misual kut tuara invihna thleng anga sawi kha thu dik lo a ni; YMA Tuikhuahtlangin Thupha chawi

Aizawl | April 6, 2025: Tukina misual kut tuara invihna thleng anga sawi kha thu dik lo a ni; YMA Tuikhuahtlangin Thupha chawi.

THUPHA CHAWINA

YMA, Tuikhuahtlang Branch chuan an venga cheng mi pakhat hnen aṭangin Ni 6/4/2025 zing dar 4:00 bawr velah Dawrpui Aizawl Watch House bulah misual kut tuar angin a insawi a, Branch YMA hruaituten ngaihvenin a thlavang hauh tur leh a ṭul anga hma lak tumin Aizawl Police Station pan nghal a ni a, Police te nen theihtawp chhuahin hma lak nghal a ni. 

Amaherawhchu chhui chiannaah misual kut tuara invihna thleng anga sawi hi thu dik lo a ni tih hmuhchhuah a ni.

Hliam tuarin Police te hmaa a inpuannaah a hliamte hi Bike-a a chetsualna a nih thu sawiin hei hi finfiah nghal a ni a, Police hian thu dik lo a sawi avanga Case siamsakin amah hi an man nghal a ni.

He thil thleng hian vengchhung bakah Zoram mipuite a tithlabar em em a, Police te pawh a tibuai hman hle. 

Heng te avang hian YMA Tuikhuahtlang Branch chuan pawi a tiin thudik zawk puanchhuah ṭulin a hria a, thudik tawk lo leng avang hian Zoram mipui leh a bik takin Mizoram Police te chungah thupha kan chawi tak meuh meuh a ni.

Sd/-

*C. LALRINCHHANA*

Secretary 

YMA, Tuikhuahtlang Branch, Aizawl.

*NI 06.04.2025 A AIZAWL WATCH HOUSE BULA INVIHNA THLENG NI A THUTHANG CHUNGCHANG REPORT* 

       Dt 6.4.2025 dar 1:00pm khan Pu Lalvenpuia (26) s/o Lalrinchhana, Keitum, Serchhip District P/A Tuikhuahtlang hnen a tangin FIR dawn a ni a. A report dan chuan dt 6.4.2025 @ 4:00 am vel khan Dawrpui veng, Aizawl Watch House bulah Bike atang a chhuk chiah chu mi paruk vel tu tih hriat loh ten lo hualin a banah an vit a, ani chu a tlanchhe nghal a, mi paruk te hian Saron veng thleng an um zui a. Hetia kut an thlak lai hian an zing a pakhat chuan Pistol a lem leh a tak a nih hriat loh chu a phawrh a, pakhatin Tuboh a keng bawk a tih thu dawn a ni a.

         He thil hi rang taka bawhzui nghal niin Complainant hi uluk tak a exam a ni a. Tin, ICCC atangin CCTV footage en a ni a. CCTV Footage atang a a lan danin thil thlen hun lai ni a sawi bakah a hun hma deuh leh a hnu lam deuh thleng hian thil thlenna laiah hian eng buaina thleng mah hmuh a ni lova.         

        Thil awmdan han zirchian hian thil dik tawk lo a awm ngei nia hriat a ni a. Chuvangin Pu Lalvenpuia chu uluk leh zual a thu zawhfiah a ni a. Thuzawh a nih lai hian a report siam chu thu dik lo leh belhchian dawl lo a ni tih a sawi a. Thil thlen dan dik tak chu hetiang hi a ni. Dt 6.4.2025 zing dar 4:00am khan an in a tangin Chhinga veng ami Laltluangzela te inah a Bike MZ 01S 8588 in a kal a. Bazar Bungkawn a tang a kual thlain Modern School bul kual lai a thlenin a tlu a. Hei vang hian a banah leh taksa dangah hliam a tuar nual a, a Bike chabi pawh a ti bo a ni. A T-Shirt hak pawh a thler chhe bawk a ni. Ke in Laltluangzela te in chu a pan a. Heta tang hian a naute phone a biain hruai turin a chah a, chabi a tih bo a vangin chabi spare rawn keng turin a ti bawk. A naute an lo thlen chuan Civil Hospital-ah an kal nghal a ni. Civil Hospital atang hian hawin dar 9:30am velah in an thleng a. A thlen hnu hian a patea (Malsawmtluanga) hnenah hauh a hlauh a vangin thu dik lo hi a hrilh a, anni chuan thil awmdan chu thu dik emaw tiin Aizawl Police Station-ah FIR thehlut turin an ti a. Tichuan, thu dik lo (False information) hmangin Aizawl Police Station-ah FIR chu a theh lut ta a ni. 

    Officer-in-Charge

Aizawl Police Station

.