Lirthei chesual-ah nula pakhat boral; ". . kawng nal vanga thihna thlenga mawhphurhtu chu PWD minister a ni, Bang rawh se" - Ruatfela Nu

Aizawl | April 15, 2025: Tukin dar 7:00 vel khan Thingsulthliah atanga Aizawl pana ke hnih nei lirthei hmanga kal te chu Zemabawk Forest Check Gate chhak, LT Resort bul kawng kawiah an tlu a, a hnunga chuang Angely Ramngaihawmi (18) J Lalrosanga fanu, Thingsulthliah chu Truck-in chil zuiin, a hmunah a boral nghal.

Bike a an tlukna hmun hi lirthei tam tak lo tluk tawhna hmun a ni a, NHIDCL kawng siam danin a zir loh vangin ruahsur nal loh lai pawhin lirthei ke hnih nei a tlu fo tawh thin nia sawi a ni a, tukin pawh khan Angely Ramngaihawmi te hi he kawng kawi laiah hian tluin, Angely Ramngaihawmi hi Motor lian (Truck) lo tlan mek hnuaiah tleng lutin Truck hian ka pawh chhawn lovin a chil hlum zui ta nia thu dawn a ni.

Ruatfela Nu chuan, he thil thleng hi kawng siamtu NHIDCL mawh niah ngaiin,  "Nula thi chhungte hnenah NHIDCL in zangnadawmna an pe ngei tur a ni," a ti a.  "NH-02 (54) kawng nal vanga thihna thlenga mawhphurhtu chu PWD minister a ni, Bang rawh se" a ti bawk.

He chhiatna thlen vanga Ruatfela Nu thuziak:

Tukin (15.04.2025) zingkarah NHIDCL kawng laih, NH-02 (54) (Aizawl-Tuipang) Zemabawk Forest check gate bul, 2-wheeler 50 vel zet an accident tawhna hmunah; kawng nal vang bawkin motor cycle a tleng a, a hnunga chuang nula kum 20 mi vel a thi tih min rawn hrilh a. Ka thinur lutuk a, ka lum pup pup a, ka khur hlawk hlawk thei hial a ni. Thihna a thlen tak avangin inthiam lohnain ka khat a. A chhan chu thla 2 vel liam tawhah khan, mi thahnemngaite’n ka hnenah hetiang hian an rawn sawisel (complaint) a: “ka pi helai kawngah hi a huh hlek chuan a nal lutuk a, 2 wheeler 30  vel an tlu tawh. Ha-hmai bal phah te, ke ulh te an awm tawh a. Thihna tawk an awm hmain hma la teh” tiin. Kei lah pek chuan ‘thil tha lo apiangah hma ka la hman bik lo, ei zawnte ka ngai ve a, a siamtu vai kawnglai company velh pahin siam that tir rawh u, a thuhrimin Mizo mipa hian vai velh hnatlang pawh ka koh paw’n inngam tawh lo’ ka lo ti hlur a. Sawlai vela cheng kan thianpa chu ka’n hrilh a, ani’n State Project Monitoring Committee hnenah a thlen a, hma an lak har danah an ngai pawimawh lem lo ni ngeiin a lang.

Hei hi mawhphurtu te’n hre rawh se. Mipa chuan emaw, PWD chuan emaw, State Project Monitoring Committee emaw te’n, chhia leh tha hriatna thiang an nei ve a, mihring harsatna tawhte pawi an ti ve thin a nih ngai chuan 2- wheeler pathum (3) a tlu khan pakla hisapin ‘helai kawng siam dan hi a dik lo’ tih an hre tur a ni. Mihring himnate hi inngai ho lam hlawm lutuk! Ngaizel kham lung tla vanga thihna thlenga mawhphurtu tu nge? Bang rawh se. NH-02 (54) kawng nal vanga thihna thlenga mawhphurhtu chu PWD minister a ni. Bang rawh se. Nula thi chhungte hnenah NHIDCL in zangnadawmna an pe ngei tur a ni.