak a. Zirna kan la urhsun lutuk te hi kan chhiatpui letling zawk em tih pawh hi ngaihtuah tham fe a tling tlat. Kan syllabus leh zirlaibu hman te a standard tawk lo em em a, kan zirna in te, kan laboratory, playground leh campus te nen lam hian a tam zawkah hi chuan duhthu a la sam lo em em a ni. Heng zawng zawng piah lamah hian zirtirnaa tui lo chung chunga zirtirtu hna chelh lo thei lo te an lo awm ve leh bawk nen, kan zirna dan kalphung hrim hrim hi thlak a ngai niin ka hria. Syllabus leh zirlaibu standard ve tak zir ila, zitirtuin thiamna tak tak tuh tumin zirtirna pe bawk sela. Zirtir dan ngai, lehkhabu ngai, syllabus ngai, curriculum ngai nen chuan sikul ṭan hun hi sawn danglam eng ang mah ila kawng ro a su tehchiamin ka ring lo. New Education Policy hian hmasawnna a rawh tlen pha em ang chu maw! Pathumnaah chuan, Mizo ṭawng ziak lamah hmasawn kan tum a ngai hle-in ka hria. Ziah zawm leh zawm loh leh thil dang neuh neuh a tam em avang hian mahni ṭawng ngei hi a ziaha ziah hi chu kan ṭi deuh tlat ṭhin; kei ngei pawh hi ka ni zual hle. Lehkha pawimawh deuh tak Mizo ngeiin Mizo ṭawnga ziah kan tim tlat chhung hi chuan hmasawnna tur thui tak kan la nei a ni tih a chiang reng a ni.

10. Zirna, Khawtlang leh Kohhran hi?
- He thil pathum hi inkawprem taka la khawm thiam an awm a nih chuan chu chu duhthusam a ni a. Mahse, mihring kan in an loh avangin mahni dinhmun azir zelin mahni insiamrem a pawimawh ka ti hle. Mimal a zirin kal kawp thei a nih rualin kal kawp hlei thei lo a nihna chin pawh thui tak a awm ve ve-ah ka ngai.

11. Khawtlang, Kohhran leh nangmah:
- Khawtlang leh Kohhranah hian ka inhmang tam lem lo khawp mai. Chutih rualin, mahni khaw lama chawlh hmanga haw chang chuan zaipawl leh KṬP thiltih eng eng emaw ah te hi chuan kan inhmang ve a. Keimah bikah chuan ka hmana, zirna lam a tihbuai dawn loh chuan ka tel ve mai zel. Tin, kan kova tla erawh kan inhmang ṭhin emaw, ṭhin chiah lem lo emaw, hlenchhuah ngei hi thil kan bat niin ka hria.

12. Social Media leh Nangmah:
- Social Media hi ka khawih tam lo khawp mai a, ka whatsapp ṭawk a ni. Luck vang pawh ni chuang miah lo hian whatsapp pawh hi ka tlin lo lek lek ṭhin.😂

13. Mizoram ṭhalai tam tak tlakchham:
- Mizo ṭhalaite’n kan tlakchham ni a ka hriat chu ‘thutakna’ hi niin ka hria. Thutak hun leh boruak zangkhai taka kalpui hun hi kan hre lo em em ṭhin. Zirna kawnga thutak hun te, ṭhian kawm nikhuaa thutak hun te, chhiatni ṭhat ni a thutak hun te thliar thiam lo ṭhalai kan tam hle-in ka hria. Kan thutak tawk loh vangin mahni tawka mahni nih tur ang pawh kan ni pha meuh lo ṭhin niin ka hria.

14. Mizo ṭhalaite hian ngaihsan tur dik an ngaisangin i hria em?
- Tun dinhmunah hi chuan kan mi ngaihsan lamah pawh ‘reform’ bawk kan mamawh niin ka hria.

15. Ngaihsan tur dik nia i hriat:
- Ngaihsan tur dik nia ka hriat chu thuziak mi kan tih te hi an ni. Thu leh hla hian mi hneh theihna mak tak a nei a, mipui mimir ngaihdan phel hrang hlawk thei khawpa thusawi ring thei chu ziakmite an ni tlat. Jonas Mekas-an, “A tawpah chuan, ram leh hnam a tlukchhiatna chhan chu mipuite’n an ziak mite thu ngaihven lova an politician te thu an ngaihven ṭhin zawk vang a ni” a tih kha ka pawm zawng tak a ni.

