Union Home Minister-in sorkar leh ngei turin min fuih - Ex CM Zorama

Union Home Minister-in sorkar leh ngei turin min fuih - Ex CM Zorama

Aizawl | April 7, 2025: Vawiin ni 07.04.2025 Thawhtanni chawhma khan Mizo Hnam Run chhung inkhawm - political session-ah MNF President Pu Zoramthanga chuan tunhnaiah Union Home Minister Amit Shah nen an inkawm thu leh MNF sorkar siam leh ngei tura fuihna a dawn thu a sawi.

March ni 15, 2025 khan Union Home Minister Amit Shah chu Mizoramah lo kalin, hemi ni hian inkawmna hun an neih thu Pu Zoramthanga chuan a sawi a. He inkawmna hun pawimawh tak hi Union Home Ministry official-te ruahmannaa neih a nih thu a sawi bawk.

"Pu Amit Shah chuan ZPM sorkar ka hmuh dan chungchang min zawt ngun viau a. Kei chuan thu danga chhang lovin, ZPM sorkar chu an la thar lama nakinah thil an zir zel anga an la hre chhawm ve mai ang, ti bakin ka chhang lo," a ti.

 

Union HM nen an inkawm chhan ber sawiin Pu Zoramthanga chuan, (Central-a Congress sorkar lai) Burma rama remna a awm theihna tura palai hna a thawh dan a hrilh a ni.

"Burma underground intelkhawmin federal state siam an duh a, a leh lamah Burma sipai sorkar pawhin federal sorkar siam an remti ve bawk a. Rangoon, Bangkok-ah vawi tam ka kal hnuah India sorkarah ka report a, anni'n Pu Ajit Doval-a (National Security Advisor of India) nen min tir ta a, kan hlawhtlin teuh hle tih thu ka hrilh," a ti.

"India rama exposure nei tura phur taka ruahmanna siama hmalakna kan neih laiin Burma election-ah Aung San Suu Kyi a sorkar ta a, hmalakna a tawp zui ta a ni. 

"Tun dinhmunah chuan Sipai sorkar hnuaiah thil a khirh ta em em a ni," tia Amit Shah a hrilh thu  a sawi.

"Amaherawhchu, hmana exposure neih an duh dan leh India sorkar pawhin hmachhawpa a lo neih tawhte kha ka sawi a. Hei hi Union HM chuan a ngai thutak hle a ni," a ti.

Pu Zoramthanga chuan MNF sorkar liam ta hun sawi kaiin, Vairengte issue bakah Central BJP sorkar nena kan inlaichinna kha a tha tawk lo hle a, BJP lam chuan lehlam (ZPM) an awn ta a ni, a ti.

Tuna Pu Duhoma sorkarah hian BJP-ten tel ve an inbeisei dan te, a hnuah MP inthlana ZPM chak kha khatih laia BJP-in Centrala sorkar siam tura MP 272 an mamawh lai tak a ni. Mizoram Lok Sabha MP pakhat chauh pawh a pawimawh em em lai a ni a. Khati chunga BJP tan an pe thei lo kha, an boruak a tha ta lo takzet a ni, a ti.

"Pu Amit Shah chuan MNF chu sorkar leh ngei se min duhsak a, grassroot atanga tan la nasa turin serious takin min fuih," a ti a. "Sorkarna siam tura heti taka min duhsaktu hi ka la tawng ngai miah lo," Pu Zoramthanga chuan a ti.

Political Session-ah hian Pu Lalringliana, Executive Corporator & Adviser MNF GHQ pawhin thu a sawi a -AMC chu tehfung - Service Level Benchmark-ah kan ti tha hle a ni, a ti.

"Finance Commission 14na leh 15na (50:50 = tied:untied grants) kan hmang zo chiah a. Tunah hian 60:40 a ni ta a. Untied grant 40% chauh kan kutah a awm ta a, kan harsa ta deuh a ni, a ti. Tunah hian FC atangin fund a lokal a, mahse 11 Cr velin a tlahniam. Heti chung hian Aizawl khawpui tan theihtawp kan chhuah dawn a ni, a ti.

Chhung inkhawm hi Pu Lalrinsanga, MLA & GS MNF GHQ-in a kaihruai a. Pu N. Zokunga, Adviser MNF GHQ-in hunserh a hmang bawk a ni.

.