HSLC leh HSSLC Topper te hnenah Chief Minister's Award 2025 hlan

Aizawl | May 9, 2025: Vawiin khan Vanapa Hall-a Education Department buatsaihin Mizoram Board of School Education Examination 2025 a Higher Secondary School Leaving Certificate (HSSLC) leh High School Leaving Certificate (HSLC) topper te chawimawina hun Chief Minister's Award 2025 hlanna neih a ni a. Chief Minister Lalduhoma'n he hun hi a hmanpui a, School Education Minister Dr. Vanlalthlana chu khualzahawm a ni.

Chief Minister thusawi tlangpui:

1. CM Award hi sawrkarin MBSE Exam pahniha topper te kan ngaihhlutzia leh an kal zelna tura kan duhsakzia tihlanna a ni. CM Award hi huang dangah pawh kan sem zel dawn.

2. Education Minister, Education department, MBSE, zirtirtute leh HSLC leh HSSLC exam tha taka buatsaihtute chungah lawmthu a sawi.

Ramin resources a neih ropui ber chu human resource hi a ni a. Natural Resource lamah hausa mah ila mipuiten kan zir loh chuan kan chhawr tak tak thei chuang lo. Chutih laiin ram mipuite an fin var a, hriatna leh thiamna lama an san chuan, natural resource nei tha vak lo mah se ram dang atanga raw material-te lalutin ram hausa takah an indin chhuak thei tho thin.

3. Mizoram hi ziak leh chhiar thiam tamna state kan ni a, tunah hian report thar ber a lo chhuak dawn hnai a. India rama ziak leh chhiar thiam tamna ber state kan ni dawn niin kan hria. Ziak leh chhiar thiam tamna ber state, chhawr tlak lehkhathiam tlemna ni si – kan ni ang tih a hlauhawm a, chhawr tlak ngei nih i tum ang u.

4. Zirna sang zawk lamah kan thalaite in kal nasat a tul hle. Mizoram hian scientists leh researchers kan la ngah tawk lo.

5. Zirna lamah sawrkarin ngaihtuahna kan seng nasa a, kan sum leh pai dinhmun mila kal a ngai a, chak taka thil tih zung zung a har. Sawrkar hi kan tumah kan chiang a, kan phak tawka a tha ber neih tumin kan kal zel.

6. Zirlai naupang zawng zawngte hnena ka chah duh chu - social media platforms a lo tamin smart phone te hi kan nei deuh vek tawh si a. In lo hmang thiam lo vang tih ka hlau a ni. Vawiina kan chawimawi topper te hi chu – internet hian a tibuai lo tih a chiang a. Nimahsela, a tihbuai zirlai tam tak, an hun tam ber screen hmaa hmang thin hi kan ngah a ni.

Mobile Phone, Computer leh Smart TV hmanga i thil en te, i game khelh te khan – eng thil tha mah a pe tak tak lo che. Suangtuahna khawvelah nasa takin a chentir che a, a tak ramah a chang thei si lo va. Mi beidawngah a siam thei zawk che a ni. Hlawhtlinna leh hmasawnna hi ‘Click chhuah’ a ni lo va ‘Thawh chhuah’ zawk a ni. Mi hlawhtling ni tura i mamawh dik tak, i tih tur dik tak chu lehkha zir kha a ni a, chu kawng chu huai takin lo zawh ang che.

7. Kan topper te Cynthia Lalhlupuii Shangpliang, Kristin Laldinpuii Ralte, Lalrammawii Tochhawng leh PC Lalthakimi te – in thawhrimna a entawntlak ka ti a. Ka chhuang che u a ni.

Kan ram leh hnam tihmingthatu ni turin kan lo beisei dawn che u a. Kan ngaihven zui reng dawn che u a ni. In hlawhtlinna hi Mizoram hlawhtlinna a ni a, in chanchin hi Mizoram chanchin a ni.

Dr. Vanlalthlana pawhin thusawiin, topper te lawmpuina a hlan a. An zir chhunzawm tur chu an tuina lamah ni thei se a duh thu sawiin, chu chuan kan hmakhua nasa takin a hril a ni, a ti. Tunlai chhuan te hi Artificial Intelligence nena seilian dun in ni tawh a, AI nen hnathawh tur in la inchuh dawn a. In taihmak a, in hriam em em a ngai a ni.

Chawimawi te:

1. HSSLC Topper in Science - Cynthia Lalhlupuii Shangpliang, a pa Pu Kyrshanbor Shangpliang, Falkland, Aizawl. St. Paul's HSS.

2. HSSLC topper in Commerce - Kristin Laldinpuii Ralte, a pa Pu Lalsangliana Ralte, College Veng, Aizawl, Oikos HSS

3. HSSLC Topper in Art - Lalrammawii Tochhawng, a pa Reuben Lalrinkima, Khatla East, Aizawl, Mt. Carmel School.

4. HSLC topper - PC Lalthakimi, a pa Darthuama, Saron Veng, Aizawl, KD High School

Chawimawina hian tangka fai cheng50,000, Memento leh Citation a keng tel a, Kumin hi a kum 13-na a ni.

Award hlanna inkhawm hi School Education Director Angela Zothanpuii'n a kaihruai.

• • • • • • 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