Aizawl | April 5, 2025 : Nimin chawhma dár 11:00 khán PZP, Joint Headquarters : Aizawl buatsaihin Zirlaite Ni (PZP Rising Day) chu Holiday Palace, Sihhmui-ah hman a ni a, he hun hi Fellic Zaihmingthanga, Vice President-in a kaihruai a. Upa C. Lalchhawnthanga'n hunserh hmangin, Pu Albin Lalhruaitluanga, President, PZP General Headquarters chuan uaptu niin a hmanpui bawk. He hun hi Pu Chinkhanmanga Thomte, General Secretary, MZP Headquarters, Pu Roluahpuia, Vice President MSU General Headquarters leh hnampual hruaitu ten an hmanpui bawk a. Joshua Lalvensanga Secretary hnén aṭangin inhmelhriattirna leh report ṭha tak ngaihthlák a ni.
Pu Vanlalfakhlua, President chuan thusawiin PZP din champha (Rising Day) vawi 41-na làwm thei an nih chu lâwmawm a ti a. PZP dinchhan leh PZP thil tum te sawiin Pangfate hnama chiang turin leh pang hnam tán theihtawp chhuah turin kal khâwmte a chah a. PZP hmalakna hrang hrang a sawi bâkah zirlaite chu zirna kawngah taima tak leh theihtàwp chhuah tùrin a chah bawk a. PZP chu Pangfa hnam tána thawk ṭhìn a. A hun azirin tlawmngai pawl angin Pangfate tán a thawk ṭhin thu a sawi bawk a ni.
Uaptu, Pu Albin Lalhruaitluanga, President PZP, General Headquarters pawn thu sawiin, PZP chu Pang zirlaite tán chauhva din ni lovin Pang hnam tána din a nih thu a sawi a. Pangfate chu mahni hnama chiang tùra chahin, kawng engkimah Pang hnam tán theihtàwp an chhuah zêl tùr thu leh hmasâwnna kawng an zawh zêl tùr thu a sawi bawk.
He hunah hian Pu D. Vanlalzaua, Adviser, PZP, Joint Headquarters : Aizawl, Pu Chinkhanmanga Thomte, General Secretary, MZP, Pu Roluahpuia, Vice President MSU leh hnampual hruaitu ten thusawina hun an neih bâkah PZP, General Artist Aizawla awm te PZP, Joint Headquarters : Aizawl hmingin chàwimàwina thuziak hlan an ni bawk.
AYUSH aṭangin Yoga Awareness zirlai naupangte nèn hun hlimawm tak hman a ni bawk.
Post a Comment
He post chungchanga i ngaihdan lo sawi ve rawh: