Aizawl | April 15, 2025: An thil phut ngiata nuar mek All Mizoram CSS Employees Coordination Committee (AMCECC)-in tawlh an tum lo, Pen/Tool down Strike-in awmzia a neih loh chuan April 21 - 23, 2025 chhung hian Mass Casual Leave lain nawrhna hi chhunzawm an tum.
AMCECC chuan, "AMCECC member dan lova lak kan awm kan hre lova, sorkar appointment order mumal tak nei veka lak kan ni, dan dik loa lak kan awm a nih chuan dan loa min latu chu sorkarin chhui chhuakin, a mawhphurtute chungah na taka hmala turin kan phut a ni." an ti.
"All Mizoram CSS Employees Coordination Committee (AMCECC) ten Sorkar lakah lungawilohna Pen/Tool Down Strike kan neih mekah CSS member ten kan thlawp tha chu lawmawm kan ti hle a, member zawng zawngte chungah AMCECC chuan lawmthu a sawi a ni." an ti a.,
"Pen/Tool Down Strike kan neih hnuah hian Mizoram sorkar chuan inbiakna mumal engmah min la neihpui lova. Chutihmek lai chuan Chief Secretary Charge la mektu chuan Press Conference-ah CSS hnuaia dan loa lakte chu dahngheh theih an nih loh thu a sawi leh, AMCECC thil phut an tih hlawhtlin chuan India Constitution bawhchhiat a ngaih dawn thu a sawi hi hriatthiam har kan ti a ni. CSS te dinhmun hrechiangtu kan sorkar chak tak chuan CSS te dahngheh theihna tur dan ‘Govt, of Mizoram Regularization of CSS Employees Scheme, 2024’chu duhsak takin min siamsak a, he dan hi a taka kan hman ngei theih nan kan Chief Minister zahawm tak pawhin a theihna dan zawng hram hram tura thuneitute a chah mawlh mawlh laiin, min dahngheh theih nan hma la lova, a harsatna leh a theihlohna dan min zawn sak zel tu an la awm fo hi, keini AMCECC chuan kan duhlo takzet a ni. Mizoram sorkar hian a duh chuan CSS hnuaia thawk te a lo dah ngheh fo tawh thin a, keini aia mumal lova lak te pawh dahngheh an lo ni tawh thin a ni."
"AMCECC member dan lova lak kan awm kan hre lova, sorkar appointment order mumal tak nei veka lak kan ni, dan dik loa lak kan awm a nihchuan dan loa min latu chu sorkarin chhui chhuakin, a mawhphurtute chungah na taka hmala turin kan phut a ni." an ti bawk.
AMCECC hnuaia thawkte hi thalai lehkha thiam rual, kan hun tha leh theihna, kan vanglai hun zawng zawng hmang ral raih a Mizoram tana thawktute kan ni a, tuna kan hmalakna hian thalai hna zawng mek leh thangthar te tan thil tha zawk a hrinchhuah dawn avangin sorkar leh mipui pawn ngaihtuahna nasa tak leh uluk taka min dawnsawn sak turin kan ngen a ni.
"Press Release No. AMCECC/EM/PR/7-2025 Dt 12th April, 2025 a kan thil phut point pathum te ngiata nawrhna Pen/Tool down Strike hian awmzia a neih loh chuan 21 - 23 April, 2025 chhung hian AMCECC chuan Mass Casual Leave lain nawrhna hi kan chhunzawm ang." an ti bawk.
AMCECC thil phutte:
1. Provisional Employees/State Contract-te tan an mamawh anga Departmental Promotion Committee (DPC) awlsam taka Sorkarin a siamsak thin ang hian CSS Employees-te tan DPC siam ngaiah leh Corresponding Post siam rem leh a tul dan a zira Equivalent/Temporary Post siam ngaiah min siamsak turin kan phut a ni.
2. CSS hnuaia thawkte hi hmasawnna hna hrang hrang thawktu leh Sorkar kut ke berte zing ami kan ni a, amaherawhchu, kawng hrang hrangah enhran leh hlamchhiah kan ni fo thin hi na kan ti a. Mizoram hmasawnna atan thahnemngai taka kan thawh angin hamthatna leh kan Service-ah min duhsak ve turin kan phut tlat a ni.
3. Mizoram Sorkar hnuaia a nghet a thawk ten a hun taka hlawh an lak thin laiin CSS hnuaia thawkte’n hlawh kan la mumal lo fo thin a, CSS kan kalpui danah tun aia chak leh zualin Central atanga Fund nawr chhuah a nih theih nan hma min laksak turin kan phut a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: