" . . Tripura sawrkarin kan ram chhunga kut a rawn thlak hi a (CM) ngaihthah mai a rinawm loh,"

Aizawl | April 15, 2025: EF&CC Minister Lalthansanga chuan vawiin khan tun hnaia Mizoram chhunga Tripura sawrkarin kut a rawn thlakna Phuldungsei Jampui Hills khuaa Thaidawr tlang a tlawh a, Jampui Mizo Convention hruaitute leh Phuldungsei khawtlang hruaituten an lo dawngsawng a ni.

Forest Minister Lalthansanga (Chatea) chuan, "Thaidawr tlangah hian Tripura sawrkarin hma an lo la a ni tih kan hriatin a hmun ngeia enfiah hi tul kan ti a, he lai hmun hi tuan leh manga ta mizo lalte luah ram leh thuthmun a ni a, chutih rualin helai hmun enkawl leh tuaihnum kawngah kan lo muthlu rei hle a ni tih Mizo Convention hruaitute nen kan inkawmna atangin a lang reng mai a, hei hi a pawi tak zet a ni." a ti a.

MInister Chatea chuan, "Kalphungthar mipui Sorkar hnuaiah he lai hmun hi ngaihsak chhoh zel kan tum anga, kan Chief Minister kum 40 zet he ram tana lo bei tawhtu hian Mizoram ramri hi a vei a, Boundary Commission tha tak din niin Assam nena kan ramri buaina chungchang pawh he Boundary commission hian a bawhzui mek a, hetianga Tripura sawrkarin kan ram chhunga kut a rawn thlak hi a ngaihthah mai a rinawm loh a, chuvangin, helai chhehvela cheng mipuite pawhin lungrual taka sorkar hmalakna thlawpa in thawhpui zel ka beisei a, politics inchirtheh nan leh inlungrualna tichhetu tan hmang lo turin ka chah che u a ni,” a ti.