Miss Universe Mizoram 2025 Evelyn Zachhingpuii

Miss Universe Mizoram 2025 atan Aizawl Saikhamakawn nula Evelyn Zachhingpuii thlan a ni.

May 1, 2025 a Novotel, Guwahati a Miss thlannaah hian Miss Universe Mizoram bakah Miss Universe Assam, Miss Universe Manipur leh Miss Universe Tripura te thlan an ni a, he hunah hian state pali-te atangin nula fing, chhelo leh zei tak takte an inlam a, hemi tum a thlanchhuah te hian Miss Universe India 2025 thlannaah anmahni state theuh aiawhin an inlan leh dawn a ni.

Heng state pali te tan hian Miss Universe Assam State Director Akumnaro Imsong chuan audition hi a thleng ani. Evelyn-i hi Miss Universe Assam sponsor zingami Kats Collection tana photoshoot nei nghal tura thlan ani a, May ni 2 ah photoshoot neiin, May 3 khan Aizawlah a lo haw leh a, June-July bawrvel a neih tur Miss Universe India inelna atan a inbuatsaih nghal char char a ni.

Evelyn Zachhingpuii hi Pageantry-a mikhual lo tak niin, Miss Mizoram 2024 thlannah khan 1st Runner Up a lo ni tawh a, tin Miss Pachhunga University College 2019-ah 1st Runner Up lo ni tawh bawkin, Miss Chapcharkut Runner Up a lo ni tawh bawk a, hetiang experience nei thain Mizoram ai a awh tur hi Mizoram mai bakah ram pawn a pageant fans te an phurin, Mizoram mipui zawng zawngte tan pawh a phurawm hle a, nikum lama Roneihpuiin Mizoram tana placement a lo hmuh tawh pawh chhawmnung thei ngei tura beisei san ber pawl ani a, mipuite pawhin vote leh kan puih theihna dang dangah theihtawp chhuahpui turin kan insawm e.