"Saiip puan sin hnu lawka zu zawrh hi a inhmehlo hle," - Ex CM Zorama

Aizawl | April 4, 2025: Aizawl district MNF VC/LC thlan tharte leh VC/LC term 7 tling tawhte chawimawina hun chu vawiin khan Vanapa Hall-ah hman a ni a. He huna thusawitu MNF President, Ex. Chief Minister Zoramthanga chuan, "Saiip puan sin hnulawka zuzawrh leh vut vut mai hi thil inhmehlo tawpkhawk a ni a. MNF chuan hetiang hi kan ti ve lovang. Theihtawp chhuahin, mi tamtak tawrhna leh rumna thlentu, zu leh sualna hi kan do zel ang. Zu vangin kan rum a, mi tamtakin hunlo takah nunna an chân a, nupa inthenna leh hmeithai leh fahrah tamtak siamtu a ni a. Pathian duhloh leh Bible kalh anih avangin zu leh zuzawrh hi kan do zel dawn a ni," a ti.

Zoramthanga chuan, zuzawrh tumnaah hian alcoholic content bithliah a ni silo a, khuahkhirh anih dan leh phalrai anih danturah a huamzau dawn hle. Congress sorkar hunlaia zuzawrh aiin a zalen zawk dawn a ni. Zu leh zuzawrh sawimawitu party chuan tunah hian MLA pakhat an nei ve tawk a. Mi tamtakin mual an liam zo tawh bawk a ni. 

Pathianin a changin min ti tling a, a changin min titla a. A thu thu a ni. MNF te hi roreltu ni reng ila kan kal thiamlo anga, kan laktlakloh viau tawh ngei ang. Chuvangin, insiamthat leh insiamremna hun Pathianin min siamsak thin a ni. Israel fate pawhin roreltu tha leh thalo an neih chang a awm ve thin a. Amaherawhchu, maichama meinung chu a mit ngailo, a ti. 

MNF President chuan, VC leh LC thlan tharte thinlung takin kan lawmpui a, kan chhuang takzet a ni. Nun uluk ila, mipui leh party unit te nen tha taka thawkho ang che u. MNF ten kan thuthlung kan vawn tlat na hi Pathianin kan felnaah a ruat a, party tamtak an thamral hnuah MNF chu  party ruhrel lianber kan la ni ta reng a ni. 

Pathian thupek pawimawh berte zinga mi, thupek tiamnei chu; ram zawng zawngte hnena chanchintha hril hi a ni a. He thupek zawmtute chu an hnena awmreng min tiam a ni. MNF chuan he thupek hi a ngai pawimawh hle a, kan sorkar lai pawhin missionary tamtak tirhchhuah kan sawi thin. Hei hi mi tam takin fiamthu nan an hmang thin. Amaherawhchu, missionary tirh chhuah kan tih hi mihring tamtak tirhchhuah mai nilovin, tirhchhuahte a tul anga tanpuina leh chhawmdawlna pek hi a ni bawk. Pathianin ram ralmuanga min dahchhan hrereng ila, a rawng bawlin chanchintha hril uar zel ila, Pathianin kan hnena awm min tiam a ni, a ti. 

He hun hi MNF Treasurer, leh Ex. Minister ni bawk Lalruatkima chuan kaihruaiin, Rev. Lianhmingthanga Sailo in hunserh a hmang a ni. MNF Gen. Hqrs. Gen. Secretary LT Kima Fanai hnen atangin report ngaihthlak a ni a, Aizawl City Local Council Association President C Lalbiaknunga chuan thu tawi a sawi bawk.