"Smart City aiin Smart MLA kan mamawh zawk a, mimal that falna aiin vantlang that tlanna kan mamawh zawk bawk - Rosiamngheta
Aizawl | April 7, 2025: Vawiin April ni 7, 2025 Thawhtanni hian hian Congress Bhavan-ah Mizoram Pradesh Congress chuan Political Session kan hmang a, he hunah hian Pu Rosiamngheta, Corporator, AMC, MPCC Secretary ni bawk chuan thu sawi in, ' Smart City aiin Smart MLA kan mamawh zawk a, mimal that falna aiin vantlang that tlanna kan mamawh zawk bawk. " a ti.
Pu Rosiamngheta chuan smart city aiin smart MLA kan mamawh, a reltute kan smart hi he ram hmasawnna atan hian a pawimawh.
Kan hotuten thil kan tiam zung zung a, changkang takin thil kan sawi a, a tak ram kan thleng zo leh si lo a, kan system hi ennawn a ngai a, mimal a hlawkna tur te hi kan um lutuk a, mimal dinhmun that falna aiin kan khawtlang that tlanna ram hian kan mamawh zawk.
Kan ram kan khawtlang te hi a him lo em em tunlai ah ralthuam nena kawtthlera vak vantlang ti ralkhel tak tak thawmte kan hria, kan khawtlang kan nunaute hi kan venhim a, an sahimna kan ngaituah a ngai a ni.
Health care te pawh kan han siam a, pay scale leh deposit a zira package hrang te hi a dik ber em ngaituah a ngai. Pay band in awmzia a nei, kan pawisa a zira kan duh package lei theih te hi a tha zawk em? Group A officer leh peon te natna vei hi a senso a inang thei chuvangin ngaituahna uluk tak a kan hman a tul. Kan sawrkar pawisa hi vantlang chhanchhuahna atan kan hmang tur a ni.
He ramah hian rethei te pawh hi nuamsa in rethei se la, miin a thawhchuah mil tawk a hmuh chuan rethei mahse a hlim. Tel te, dal te thleng hian ration a sem dan hi kan ngaituah a ngai.
Ram changkangah chuan elementary education an ngai pawimawh. A naupang pang enkawl turin mithiam thiam an dah. Sawi tur tam tak zingah health care tha te, zirna tha te hi kan mamawh hmasa tiin a sawi.
He Political Session hi Pi Zolawmi, General Secretary, MPCC chuan a kaihruai a ni.
.
Post a Comment
He post chungchanga i ngaihdan lo sawi ve rawh: