Home Minister-in Sairang - Kanwpui kawng dinhmun enfiah

Kawnpui | May 24, 2025: Vawiin khan Mizoram Home Minister K Sapdanga hovin Deputy Speaker Lalfamkima leh Tuirial Bialtu MLA K Laldawngliana te chuan sawrkar mi pawimawhte nen Kawnpui leh Sairang inkar National Highway kawngpui dinhmun an en a; kawng chhe zual chak zawka siam dan tur leh lirthei kal dan turte ruahmanna an siam nghal a ni.

He hunah hian NHIDCL hotute leh Contractors te pawh tel ve in, Home Minister, Pu K Sapdanga chuan National Highway 6 (Kawnpui to Sairang) chu Mizoram chak lakna kawngpui pawimawh tak anih avangin an hna thawh mek chu chak lehzuala thawk turin NHIDCL leh PWD aiawh lokal te chu a hrilh a. Mizoram PWD enkawlna hnuaia la awm Kawnpui leh Khamrang inkar chu State sawrkar sum a awm ang ang pawt khawmin a chhe nasa zual lai thawm that hna thawh a nih tur thu a sawi. NHIDCL lam atang hian Kawnpui leh Khamrang inkar kawng chu siam tha turin Tender an chhuah tawh thu leh sum sanction an la dawn loh avanga hma an lak theih loh thu tarlan a ni a, hei vang hian PWD chuan a chhe nasa zual lai thawm that hna an thawk mek tih an sawi bawk.

Kawng en zawh hian Home Minister ho hian Mualvum 1st IR Battallion ah vawiina an kawng en atanga hmalak zel dan tur te sawihona hun hman a ni a. Tun dinhmuna kawng chhe nasa zual lai bik, Sairang leh Buichali Lei (Bridge) inkar chu ruah sur loh hun nghak kher lova a rang lama siam nise tih a ni a, chak taka hnathawh anih theih nan kawng hi lane khat siam hna kal hmasak tir nise, hnathawh lohna lam zawkah chhun lamah Lirthei rit phur lo kal tir a, Zan lamah lirthei rit phur te kal tir nise tih a ni.

Hnathawh tibuai lo tura Kawng dan a ngaih thin dawn avangin helai kawng siam hna hi NHIDCL leh PWD te bakah Police ten an vilpui anga, Khamrang leh a chhehvel a YMA branch te tlawmngai tura sawm nise tih a ni bawk. NHIDCL ten nitina an hmalakna chin chu Kolasib DC hnenah an report thin dawn a, PWD pawh in nitin enfiah turin anmahni mi leh sa an tir anga, karkhat hnuah Home Minister hian tlawh leh a tum thu a sawi bawk.

Vawiina Kawng dinhmun enfiahnaah hian Home Minister, Deputy Speaker leh Tuirial MLA te hi Pu K Lalthawmmawia, Commissioner & Secretary PWD; Pu Robert C Lalhmangaiha, Kolasib DC leh Pu David H Lalthangliana, Kolasib SP te, Pu H Zoramliana, Engineer in Chief PWD, Addl Director FCS&CA, Central YMA leh MZP hruaitute leh Sawrkar mi pawimawh dang ten an tawiawm a ni.