16. Hlawhtlinna tura pawimawh:
- Hlawhtlinna tura pawimawh ka tih chu tih hram hramna hi a ni. Tih chiam hi a ṭhat viau rualin, chawl lova muangchanga tih bek bek reng hi a pawimawh ka ti. Be like satel 😁!!

17. Hloh i hlauh ber:
- Ka rinna leh ka chhungkua hi hloh ka hlau ber. 

18. Hnam dang nupui pasal neih hi:
- Nupui pasal inzawn kawngah kan nulate’n dem an hlawh fova. Keiin ka hriat thiam danah chuan mipa tana an kawppui zawnna kawnga zau taka kawng kan hawn lai hian, kan hmeichhiate tan erawh a engah mah hmaiin ramri kan khamsak der tihna a ni. Kan Pathian Thu ngeiin rinna leh beiseina aia a dah chungnun chu ‘Hmangaihna’ hi a ni a. Hmangaihna chu hmangaihna ni sela, mihringin kan lo dan tur niin ka hre lo. Chutih rualin hnam dang, sum leh sanna duh vanga pasala nei an nih erawhin hnam phatsantu ti a kan dem rawn a nih pawhin a awm tho ve. Ka sawi zawk erawh chu, an hmangaih a nih chuan an hmangaihnaah tal hi chuan zalenna i pe ang u. Hnam hming ṭhatna chu literacy rate sang tak kan neih te, sport leh zirnna kawng hrang hranga thang kan chhuah ṭhinna te hi an ni a. Chutiangin hnam hmingchhiatna chu, mipa an ni emaw, hmeichhia an ni emaw, kan state cancer rate sang lutuk te, HIV/AIDS kai kan tam lutuk zawk te hi a ni. Hnam hmingṭhatna leh hmingchhiatna hi hmeichhiate mawhphurhna bik a ni lova, mipate kova tla bik pawh a ni hek lo, Mizo hnam hmingchhiatna chu Mizo kan nihna anga kan Mizo tawk ṭhin lohnaah hian a awm zawk niin ka hria.
Vai pasala neih kan huat hle laia, British pachal pasala nei kan ngaisang letling titih te hi hriatthiam har ka ti riau; hnam dang ṭheuh ṭheuh si. Tin, kan hmeichhe tam tak, lehkha thiam bawk si, hmun danga hnam dang mipate nun zia hre phaa vak zau leh hawi zau tam tak phei chuan kan mizo tlangvalte hi iaina min nei deuh ṭan tlatin a lang. Mizo mipate ṭan kan lak deuh a ngai hlein ka hria. Kan hmeichhiate pasal dang nei lo tura kan duh si chuan mizo mipate hian duhthlan tur ṭha tawk tak kan chawpchhuahsak pawh a ngai hle a ang. Hnam dang pasal neih chungchanga mawhphurtu chu hmeichhia ngawt an ni bik lo tih hi ka pawm dan a ni e.

I thalaipuite tan fuihna--- 
- Thil thui deuh inchah hi theihnghilh a awl mai mai a, chuvang chuan tawi te in he zawhna pathum te lek hi kan lo inzawh theih chuan a lawmawm ngawt ang.
1. Tuna ka awm danah hian ka chungah hian ka lawm tawk em?
2. Tuna ka awm dan hian ka suangtuah thin ram kha min thlen ang em?
3. Engtin nge hma ka lak tak ang?
Thurawn inpe tur khawp thu ropui kawltu ka ni si lova, chuvang chuan he zawhna pathumte hian min puih nasat ṭhin avangin he zawhna channa hi nangmahni ṭheuhah in lo neih chuan in hlawkpui ve ngei ka beisei.

EXPLOREMIZORAM.COM i hmuh dan:

- In hriat ang khan social media lam hi ka khawih tam lo khawp maia, chutih rualin in news tam tak erawh kan hmuin ka lo chhiar ve fova. Chanchinbu leh Chanchin thar uksak peih lo, keini ṭhalai tan chuan kan thil hriatna hnar ber in ni ngawt tawh a. Engkim awlsam leh chak takin hriatna min fahtu te in ni a, in hnathawh a ropui ka ti takzet. In kalzelna turah duhsakna sang ber ka hlan mawlh mawlh a che u.

- H Zate

Founder/Editor

Explore Mizoram

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

FB: https://www.facebook.com/exploremizoramportal

Twitter: https://twitter.com/exploremizoram

Instagram: https://www.instagram.com/explore.mizoram

(Website leh a hnuaia fakna hi lo hmet ve rawh.)