ISUAN THIH HLAUHNA ATA A CHHANDAM CHE

_Hmangaihna Thumah Ropui Pasarih_

- Rick Warren 

- April 06, 2025

_"Tichuan, naupangte hi tisa leh thisen changte an nih hlawm avangin, amah ngei pawhin chung bawk chu a chang ve ta a; thihnain thihna thuneitu (chu chu Diabola a ni) a tihboral theihna tur leh, thih hlauh vanga dam chhunga bawiha awm zawng zawngte chu a chhan chhuah theihna turin."_ (Hebrai 2:14-15)

Thihna hi mi zawng zawng hlauh a ni a. Tuma'n an pumpelh dawn hek lo!

Mahse Isuan chu hlauhna ata chu a chhandam che tih i hria em? Isuan i sualna ata a chhandam ringawt lo che tih hi a dik e. Thihna thiltihtheihna leh hlauhna lak ata pawh a chhandam che. 

_"Tichuan, naupangte hi tisa leh thisen changte an nih hlawm avangin, amah ngei pawhin chung bawk chu a chang ve ta a; thihnain thihna thuneitu (chu chu Diabola a ni) a tihboral theihna tur leh, thih hlauh vanga dam chhunga bawiha awm zawng zawngte chu a chhan chhuah theihna turin."_ (Hebrai 2:14-15)

Nimin khan Isuan kraws lera a thih hmaa a thu au chhuahpui thu kha kan en a: "Tetelestail", Greek ṭawng a ni a, "A kin ta" tihna a ni a, indona au aw a ni. A awmzia chu thihna a hneh ta tihna a ni. Thihna kan hlau tur a ni lo- a chhan chu nunna nen a rawn kir leh thuai dawn a ni tih a rawn fiah a ni.

Johana 11:25-ah chuan Isuan heti hian a ti, _"Kei hi thawhlehna leh nunna chu ka ni; tupawh mi ring chu thi mah sela a nung reng ang."_ Thihna hi tawpna a ni lo. Chuvangin thihna hi hlauh tur a ni lo ve.

Isuan ka ai krawsa a thih avangin ka hlau lo. Thihnain ka chungah thu a nei lo. Thihna hi kan awm hmun sawnna mai a ni tih ka hria a, ka thih hnua ka kalna tur pawh ka chiang tawh a ni. Isua i chhandamtu a i pawm chuan nang pawh chutiang chu i ni ang.

Rom 5:17-ah chuan heti hian kan hmu, _"Mi pakhat sual avanga thihnain, chu mi pakhat avang maha ro a rel si chuan khawngaihna nasa tak leh felna thilpek hmutute chuan, mi pakhat (Isua Krista) avang khan nunnaah chuan ro an rel ngei ang."_ 

Ringtu i lo nih khan sualah thiin nunna thara kaih thawh i lo ni, engtik niah emaw Isua nen chatuanin in cheng dun ang tih rinna nen. Chu chu i chunga thil thleng tur duhawm ber a ni. 

Chu inrintawkna chu Isuaah i nei tawh em? Tunah chuan miten chutiang nun an neih theih nan i pui thei ang. Isuaa thihna leh nunna kan sawi mek lai hian miten i nun dan aṭangin Isua Lal leh Chhandamtuah an pawm ve thei a ni.

Ngaihtuah zui atan.

Thihnaah hian eng lam nge i hlauh? Vawiina kan thuzir hian i hlauhnaah engtinnge a puih che?

Thihna chungchang sawi i harsat em? Engvangin?

Engtinnge thihna leh nunna chungchang i sawi danin mite Isua hnena a hruai?

*I thih hnua i kalna tur i chiang em?*

Mi tam tak chuan thihna an hlau ṭhin - an thih hnua an kalna tur an chian loh vang a ni tlangpui. Mahse chu thih hlauhna ata chu Isuan a rawn chhandam che a ni.

Bible chuan mi zawng zawngin thil kan tisual tawh a, chuvangin thi tur kan ni tih min hrilh. Mahse Pathianin min hmangaih em avangin kan sual man pe a Pathian chhungte zinga tel a, thih hlauhna lak atan min tlan turin a Fapa Isua kan tan a rawn tir a ni.

Pathian chhungte zinga tel tura i inpeih chuan heti hian ṭawngṭai rawh le:

"Lalpa, ka thih hunah ka chanchin i hmaah ka sawi dawn a ni tih ka hria a. I lakah thil sual tiin i remruat ang ni lovin ka duh danin ka nung a ni tih ka hria. Tun aṭang hian ka nun dan thlak ka duh. Sual lak ata i hnen lam rawn pan ka duh.

"Ka sual sual man ka tawrh loh nan ka sual zawng zawng ai thi tura Isua i rawn tirh a avangin ka lawm e. I ngaihdam ka phu lo tih ka inhria. Lalpa, i khawngaihna chauhin min chhandam thei tih ka hria. 

"Isu, min hmangaih em avanga ka sual zawng zawng i phurh avangin ka lawm e. Vanram luttlakah min siam a, min chhandam turin ka ngen a che. Ka sualna leh thih hlauhna lak ata min chhandam turin ka ngen a che. Tunah hian ka pumin, chatuan atana min chhandam turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]